সোণাৰিত বানাক্ৰান্ত ৰাইজৰ সাহায্যৰ দাবীত অনুষ্ঠিত জনসভাত অংশগ্ৰহণ কৰি ৰাজ্য চৰকাৰৰ বিৰুদ্ধে সৰৱ হৈ পৰিল শিৱসাগৰৰ বিধায়ক অখিল গগৈ। বানত ক্ষতিগ্ৰস্ত প্ৰতিটো পৰিয়ালক তাৎক্ষণিকভাৱে ১০ লাখ টকাৰ সাহায্য প্ৰদানৰ দাবী জনালে বিধায়কগৰাকীয়ে।
বানৰ বিভীষিকাৰ ৩৫ দিন পাৰ হৈ যোৱাৰ পাছতো বহু বানাক্ৰান্তই পৰ্যাপ্ত সাহায্য লাভ নকৰাৰ অভিযোগ উত্থাপন কৰি অখিল গগৈয়ে চৰকাৰক তীব্ৰ সমালোচনা কৰে। তেওঁ প্ৰশ্ন কৰে, “৩৫ দিনে যদি তাৎক্ষণিক সাহায্য নিদিয়ে, ৩৫ বছৰৰ পাছত দিব নেকি?”
জিলা আয়ুক্তৰ সৈতে হোৱা বাক-বিতণ্ডাৰ প্ৰসংগতো নিজৰ স্থিতি স্পষ্ট কৰি অখিল গগৈয়ে কয় যে বানাক্ৰান্তৰ স্বাৰ্থত তেওঁ অলপ কঠোৰ ভাষাত কথা কৈছিল। “আমি ডিচিৰ ওচৰলৈ যাব নালাগে। ডিচিয়েহে আমাক ছাৰ বুলি ক’ব লাগে। মই বেয়া ব্যৱহাৰ কৰা নাই, অলপ টানকৈহে কৈছিলোঁ বানাক্ৰান্তৰ স্বাৰ্থত,” বুলি মন্তব্য কৰে তেওঁ।
বানাক্ৰান্ত লোকসকলে ন্যায্য সাহায্য লাভ নকৰালৈকে আন্দোলন অব্যাহত ৰখাৰ হুংকাৰ দি অখিল গগৈয়ে কয়, “বানাক্ৰান্তই যেতিয়ালৈকে সহায় নাপাব, তেতিয়ালৈকে মই ক্ষান্ত নহওঁ।”
বানাক্ৰান্ত প্ৰতিটো পৰিয়ালক ১০ লাখ টকাৰ সাহায্য প্ৰদানৰ দাবীক কেন্দ্ৰ কৰি আগন্তুক দিনত আন্দোলন অধিক তীব্ৰ কৰাৰ ইংগিত দিয়ে বিধায়কগৰাকীয়ে।
