দিল্লীসহ দেশৰ বিভিন্ন প্ৰান্তত নীট (NEET) প্ৰশ্নকাকত ফাদিলৰ বিৰুদ্ধে হোৱা আন্দোলনত জড়িত প্ৰতিবাদকাৰীসকলৰ বিৰুদ্ধে পঞ্জীয়ন কৰা সকলো এজাহাৰ (FIR) বাতিল কৰাৰ দাবীত সোমবাৰে উচ্চতম ন্যায়ালয়ৰ দ্বাৰস্থ হয় কেন্দ্ৰীয় চৰকাৰ। ছলিচিটৰ জেনেৰেল তুষাৰ মেহতাই ভাৰতৰ মুখ্য ন্যায়াধীশ সূৰ্য কান্তৰ নেতৃত্বাধীন বিচাৰপীঠৰ সন্মুখত এই বিষয়টো উত্থাপন কৰি আদালতৰ হস্তক্ষেপ বিচাৰে। কেন্দ্ৰীয় চৰকাৰে সংবিধানৰ ১৪২ নং অনুচ্ছেদৰ অধীনত থকা বিশেষ ক্ষমতা প্ৰয়োগ কৰি প্ৰতিবাদকাৰী ছাত্ৰ-ছাত্ৰীসকলৰ বিৰুদ্ধে ৰুজু হোৱা গোচৰসমূহ খাৰিজ কৰিবলৈ শীর্ষ আদালতক অনুৰোধ জনায়। এই আবেদনৰ ওপৰত উচ্চতম ন্যায়ালয়ে ১ ছেপ্টেম্বৰত শুনানি গ্ৰহণ কৰাৰ দিন ধাৰ্য কৰিছে।
উল্লেখ্য যে, ইয়াৰ পূৰ্বে উচ্চতম ন্যায়ালয়ে প্ৰতিবাদত অংশ লোৱা লোকসকলৰ বিৰুদ্ধে কোনো ধৰণৰ কঠোৰ পদক্ষেপ গ্ৰহণ নকৰিবলৈ নিৰ্দেশ দিছিল আৰু গুৰুতৰ অপৰাধমূলক ইতিহাস নথকা আটকাধীন নাবালকসকলক তৎকালীনভাৱে মুক্তি দিয়াৰ ব্যৱস্থা গ্ৰহণ কৰিবলৈ কৈছিল। আনহাতে, কক্ৰোচ জনতা পাৰ্টীয়ে (CJP) অহা ৫ ছেপ্টেম্বৰত ইণ্ডিয়া গেটৰ পৰা দিল্লী আৰক্ষীৰ মুখ্য কাৰ্যালয়লৈ উলিওৱাৰ কথা ঘোষণা কৰা প্ৰতিবাদী সমদলত স্থগিতাদেশ জাৰি কৰিবলৈও উচ্চতম ন্যায়ালয়ে অস্বীকাৰ কৰে। মুখ্য ন্যায়াধীশে মত প্ৰকাশ কৰে যে এই সমদলত অংশ লোৱা সকলো পক্ষই দায়িত্বশীল আচৰণ প্ৰদৰ্শন কৰিব আৰু এই প্ৰতিবাদ সম্পূৰ্ণ শান্তিপূৰ্ণ তথা আইনসন্মত হৈ থাকিব বুলি ন্যায়ালয় আশাবাদী।
