সুস্বাদু থলুৱা খাদ্যৰসিক আৰু পৰ্যটকৰ বাবে সুখবৰ। দেওবাৰে উদ্বোধন হ’ল গুৱাহাটীৰ পানীখাইতিত থকা থলুৱা ব্যঞ্জনৰ ৰেষ্টোৰা ‘পানচৈ’ৰ নতুন ভবন। ব্ৰহ্মপুত্ৰৰ পাৰত অপৰূপ নৈসর্গিক শোভাৰ মাজত পানীখাইতিৰ হাতীশিলা গণেশ মন্দিৰৰ গাতে লাগি থকা পানচৈ ৰেষ্টুৰেণ্টখনৰ নতুন ভৱন মুকলি কৰে প্রবাসী ভাৰতীয় তথা এভাৰেষ্ট আৰোহী হেদায়ত আলীয়ে। এভাৰেষ্টসহ ৬খন মহাদেশৰ ৬টা শীর্ষ শিখৰ আৰোহন কৰিছে প্রবাসী অসমীয়া হেদায়ত আলীয়ে। এই অনুষ্ঠানত বিশিষ্ট অতিথি হিচাপে অংশ লয় অৱসৰপ্ৰাপ্ত প্রশাসনিক বিষয়া স্বপ্ননীল বৰুৱা আৰু সাংবাদিক প্রণয় বৰদলৈয়ে।
এই উপলক্ষে আয়োজিত উদ্বোধনী অনুষ্ঠানত কল্লোল বৰঠাকুৰ, জিনা ৰাজকুমাৰী, ৰূপাংকিতা পাপৰি, পদ্মনাভ বৰদলৈ আদি শিল্পীৰ উপৰিও হোটেল উদ্যোগী দেৱ বৰঠাকুৰ, ইনষ্টিটিউট অব হোটেল মেনেজমেন্টৰ সঞ্চালক সুশান্ত চৌধুৰীসহ ভালেসংখ্যক লোক উপস্থিত থাকে। উল্লেখ্য যে ‘পানচৈ’ৰ স্বত্বাধিকাৰী অঞ্জলী বৰাই ইতিমধ্যে মহানগৰীত ‘ভোট জলকীয়া’ নামেৰে ৰেষ্টুৰেণ্ট এখন গঢ় দি থলুৱা সুস্বাদু খাদ্যৰ জুতি প্রদান কৰি অসমীয়া উদ্যমী মহিলা হিচাপে প্রতিষ্ঠা লাভ কৰিছে।
