বিধ্বংসী বান আৰু ভূমিস্খলনে জুৰুলা কৰা নেপালে অৱশেষত বিদেশী দেশসমূহৰ পৰা বিশেষ কাৰিকৰী সহায় বিচাৰিছে। ইয়াৰ পূৰ্বে বিভিন্ন দেশৰ পৰা আগবঢ়োৱা বহল পৰিসৰৰ বিদেশী সাহায্য গ্ৰহণত অনীহা প্ৰকাশ কৰা নেপালে এতিয়া উদ্ধাৰ অভিযানৰ কিছুমান বিশেষ ক্ষেত্ৰত বিদেশী বিশেষজ্ঞৰ সহায় বিচৰাৰ সিদ্ধান্ত লৈছে।
চীনৰ সীমান্তৱৰ্তী হিমালয় অঞ্চলত সংঘটিত হিমবাহ খহি পৰাৰ ঘটনাৰ পিছতে সৃষ্টি হোৱা প্ৰচণ্ড বানত নেপাল আৰু চীনৰ তিব্বত অঞ্চলত ব্যাপক ক্ষতিসাধন হৈছে। বুধবাৰে হিমবাহ খহি পৰাৰ ফলত পাহাৰীয়া নদীসমূহেৰে শিল, বৰফ, বোকা আৰু ধ্বংসাৱশেষৰ বিশাল সোঁত নামি আহে। ইয়াৰ ফলত বহু ঠাইত দলং ধ্বংস হোৱাৰ লগতে যাতায়াত আৰু যোগাযোগ ব্যৱস্থাও ব্যাহত হৈছে।
এই পৰ্যন্ত দুৰ্যোগটোত নেপাল আৰু তিব্বতত প্ৰায় ৬০০ লোকৰ মৃত্যু হৈছে। আনহাতে, ২,৪০০ৰো অধিক লোক এতিয়াও সন্ধানহীন হৈ আছে। বোকা আৰু ধ্বংসাৱশেষৰ মাজত উদ্ধাৰকাৰী দলসমূহে অব্যাহত ৰাখিছে সন্ধান অভিযান। জীৱিত লোক উদ্ধাৰৰ আশাত বিপজ্জনক পৰিস্থিতিৰ মাজতো অভিযান চলি আছে।
নেপালৰ বৈদেশিক মন্ত্ৰী ছিছিৰ খানালে জনোৱা মতে, সাধাৰণ অনুসন্ধান আৰু উদ্ধাৰ অভিযান চলাব পৰাকৈ দেশখনৰ নিজা সক্ষমতা আছে। কিন্তু কিছুমান অতি বিশেষ কামৰ বাবে প্ৰয়োজনীয় কাৰিকৰী জ্ঞান আৰু সা-সঁজুলি নেপালৰ পৰ্যাপ্ত পৰিমাণে নাই।
সেয়েহে নেপালে বিদেশী সহায় বিচাৰিছে সুৰংগত আৱদ্ধ লোকক উদ্ধাৰ, ধ্বংস হোৱা দলং আৰু যাতায়াত ব্যৱস্থা পুনৰুদ্ধাৰ, যোগাযোগ সংযোগ পুনৰ স্থাপন, মৃতদেহ চিনাক্তকৰণ, DNA পৰীক্ষা আৰু মৃতদেহ দীৰ্ঘদিন সংৰক্ষণৰ দৰে বিশেষ ক্ষেত্ৰত।
খানালে কয় যে এই বিশেষ সেৱা আৰু কাৰিকৰী সহায়ৰ বাবে ইতিমধ্যে সংশ্লিষ্ট দেশসমূহৰ ওচৰত অনুৰোধ জনোৱা হৈছে। অৰ্থাৎ, নেপালৰ নিজা উদ্ধাৰ ব্যৱস্থা অব্যাহত ৰখাৰ লগতে এতিয়া জটিল আৰু বিশেষায়িত অভিযানত বিদেশী কাৰিকৰী সহায় লোৱাৰ পথ মুকলি হৈছে।
