মিজোৰামে উন্নত হৃদৰোগ চিকিৎসাৰ ক্ষেত্ৰত এক গুৰুত্বপূৰ্ণ মাইলৰ খুঁটি অৰ্জন কৰিছে। আইজল চিভিল হাস্পতালত সফলভাৱে ৰাজ্যখনৰ প্ৰথমটো লিডলেছ পেচমেকাৰ সংস্থাপন কৰা হৈছে।
সোমবাৰে ডাঃ লনচি ভি. লালজাৰলিয়ানা আৰু ডাঃ ইছাক লাল্লাৱমকিমাৰ নেতৃত্বত হৃদৰোগ বিশেষজ্ঞৰ এটা দলে এই চিকিৎসা সম্পন্ন কৰে। কলকাতাৰ এপ’ল’ মাল্টিস্পেচিয়েলিটি হাস্পতালৰ ডাঃ উদয় শংকৰ দাসৰ নিৰ্দেশনাত এই প্ৰক্ৰিয়া সম্পন্ন কৰা হয়।
উল্লেখযোগ্য যে, ২০২৫ চনত ৰাজ্যখনৰ সৰ্ববৃহৎ চৰকাৰী হাস্পতালখনত কাৰ্ডিয়াক কেথেটাৰাইজেচন (Cath) লেবৰেটৰী স্থাপন কৰাৰ মাত্ৰ এবছৰৰ ভিতৰতে এই নতুন সফলতা লাভ কৰিছে মিজোৰামে।
পৰম্পৰাগত পেচমেকাৰৰ বিপৰীতে লিডলেছ পেচমেকাৰ কেথেটাৰৰ জৰিয়তে ফেম’ৰেল শিৰাৰে পোনপটীয়াকৈ হৃদযন্ত্ৰৰ ভিতৰত সংস্থাপন কৰা হয়। ইয়াৰ ফলত ছালৰ তলত অস্ত্ৰোপচাৰৰ জৰিয়তে পেচমেকাৰৰ বাবে পৃথক পকেট তৈয়াৰ কৰাৰ লগতে ৰক্তনলীৰ মাজেৰে লিড সংযোগ কৰাৰ প্ৰয়োজন নহয়। ফলত চিকিৎসা প্ৰক্ৰিয়াটো তুলনামূলকভাৱে কম আক্রমণাত্মক।
এই চিকিৎসাত ব্যৱহাৰ কৰা Abbott AVEIR VR লিডলেছ পেচমেকাৰৰ বেটাৰীৰ কাৰ্যক্ষমতা ১৮–২১ বছৰতকৈ অধিক বুলি জানিব পৰা গৈছে। আনহাতে, বহুতো পৰম্পৰাগত পেচমেকাৰৰ বেটাৰী সাধাৰণতে প্ৰায় ৯–১১ বছৰলৈকে চলে।
৬৭ বছৰীয়া এগৰাকী পেঞ্চনাৰক Mizo Universal Health Care Scheme (MUHCS)ৰ অধীনত এই চিকিৎসা প্ৰদান কৰা হয়।
স্বাস্থ্য মন্ত্ৰী লালৰিনপুইীয়ে এই সফলতাক আইজল চিভিল হাস্পতালত হৃদৰোগ চিকিৎসা সেৱা শক্তিশালী কৰাৰ দিশত এক গুৰুত্বপূৰ্ণ পদক্ষেপ বুলি অভিহিত কৰে। লগতে মিজোৰামৰ ৰোগীসকলৰ বাবে ৰাজ্যখনৰ ভিতৰতে উন্নত হৃদৰোগ চিকিৎসা লাভৰ সুবিধা অধিক সম্প্ৰসাৰিত হ’ব বুলি আশা প্ৰকাশ কৰে।
মিজোৰামত প্ৰথমবাৰৰ বাবে লিডলেছ পেচমেকাৰ সংস্থাপনৰ এই সফলতাই ৰাজ্যখনৰ চৰকাৰী স্বাস্থ্য ব্যৱস্থাত বিশেষায়িত হৃদৰোগ চিকিৎসাৰ সক্ষমতা অধিক শক্তিশালী কৰিলে।
