ৰাষ্ট্ৰীয় স্বয়ংসেৱক সংঘ (RSS)-ৰ মুৰব্বী মোহন ভাগৱতে বৈচিত্ৰ্যক সন্মান আৰু উদযাপন কৰাৰ লগতে সমাজত ঐক্যৰ ভাৱনা অধিক শক্তিশালী কৰাৰ আহ্বান জনাইছে।
নিউয়ৰ্কত অনুষ্ঠিত ‘ইউনিভাৰ্চেল ৱাননেছ চেলিব্ৰেচন’ অনুষ্ঠানত ৬,০০০ৰো অধিক ভাৰতীয়-আমেৰিকান আৰু বিভিন্ন ধৰ্মীয় সম্প্ৰদায়ৰ নেতাক সম্বোধন কৰি ভাগৱতে কয় যে ‘বৈচিত্ৰ্যৰ মাজত ঐক্য’ ভাৰতৰ ডি এন এৰ সৈতে জড়িত।
মেডিছন স্কোৱেৰ গাৰ্ডেনৰ ইনফ’ছিছ থিয়েটাৰত অনুষ্ঠিত অনুষ্ঠানটোত ভাষণ দি তেওঁ কয় যে বৈচিত্ৰ্যক কেৱল গ্ৰহণ কৰাই নহয়, তাক সন্মান আৰু উদযাপন কৰাও প্ৰয়োজন। একে সময়তে সমাজৰ প্ৰতিজন লোকক ইজনে-সিজনক সহায় কৰাৰ লগতে সমাজৰ প্ৰতি নিজৰ দায়িত্ব পালন কৰিবলৈও তেওঁ আহ্বান জনায়।
আমেৰিকাৰ বহুত্ববাদ আৰু ভাৰতৰ ‘বৈচিত্ৰ্যৰ মাজত ঐক্য’ৰ ধাৰণাৰ মাজত তুলনা কৰি ভাগৱতে কয় যে বৈচিত্ৰ্যৰ মাজতো কেনেদৰে একতাৰ ভাৱনা অটুট ৰাখিব পাৰি, সেই বাৰ্তা সমগ্ৰ বিশ্বৰ আগত দাঙি ধৰাৰ ক্ষেত্ৰত ভাৰতৰ এক বিশেষ ভূমিকা আছে।
তেওঁ কয়, “আমি এক। আৰু এই বৈচিত্ৰ্যই সেই ঐক্যক অধিক সৌন্দৰ্যৰে সজাই তোলে।”
আমেৰিকাত বসবাস কৰা ভাৰতীয় প্ৰবাসীসকলক তেওঁ তেওঁলোকৰ ‘কৰ্মভূমি’ৰ প্ৰতি দায়বদ্ধ হৈ থাকিবলৈও আহ্বান জনায়। যিখন দেশত তেওঁলোকে বাস কৰে আৰু কৰ্মজীৱন অতিবাহিত কৰে, সেই দেশৰ প্ৰতি তেওঁলোকৰ দায়িত্ব প্ৰথমে পালন কৰা উচিত বুলি ভাগৱতে উল্লেখ কৰে।
তেওঁ কয়, ভাৰত তেওঁলোকৰ ‘জন্মভূমি’ হৈ থাকিলেও আমেৰিকাই তেওঁলোকৰ কৰ্মভূমি। সেয়ে কৰ্মভূমিৰ প্ৰতি দায়িত্ব পালন কৰাৰ লগতে ভাৰতৰ পৰা লাভ কৰা ঐক্য, সহাৱস্থান আৰু বহনক্ষম জীৱনধাৰাৰ মূল্যবোধো আগবঢ়াই নিয়া উচিত।
নিউয়ৰ্কৰ এই অনুষ্ঠানটোত আমেৰিকাৰ ৩৯খন ৰাজ্য আৰু ৮৫৩খন চহৰৰ লোকৰ অংশগ্ৰহণ ঘটে। ইয়াৰ উপৰি বিভিন্ন বিশ্ববিদ্যালয়ৰ ২৫০ৰো অধিক শিক্ষাৰ্থী আৰু প্ৰায় ২৫০টা সংগঠনৰ প্ৰতিনিধিও অনুষ্ঠানটোত উপস্থিত থাকে।
মোহন ভাগৱতৰ পূৰ্বে ভাষণ প্ৰদান কৰা বিভিন্ন ধৰ্মীয় নেতাসকলেও ঐক্য, বৈচিত্ৰ্য, দয়া, সহানুভূতি আৰু পৰস্পৰক সহায় কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে।
