মধ্যপ্ৰদেশৰ উজ্জয়িনীৰ এখন হোটেলত সংঘটিত হৈছে এক শোকাৱহ ঘটনা। হোটেলখনৰ ভূগৰ্ভস্থ আৱৰ্জনা নিষ্কাশন টেংকী (আণ্ডাৰগ্ৰাউণ্ড ভেট) পৰিষ্কাৰ কৰিবলৈ নামি বিষাক্ত গেছৰ কৱলত পৰি মৃত্যু হয় চাৰিগৰাকী কৰ্মচাৰীৰ।
উজ্জয়িনীৰ জিলা উপায়ুক্ত ৰোশন কুমাৰ সিঙে জানিবলৈ দিয়া মতে, দেওছ ৰোডস্থিত হোটেলখনত শনিবাৰে নিশা এই দুৰ্ঘটনা সংঘটিত হয়। হোটেল চৌহদত থকা এটা ভূগৰ্ভস্থ আৱৰ্জনা টেংকীত খাদ্যৰ অৱশিষ্ট আৰু অন্যান্য পেলনীয়া সামগ্ৰী পেলোৱা হৈছিল।
শনিবাৰে নিশা টেংকীটো পৰিষ্কাৰ কৰিবলৈ প্ৰথমে হোটেলখনৰ দুজন কৰ্মচাৰী ভিতৰলৈ নামি যায়। কিন্তু বহু সময় ধৰি তেওঁলোক ওপৰলৈ ঘূৰি নহাত আন দুজন কৰ্মচাৰীয়েও তেওঁলোকক বিচাৰি টেংকীটোৰ ভিতৰলৈ নামে। কিন্তু দুৰ্ভাগ্যজনকভাৱে তেওঁলোকো আৰু ওপৰলৈ উঠি আহিব নোৱাৰিলে।
উজ্জয়িনীৰ আৰক্ষী অধীক্ষক প্ৰদীপ শৰ্মাই জানিবলৈ দিয়া মতে, ভূগৰ্ভস্থ টেংকীটোলৈ নামি যোৱাৰ পথটো যথেষ্ট পিছল আছিল। প্ৰাথমিক অনুমান অনুসৰি, কৰ্মচাৰীসকলৰ ভৰি পিছলি যোৱাৰ ফলত তেওঁলোকে ওপৰলৈ উঠি আহিবলৈ সক্ষম হোৱা নাছিল। আনহাতে, দীৰ্ঘদিন ধৰি টেংকীটো পৰিষ্কাৰ নকৰাৰ ফলত ভিতৰত বিষাক্ত গেছ জমা হৈছিল বুলিও আৰক্ষীৰ একাংশই সন্দেহ প্ৰকাশ কৰিছে।
প্ৰাপ্ত তথ্য অনুসৰি, পিছত অগ্নিনিৰ্বাপক বাহিনীৰ কৰ্মীসকলে স্থানীয় লোকৰ সহযোগত নিশাই চাৰিওজন কৰ্মচাৰীক ভূগৰ্ভস্থ টেংকীটোৰ পৰা উদ্ধাৰ কৰি বাহিৰলৈ উলিয়াই আনে। তাৰ পিছতে তেওঁলোকক চিকিৎসালয়লৈ প্ৰেৰণ কৰা হয় যদিও চিকিৎসকে আটাইকেইজনকে মৃত ঘোষণা কৰে।
আৰক্ষীয়ে জনোৱা মতে, কৰ্মচাৰীসকলৰ মৃত্যুৰ প্ৰকৃত কাৰণ নিশ্চিত কৰিবলৈ মৃতদেহকেইটা মৰণোত্তৰ পৰীক্ষাৰ বাবে প্ৰেৰণ কৰা হৈছে। আৰক্ষীৰ আন এক সূত্ৰই প্ৰকাশ কৰা মতে, হোটেলখনৰ কৰ্মচাৰীৰ লগতে এটা ব্যক্তিগত চাফাই সংস্থাৰ কৰ্মচাৰীয়েও টেংকীটোত নামি কাম কৰিছিল। বৰ্তমান সংশ্লিষ্ট ব্যক্তিগত সংস্থাটোৰ কৰ্তৃপক্ষৰ সৈতে যোগাযোগ কৰাৰ চেষ্টা চলাই থকা হৈছে।
ইফালে, উজ্জয়িনীৰ একাংশ স্থানীয় বাসিন্দাই চহৰখনৰ হোটেলসমূহত কৰ্মচাৰীৰ সুৰক্ষাক লৈ উদ্বেগ প্ৰকাশ কৰিছে। তেওঁলোকৰ অভিযোগ অনুসৰি, পৰ্যাপ্ত সুৰক্ষা ব্যৱস্থা অবিহনেই কৰ্মচাৰীসকলক ভূগৰ্ভস্থ টেংকীটোত নমোৱা হৈছিল। আনকি কৰ্মচাৰীসকলে কোনো সুৰক্ষামূলক মাস্ক পৰিধান নকৰাকৈয়ে টেংকীটোৰ ভিতৰত প্ৰৱেশ কৰিছিল। ফলত ভিতৰত থকা বিষাক্ত গেছৰ প্ৰভাৱত কিছু সময়ৰ ভিতৰতে তেওঁলোক অচেতন হৈ পৰে।
উদ্ধাৰৰ পিছত চাৰিওজন কৰ্মচাৰীক চিপিআৰ (CPR) প্ৰদান কৰা হৈছিল যদিও তেওঁলোকৰ প্ৰাণ ৰক্ষা কৰিব পৰা নগ’ল।
এই শোকাৱহ ঘটনাই হোটেল আৰু অন্যান্য প্ৰতিষ্ঠানত কৰ্মৰত শ্ৰমিকসকলৰ সুৰক্ষা ব্যৱস্থা, বিশেষকৈ ভূগৰ্ভস্থ আৱৰ্জনা টেংকী আৰু বন্ধ স্থানত কাম কৰাৰ ক্ষেত্ৰত প্ৰয়োজনীয় সাৱধানতা অৱলম্বনৰ বিষয়টোক পুনৰ চৰ্চালৈ আনিছে।
