দেউলীয়া হৈ পৰিছে দ্বীপৰাষ্ট্ৰ শ্ৰীলংকা । বিধ্বস্ত অৰ্থনীতি, দিশহাৰা চৰকাৰ, জনতা । নাই ইন্ধন, নাই খাদ্য সামগ্ৰী, দৰৱ । চৌদিশে হাহাকাৰ, ৰাইজৰ প্ৰতিবাদ । দ্বীপৰাষ্ট্ৰখনৰ অৰ্থনীতিয়ে এনে বিধ্বস্ত ৰূপ লোৱাৰ সময়তে প্ৰধানমন্ত্ৰী ৰূপে দায়িত্ব গ্ৰহণ কৰে ৰণিল বিক্ৰমসিংঘে । দেশখনৰ অৰ্থনীতিক সুৰক্ষিত কৰিবলৈ ৰাষ্ট্ৰপতি গোটাবায়া ৰাজাপাকছাৰ আমন্ত্ৰণক্ৰমে প্ৰধানমন্ত্ৰী দায়িত্ব লৈছিল বিক্ৰমসিংঘেয়ে । কিন্তু প্ৰধানমন্ত্ৰীৰ আসনত বহিয়েই চৌদিশে অন্ধকাৰ দেখিছে ৰণিল বিক্ৰংসিংঘেয়ে । সোমবাৰে দেশবাসীক উদ্দেশ্যি ভাষণ দি প্ৰধানমন্ত্ৰী বিক্ৰমসিংঘেয়ে অকপটে স্বীকাৰ কৰে স্বাধীনতাৰ ৭০ বছৰত গভীৰতম আৰ্থিক সংকটত পৰিছে শ্ৰীলংকা । দেশখনত মজুত আছে মাত্ৰ এদিনৰ ইন্ধন । ক্ৰয় ক্ষমতা প্ৰায় শূন্য হৈ পৰা দেশখনৰ কলম্বো মন্দিৰৰ বাহিৰত অপেক্ষাৰত তিনিখনকৈ ইন্ধনভৰ্তি জাহাজ । কিন্তু শ্ৰীলংকা চৰকাৰৰ হাতত নাই ইন্ধন ক্ৰয়ৰ সামৰ্থ্য। প্ৰধানমন্ত্ৰী বিক্ৰমসিংহেয়ে প্ৰকাশ কৰা মতে, অত্যাৱশ্যকীয় সামগ্ৰী ক্ৰয়ৰ বাবে দেশখনক শীঘ্ৰে প্ৰয়োজন ৭৫ নিযুত ডলাৰ । ইন্ধনহীন দেশখনত ইন্ধন বিচাৰি দিনে-নিশাই পেট্ৰ’ল পাম্পসমূহত ভিৰ কৰিছে যান-বাহনৰ গৰাকীয়ে । কেৱল সেয়াই নহয়, আৰ্থিক সমস্যাৰ সমাধান বিচাৰি হাবাথুৰি খাইছে বিক্ৰসিংঘে চৰকাৰে । আৰ্থিক সংকট মোচনৰ বাবে শ্ৰীলংকা এয়াৰ লাইন্ছ বিক্ৰী কৰিবলৈ সাজু চৰকাৰ । চৰকাৰী কৰ্মচাৰীক দৰমহা দিবলৈ নোট ছপা কৰিব চৰকাৰে । কিন্তু কিমান কাৰ্যকৰী হ’ব এই ব্যৱস্থা তাকে লৈ উত্থাপন হৈছে প্ৰশ্নৰ । নতুনকৈ ছপা কৰা নোটেৰে শ্ৰীলংকাবাসীৰ ক্ৰয় ক্ষমতা বৃদ্ধি পাব ঠিকেই কিন্তু ক্ৰয় কৰিবলৈ জনতাই সামগ্ৰী ক’ত পাব তাৰ কোনো উত্তৰ নাই শ্ৰীলংকা চৰকাৰৰ হাতত ।
