প্ৰধানমন্ত্ৰী নৰেন্দ্ৰ মোদীয়ে নিতান্তই প্ৰয়োজন নহ’লে সোণ ক্ৰয়ৰ পৰা বিৰত থাকিবলৈ দেশবাসীক আহ্বান জনোৱাৰ পিছতে সোণৰ ষ্টকসমূহৰ মূল্যত ব্যাপক পতন ঘটিছে। সামাজিক মাধ্যম ইনষ্টাগ্ৰামৰ জৰিয়তে দেশবাসীক সম্বোধন কৰি প্ৰধানমন্ত্ৰীগৰাকীয়ে কয় যে প্ৰতিগৰাকী নাগৰিকেই ‘স্বদেশী’ আৰু ‘ভকেল ফৰ লোকেল’ৰ মন্ত্ৰ গ্ৰহণ কৰা উচিত। কেৱল আমোদ-প্ৰমোদৰ বাবে বিদেশ ভ্ৰমণ কৰা বা বিদেশত বিবাহ অনুষ্ঠান অনুষ্ঠিত কৰাৰ পৰিৱৰ্তে ‘ৱেডিংস্ক ইন ইণ্ডিয়া’ (Weddings in India) মন্ত্ৰৰে দেশৰ ভিতৰতে সকলো সম্পন্ন কৰিব লাগে বুলি উল্লেখ কৰি তেওঁ অতি প্ৰয়োজনীয় নহ’লে সোণ কিনাৰ পৰাও বিৰত থাকিবলৈ পৰামৰ্শ দিয়ে।
প্ৰধানমন্ত্ৰী মোদীয়ে লগতে কয় যে দেশে যিমানেই স্বদেশী আৰু আত্মনিৰ্ভৰশীলতাক অগ্ৰাধিকাৰ দিব, সিমানেই স্বাধীনতাৰ ১০০ বছৰ সম্পূৰ্ণ হোৱাৰ সময়ত যুৱপ্ৰজন্মৰ হাতত এখন ‘বিকশিত ভাৰত’ তুলি দিয়াৰ আত্মবিশ্বাস বৃদ্ধি পাব। আজিৰ কঠোৰ পৰিশ্ৰমৰ জৰিয়তেহে ভৱিষ্যত প্ৰজন্মৰ সপোন বাস্তৱায়িত হ’ব বুলি উল্লেখ কৰি তেওঁ ১৪০ কোটি ভাৰতীয়ৰ ঐক্যবদ্ধ শক্তিৰে দেশক নতুন উচ্চতালৈ লৈ যাবলৈ সকলোকে এই সংকল্পৰ অংশীদাৰ হ’বলৈ আহ্বান জনায়।
