জ্ঞানেশ কুমাৰৰ পদত্যাগৰ দাবীত প্ৰতিবাদ কৰাৰ অভিযোগত অভিনেতা ইমৰান খানক দিয়া ‘ভাৰত ত্যাগ’ৰ জাননীক প্ৰত্যাহ্বান; ২ নৱেম্বৰলৈকে কোনো ব্যৱস্থা গ্ৰহণ নকৰাৰ আশ্বাস চৰকাৰৰ

অভিনেতা ইমৰান খানে তেওঁৰ বিৰুদ্ধে জাৰি কৰা ‘ভাৰত ত্যাগ’ৰ জাননীক প্ৰত্যাহ্বান জনাই অন্তৱৰ্তীকালীন সকাহ লাভ কৰিছে। অহা ২ নৱেম্বৰত গোচৰটোৰ পৰৱৰ্তী শুনানি অনুষ্ঠিত নোহোৱালৈকে তেওঁৰ বিৰুদ্ধে কোনো ব্যৱস্থা গ্ৰহণ কৰা নহ’ব বুলি বোম্বে উচ্চ ন্যায়ালয়ক আশ্বাস দিছে চৰকাৰে।

আমেৰিকাৰ নাগৰিক তথা অ’ভাৰছিজ চিটিজেন অৱ ইণ্ডিয়া (OCI) কাৰ্ডধাৰী অভিনেতাগৰাকীক অহা ২৮ অক্টোবৰৰ ভিতৰত ভাৰত ত্যাগ কৰিবলৈ নিৰ্দেশ দি বিদেশী আঞ্চলিক পঞ্জীয়ন বিষয়াৰ কাৰ্যালয়ে (FRRO) জাননী জাৰি কৰিছিল। এই জাননীক প্ৰত্যাহ্বান জনাই তেওঁ আদালতৰ দ্বাৰস্থ হৈছিল।

অভিযোগ অনুসৰি, যোৱা ১০ অক্টোবৰত দিল্লীত ‘ককৰোচ জনতা পাৰ্টি’ৰ প্ৰতিবাদৰ প্ৰতি সংহতি প্ৰকাশ কৰি আয়োজন কৰা এক প্ৰতিবাদী কাৰ্যসূচীত ইমৰান খানে অংশগ্ৰহণ কৰিছিল। মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত এই প্ৰতিবাদ সাব্যস্ত কৰা হৈছিল। তেওঁৰ বিৰুদ্ধে একপক্ষীয়ভাৱে কাম কৰা আৰু ভোটাৰ তালিকাৰ বিশেষ নিবিড় সংশোধন (SIR) প্ৰক্ৰিয়াত অনিয়ম সংঘটিত কৰাৰ অভিযোগ উত্থাপন কৰা হৈছিল।

ইফালে, বিজেপি নেতা কিৰীট সোমাইয়াই অভিনেতাগৰাকীয়ে আমেৰিকাৰ নাগৰিক হোৱা সত্ত্বেও প্ৰতিবাদত অংশগ্ৰহণ কৰি নিয়ম উলংঘা কৰাৰ অভিযোগ উত্থাপন কৰি আৰক্ষীৰ ওচৰত অভিযোগ দাখিল কৰিছিল। পৰৱৰ্তী সময়ত এই অভিযোগ বিদেশী আঞ্চলিক পঞ্জীয়ন বিষয়াৰ কাৰ্যালয়লৈ প্ৰেৰণ কৰা হয়। ইয়াৰ পিছতে কাৰ্যালয়টোৱে Immigration and Foreigners Act, 2025ৰ অধীনত অভিনেতাগৰাকীৰ বিৰুদ্ধে দেশৰ পৰা বহিষ্কাৰৰ জাননী জাৰি কৰে।

উল্লেখ্য যে, উক্ত আইনৰ ৭ নং ধাৰা অনুসৰি, ভাৰত চৰকাৰে দেশত বিদেশী নাগৰিকৰ প্ৰৱেশ, প্ৰস্থান, অৱস্থান আৰু চলাচল নিয়ন্ত্ৰণ, সীমিত অথবা নিষিদ্ধ কৰাৰ উদ্দেশ্যে আদেশ, নিৰ্দেশ বা নিৰ্দেশনা জাৰি কৰিব পাৰে।

NKTV Digital
Author: NKTV Digital

Popular

More like this
Related

ভুলবশতঃ বাংলাদেশৰ সীমান্তত প্ৰৱেশ BSF জোৱানৰ! সশস্ত্ৰ অৱস্থাত জোৱানক আটক BGBৰ, ভাৰতলৈ ঘূৰাই অনাৰ বাবে চলিছে ফ্লেগ মিটিং

ভুলবশতঃ আন্তঃৰাষ্ট্ৰীয় সীমান্ত অতিক্ৰম কৰি বাংলাদেশত প্ৰৱেশ কৰা ভাৰতীয়...

IPLৰ পৰা অৱসৰ মহেন্দ্ৰ সিং ধোনিৰ! ২০২৭ৰ পৰা CSKৰ মেণ্টৰৰ দায়িত্বত ‘থালা’

ভাৰতীয় ক্ৰিকেটৰ এটা সোণালী অধ্যায়ৰ অৱসান ঘটিল। অৱশেষত ইণ্ডিয়ান...