প্ৰশাসনে ডাম্পিং গ্ৰাউণ্ড নিৰ্মাণ কৰিবলৈ লোৱা কাৰ্যৰ বিৰুদ্ধে শ শ পুৰুষ মহিলা ওলাই আহি বন্ধ কৰিলে নিৰ্মাণৰ কাম। চিলাপথাৰ পৌৰসভাৰ অধীনত গেলগেলি সৰুপামত জনাঞ্চলৰ নিচেই কাষতে প্ৰশাসনে জাৱৰ-জোথৰৰ ডাম্পিং গ্ৰাউণ্ড নিৰ্মাণ কৰিবলৈ ব্যৱস্থা গ্ৰহণ কৰাৰ অভিযোগ উত্থাপন কৰিছে স্থানীয় ৰাইজে। পূৰ্বে কেইবাবাৰো এই স্থানত ডাম্পিং গ্ৰাউণ্ড নিৰ্মাণ কৰিবলৈ চেষ্টা কৰিছিল যদিও ৰাইজে বাধা প্ৰদান কৰি আহিছে। সম্প্ৰতি ভূমি সংৰক্ষণ বিভাগৰ ভূমিত কেইগৰাকীমান যুৱকে বৃহৎ পকী দেৱাল নিৰ্মাণ কৰা ৰাইজে প্ৰত্যক্ষ কৰি আহিছে যদিও গুৰুত্ব প্ৰদান কৰা নাছিল। কিন্তু কেইদিনমানৰ পূৰ্বে বেতনিপাম পঞ্চায়তত অনুষ্ঠিত কৰা সজাগতা সভাৰ জৰিয়তে এই স্থানত ডাম্পিং গ্ৰাউণ্ড নিৰ্মাণ কৰিবলৈ লোৱা বুলি জানিব পাৰি জাঙুৰ খাই উঠিছে স্থানীয় বাসিন্দাসকল। জনাঞ্চলৰ নিচেই কাষতে কোনো কাৰণতে ডাম্পিং গ্ৰাউণ্ড নিৰ্মাণ কৰিবলৈ দিয়া নহ’ব বুলি হুংকাৰ স্থানীয় ৰাইজৰ।
