নেপাল-তিব্বতৰ শেহতীয়া হিমবাহ গলন আৰু আকস্মিক দুৰ্যোগৰ পৰিপ্ৰেক্ষিতত প্ৰাকৃতিক দুৰ্যোগৰ পূৰ্বানুমান কৰাত আধুনিক প্ৰযুক্তি কিমানদূৰ সহায়ক হ’ব পাৰে, সেই সন্দৰ্ভত এক গুৰুত্বপূৰ্ণ আলোচনা আৰম্ভ হৈছে। যদিও প্ৰতিটো প্ৰাকৃতিক দুৰ্যোগৰ নিখুঁত পূৰ্বানুমান কৰাটো সম্পূৰ্ণৰূপে সম্ভৱ নহয়, তথাপিও কৃটিম বুদ্ধিমত্তা (AI), উপগ্ৰহ, ৰিম’ট চেন্সৰ আৰু স্মাৰ্টফোনৰ দৰে প্ৰযুক্তিয়ে সম্ভাৱ্য বিপদসমূহ আগতীয়াকৈ চিনাক্ত কৰি জনসাধাৰণক ক্ষিপ্ৰতাৰে সতৰ্কবাৰ্তা প্ৰেৰণ কৰাত এক বৈপ্লৱিক পৰিৱৰ্তন আনিছে। গৱেষক আৰু দুৰ্যোগ ব্যৱস্থাপনা দলসমূহে এতিয়া উপগ্ৰহৰ পৰা প্ৰাপ্ত ছবি, বতৰ কেন্দ্ৰৰ তথ্য, নদীৰ জলপৃষ্ঠ আৰু ভূ-কম্পন সংক্ৰান্তিয় বিশাল পৰিমাণৰ ডাটা বিশ্লেষণ কৰিবলৈ এআই আৰু মেচিন লাৰ্নিঙৰ সহায় লৈছে, যিটো মানুহৰ বাবে অতি কম সময়ত বিশ্লেষণ কৰা অসম্ভৱ।
এআইৰ ব্যৱহাৰেৰে হিমবাহ হ্ৰদসমূহ অস্বাভাৱিকভাৱে উপচি পৰা, পাহাৰীয়া অঞ্চলত ভূমিস্খলনৰ সম্ভাৱনা আৰু প্ৰৱল বৰষুণৰ ফলত হ’ব পৰা বানপানীৰ আগতীয়া সংকেত অত্যন্ত দ্ৰুতগতিত চিনাক্ত কৰিব পৰা যায়। আনহাতে ঘূৰ্ণীবতাহৰ গতিপথ অনুসৰণ কৰাৰ ক্ষেত্ৰত উপগ্ৰহ আৰু বতৰৰ ৰাডাৰে গুৰুত্বপূৰ্ণ সময় প্ৰদান কৰে। যদিও ভূমিকম্পৰ সঠিক পূৰ্বানুমান কৰা এতিয়াও সম্ভৱ হোৱা নাই, তথাপিও ভূ-কম্পন প্ৰযুক্তিয়ে প্ৰথম কম্পন ধৰা পেলাই ভয়াৱহ জোকাৰণি আৰম্ভ হোৱাৰ কেইছেকেণ্ডমান পূৰ্বেই মোবাইললৈ সতৰ্কবাৰ্তা প্ৰেৰণ কৰিব পাৰে, যাৰ ফলত মানুহে আত্মৰক্ষাৰ বাবে অতি গুৰুত্বপূৰ্ণ কিছু সময় লাভ কৰে।
এই সকলো প্ৰযুক্তিগত প্ৰক্ৰিয়াৰ মাজত জনসাধাৰণৰ হাতত থকা স্মাৰ্টফোনসমূহে দুৰ্যোগৰ সময়ত আটাইতকৈ গুৰুত্বপূৰ্ণ মাধ্যম হিচাপে কাম কৰে। চৰকাৰ আৰু জৰুৰীকালীন সংস্থাসমূহে বিপদৰ সময়ত পোনপটীয়াকৈ জনসাধাৰণৰ মোবাইললৈ জৰুৰীকালীন সতৰ্কবাৰ্তা প্ৰেৰণ কৰে। ইয়াৰ উপৰিও নিজৰ অৱস্থান শ্বেয়াৰ কৰা, পৰিয়ালৰ সৈতে যোগাযোগ ৰখা আৰু জৰুৰীকালীন সেৱাৰ সহায় বিচৰাৰ ক্ষেত্ৰত স্মাৰ্টফোনে ডাঙৰ ভূমিকা পালন কৰে। প্ৰযুক্তিয়ে বিপদৰ আগজাননী দি সময় বচাব পাৰিলেও মানুহৰ তৎপৰতাহে প্ৰকৃততে জীৱন ৰক্ষাৰ মূল চাবিকাঠী, যাৰ বাবে অনলাইন উৰাবাতৰিত ভোল নগৈ চৰকাৰী নিৰ্দেশনা সঠিকভাৱে পালন কৰাটো অপৰিহাৰ্য।
