দীৰ্ঘদিন ধৰি ভাৰতে যি প্ৰতীক্ষা কৰি আছিল, সেই সময় এতিয়া সমাগত! আমেৰিকাই ভাৰতৰ ওপৰত আৰোপ কৰা টেৰিফ (শুল্ক) সোনকালে প্ৰত্যাহাৰ কৰিব পাৰে। বৃহস্পতিবাৰে ভাৰতৰ মুখ্য অৰ্থনৈতিক উপদেষ্টা ভি. অনন্ত নাগেশ্বৰণে কয় যে, ভাৰতৰ পৰা আমেৰিকালৈ কৰা কিছু আমদানিৰ ওপৰত আৰোপ কৰা বৰ্ধিত শুল্ক, যি ৫০ শতাংশ পৰ্যন্ত আছিল, সোনকালে প্ৰত্যাহাৰ কৰা হ’ব পাৰে। এই কথাই ইংগিত দিয়ে যে, দুয়োখন দেশৰ মাজত চলি থকা আলোচনা সফল হ’ব পাৰে আৰু বাণিজ্যিক নিষেধাজ্ঞাত শিথিলতা আহিব পাৰে।
কলকাতাত মাৰ্চেণ্টছ চেম্বাৰ অৱ কমাৰ্চ এণ্ড ইণ্ডাষ্ট্ৰীৰ এক কাৰ্যসূচীত মুখ্য অৰ্থনৈতিক উপদেষ্টাজনে (CEA) জনাইছে যে, প্ৰথমে ভাৰতৰ ওপৰত ২৫ শতাংশ শুল্ক আৰোপ কৰা হৈছিল, তাৰ ওপৰত আৰু ২৫ শতাংশ দণ্ডমূলক শুল্ক যোগ কৰা হৈছিল, যাৰ ফলত মুঠ শুল্ক ৫০ শতাংশ হৈছিল। এই দণ্ডমূলক শুল্ক ভূ-ৰাজনৈতিক উত্তেজনাৰ বাবে আৰোপ কৰা হৈছিল। কিন্তু শেহতীয়া কিছু ঘটনা আৰু আলোচনাৰ পৰিপ্ৰেক্ষিতত আশা কৰা হৈছে যে, ৩০ নৱেম্বৰৰ পিছত এই অতিৰিক্ত শুল্ক প্ৰত্যাহাৰ কৰা হ’ব পাৰে।
CEAয়ে আৰু কৈছে যে আগন্তুক কেইমাহমানৰ ভিতৰত দুয়োখন দেশৰ মাজত পাৰস্পৰিক শুল্কৰ ওপৰত সমাধানসূত্ৰ ওলোৱাৰ সম্ভাৱনা আছে। ইয়াৰ ফলত ব্যৱসায়-বাণিজ্যত সুবিধা হ’ব আৰু দুয়োখন দেশৰ মাজত অৰ্থনৈতিক সম্পৰ্ক অধিক শক্তিশালী হ’ব।
CEA-এ জনাইছে যে, ভাৰতৰ ৰপ্তানি অবিৰতভাৱে বৃদ্ধি পাইছে। বৰ্তমান ভাৰতৰ বাৰ্ষিক ৰপ্তানি প্ৰায় ৮৫০ বিলিয়ন আমেৰিকান ডলাৰ, যাক আগন্তুক কেইবছৰৰ ভিতৰত ১ ট্ৰিলিয়ন ডলাৰলৈ বৃদ্ধি কৰাৰ লক্ষ্য ৰখা হৈছে। ইয়েই ভাৰতৰ শক্তিশালী আৰু মুকলি অৰ্থনীতিৰ প্ৰতিফলন ঘটায়।
ৰাষ্ট্ৰপতি ট্ৰাম্পে আমেৰিকাৰ সুৰক্ষা আৰু অৰ্থনৈতিক স্বাৰ্থৰ কথা বিবেচনা কৰি ১৯৭৭ৰ এখন আইন, ইণ্টাৰনেচনেল ইমাৰ্জেন্সী ইকনমিক পাৱাৰ এৰ্ট (IEEPA),ৰ অধীনত ভাৰতকে ধৰি কেইবাখনো দেশৰ ওপৰত বৰ্ধিত শুল্ক আৰোপ কৰিছিল। পূৰ্বে ভাৰতৰ ওপৰত ২৫ শতাংশ শুল্ক আৰোপ কৰা হৈছিল, যি পিছলৈ বৃদ্ধি কৰি ৫০ শতাংশ কৰা হৈছিল। এই শুল্ক আমেৰিকাত বিক্ৰী হোৱা সকলো ভাৰতীয় পণ্যৰ ওপৰত প্ৰযোজ্য হৈছিল।
