ভাৰতৰ বৈদেশিক মুদ্ৰাৰ ভাণ্ডাৰে নতুন অভিলেখ সৃষ্টি কৰিছে। আমেৰিকান ডলাৰৰ প্ৰবাহ বৃদ্ধি আৰু মূলধন আকৰ্ষণৰ বাবে ভাৰতীয় ৰিজাৰ্ভ বেংকে (RBI) গ্ৰহণ কৰা শেহতীয়া পদক্ষেপৰ ফলত দেশৰ ফৰেক্স ৰিজাৰ্ভ উল্লেখযোগ্যভাৱে বৃদ্ধি পাইছে।
RBIয়ে শুকুৰবাৰে প্ৰকাশ কৰা তথ্য অনুসৰি, ২১ আগষ্টত সমাপ্ত সপ্তাহটোত ভাৰতৰ বৈদেশিক মুদ্ৰাৰ ভাণ্ডাৰ ১২.৪ বিলিয়ন ডলাৰ বৃদ্ধি পাই ৭২৯.৩ বিলিয়ন ডলাৰত উপনীত হয়। ইয়াৰ পূৰ্বে চলিত বছৰৰ ফেব্ৰুৱাৰীত ৭২৮.৫ বিলিয়ন ডলাৰৰ অভিলেখ গঢ়িছিল।
যোৱা জুন মাহৰ আৰম্ভণিতে RBIয়ে বিদেশত থকা ভাৰতীয়সকলৰ পৰা ধন আকৰ্ষণৰ উদ্দেশ্যে বিশেষ জমা আঁচনিকে ধৰি কেইবাটাও পদক্ষেপ গ্ৰহণ কৰিছিল। এই ব্যৱস্থাসমূহৰ জৰিয়তে ২১ আগষ্টলৈকে প্ৰায় ৭২.৮ বিলিয়ন ডলাৰৰ মূলধন প্ৰবাহ ঘটিছে।
ফৰেক্স ৰিজাৰ্ভ বৃদ্ধিয়ে অৱশ্যে ভাৰতীয় টকাৰ ওপৰত চাপ হ্ৰাস কৰাত RBIক অধিক শক্তি প্ৰদান কৰিছে। মে’ মাহত সৰ্বকালৰ নিম্নস্তৰ স্পৰ্শ কৰাৰ পিছত টকাই প্ৰায় ১.৭ শতাংশ পুনৰুদ্ধাৰ কৰিছে যদিও উচ্চ তেলৰ মূল্য আৰু আমদানিৰ ওপৰত ভাৰতৰ অধিক নিৰ্ভৰশীলতাৰ বাবে টকাৰ ওপৰত চাপ অব্যাহত আছে।
অৱশ্যে এইদৰে বৈদেশিক ধন আকৰ্ষণ কৰাটো RBIৰ বাবে ব্যয়বহুল হৈ পৰিছে। বিশেষকৈ প্ৰবাসী ভাৰতীয়সকলৰ জমা আঁচনিৰ অধীনত বেংকসমূহৰ হেজিং ব্যয় RBIয়ে বহন কৰিবলগীয়া হৈছে। বিশেষজ্ঞসকলৰ মতে, এই ব্যৱস্থাৰ ফলত দেশৰ বাবে বছৰি প্ৰায় ৫.৭ বিলিয়ন ডলাৰৰ ‘কেৰী কষ্ট’ হ’ব পাৰে।
অৰ্থাৎ, ফৰেক্স ৰিজাৰ্ভত অভিলেখ বৃদ্ধি পোৱাই ভাৰতৰ বাহ্যিক বিত্তীয় স্থিতি শক্তিশালী কৰিছে যদিও টকা স্থিৰ ৰখাৰ বাবে এই কৌশলৰ ব্যয়ো যথেষ্ট বৃদ্ধি পাইছে।
