মূল্যবৃদ্ধি নিয়ন্ত্ৰণ আৰু বজাৰত যোগান সহজলভ্য কৰি ৰখাৰ উদ্দেশ্যে কেন্দ্ৰীয় চৰকাৰে সংৰক্ষিত মজুত (Buffer Stock)ৰ পৰা পিয়াঁজ মুকলি কৰাৰ প্ৰক্ৰিয়া অধিক সম্প্ৰসাৰিত কৰিছে। উপভোক্তা পৰিক্ৰমা, খাদ্য আৰু ৰাজহুৱা বিতৰণ মন্ত্ৰালয়ে ৰে’লৱে আৰু পথ পৰিবহণ দুয়োটা মাধ্যমৰ জৰিয়তে দেশৰ বিভিন্ন প্ৰান্তৰ প্ৰধান বজাৰসমূহলৈ পিয়াঁজ সৰবৰাহ ক্ষিপ্ৰতৰ কৰি তুলিছে। বিশেষকৈ মহাৰাষ্ট্ৰৰ নাছিকৰ দৰে প্ৰধান উৎপাদনকাৰী অঞ্চলৰ পৰা ৰে’ল মন্ত্ৰালয়ৰ সহযোগত ‘কাণ্ডা এক্সপ্ৰেছ’ (Kanda Express) নামৰ বিশেষ মালবাহী ৰে’লৰ জৰিয়তে বৃহৎ পৰিমাণৰ পিয়াঁজ দেশৰ বিভিন্ন উপভোগ কেন্দ্ৰলৈ প্ৰেৰণ কৰা হৈছে।
এই পদক্ষেপৰ অধীনত ৰাষ্ট্ৰীয় সমবায় উপভোক্তা ফেডাৰেচন (NCCF) আৰু ৰাষ্ট্ৰীয় কৃষি সমবায় বিপণন ফেডাৰেচন (NAFED)-ৰ জৰিয়তে খুচুৰা বজাৰত সুলভ মূল্যত পিয়াঁজ যোগান ধৰা হৈছে। মোবাইল ভেন, কেন্দ্ৰীয় ভাণ্ডাৰ, সফল (Safal) আউলেট তথা ই-কমাৰ্ছ প্লেটফৰ্মসমূহৰ জৰিয়তে ৰেহাই মূল্যত সাধাৰণ উপভোক্তাসকলক পিয়াঁজ উপলব্ধ কৰোৱাৰ ব্যৱস্থা কৰা হৈছে। বৃহৎ মাত্ৰাত ৰে’লৰ জৰিয়তে পৰিবহণ কৰাৰ ফলত যোগান ব্যৱস্থা ক্ষিপ্ৰ হোৱাৰ লগতে পৰিবহণ ব্যয় যথেষ্ট হ্ৰাস পাইছে, যাৰ ফলত বজাৰত পিয়াঁজৰ পাইকাৰী আৰু খুচুৰা দাম নিয়ন্ত্ৰণত ৰখাটো সম্ভৱ হৈছে।
উৎসৱৰ বতৰ আৰু নতুন শস্য বজাৰলৈ অহাৰ মাজৰ সময়ছোৱাত পিয়াঁজৰ বজাৰত যাতে কোনো ধৰণৰ কৃত্ৰিম নাটনি বা অস্বাভাৱিক মূল্যবৃদ্ধি নহয়, তাৰ বাবেই চৰকাৰে এই সময়োচিত পদক্ষেপ গ্ৰহণ কৰিছে। কৃষকসকলৰ উচিত মূল্য সুৰক্ষিত ৰখাৰ সমান্তৰালকৈ সাধাৰণ উপভোক্তাসকলক সকাহ দিয়াৰ লক্ষ্যৰে চৰকাৰে সমগ্ৰ দেশৰ বজাৰ মূল্যৰ ওপৰত তীক্ষ্ণ নজৰ ৰাখিছে আৰু প্ৰয়োজন অনুসৰি বিভিন্ন ৰাজ্যলৈ সংৰক্ষিত পিয়াঁজৰ যোগান অব্যাহত ৰাখিব বুলি স্পষ্ট কৰি দিছে।
