ভাৰতীয় ষ্টেট বেংক (SBI)-এ বুধবাৰে প্ৰকাশ কৰা অনুসৰি, ডাৰ্ক ৱেবত ফাদিল হোৱা বুলি সন্দেহ কৰা তথ্যৰ প্ৰাৰম্ভিক বিশ্লেষণত ৩,৮৯৭জন গ্ৰাহকৰ ব্যক্তিগত তথ্য চিনাক্ত কৰা হৈছে। বেংকটোৱে এই ঘটনাৰ সন্দৰ্ভত ইতিমধ্যে এক বিস্তৃত তদন্ত আৰম্ভ কৰিছে বুলি সংবাদ সংস্থা ANI-এ প্ৰকাশ কৰিছে।
প্ৰতিবেদন অনুসৰি, যোৱা ১৬ অক্টোবৰত বেংকটোৱে নিজৰ থ্ৰেট ইণ্টেলিজেন্স সেৱা প্ৰদানকাৰী প্ৰতিষ্ঠান, ডিফেন্স চাইবাৰ এজেঞ্চী আৰু CERT-Inৰ পৰা লাভ কৰা তথ্যৰ জৰিয়তে ডাৰ্ক ৱেবত গ্ৰাহকৰ তথ্য ফাদিল হোৱাৰ সন্দেহৰ বিষয়ে অৱগত হৈছিল।
ফাদিল হোৱা বুলি সন্দেহ কৰা তথ্যসমূহত গ্ৰাহকৰ নাম, জন্মৰ তাৰিখ, লিংগ, পঞ্জীয়নভুক্ত ম’বাইল নম্বৰ, ই-মেইল আইডি আৰু বাসগৃহৰ ঠিকনাকে ধৰি বিভিন্ন ব্যক্তিগত তথ্য অন্তৰ্ভুক্ত আছিল বুলি জানিব পৰা গৈছে।
ইয়াৰ উপৰি, বেংকৰ শাখাৰ বিৱৰণ, গ্ৰাহকৰ তথ্য ফাইল (CIF) নম্বৰ, লীড আইডি, ঋণ আৰু গ্ৰাহক-সংগ্ৰহৰ সৈতে জড়িত তথ্যৰ মেটাডাটা তথা আনুষংগিক ফাইলসমূহো উক্ত তথ্যৰ ভিতৰত আছিল।
প্ৰাৰম্ভিক বিশ্লেষণৰ অংশ হিচাপে বেংকটোৱে ডাৰ্ক ৱেবত উপলব্ধ প্ৰায় ৩ লাখ ৭৫ হাজাৰ তথ্যৰ অভিলেখ পৰীক্ষা কৰে। ইয়াৰ ভিতৰত ৩,৮৯৭টা গ্ৰাহকৰ অভিলেখত ব্যক্তিগতভাৱে চিনাক্ত কৰিব পৰা তথ্য (PII) থকাৰ কথা চিনাক্ত কৰা হয়।
তথ্য ফাদিলৰ সন্দৰ্ভত সতৰ্কবাণী লাভ কৰাৰ পাছতে বেংকটোৱে তৎকালীনভাৱে চাইবাৰ ঘটনা সঁহাৰি আৰু ক্ষতি নিয়ন্ত্ৰণৰ প্ৰট’কল সক্ৰিয় কৰে বুলি জানিবলৈ দিয়ে।
ঘটনাটোৰ প্ৰকৃতি আৰু ইয়াৰ প্ৰভাৱৰ পৰিসৰ নিৰ্ধাৰণ কৰিবলৈ CERT-Inৰ দ্বাৰা তালিকাভুক্ত এটা স্বতন্ত্ৰ চাইবাৰ সুৰক্ষা সংস্থাক নিযুক্তি দিয়া হৈছে। সংস্থাটোৱে এই সন্দৰ্ভত এক বিস্তৃত মূল্যায়ন আৰু তদন্ত চলাব।
বেংকটোৱে লগতে স্পষ্ট কৰি দিয়ে যে এই ঘটনাৰ ফলত ইয়াৰ মূল ব্যৱসায়িক কাৰ্যকলাপ, বিত্তীয় প্ৰদৰ্শন অথবা ব্যৱসায়ৰ ধাৰাবাহিকতাৰ ওপৰত কোনো উল্লেখযোগ্য প্ৰভাৱ পৰা নাই। বেংকৰ মূল সেৱাসমূহ কোনো বাধা নোহোৱাকৈ স্বাভাৱিকভাৱে চলি আছে বুলিও প্ৰকাশ কৰে।
উল্লেখ্য যে, ভাৰতীয় ৰিজাৰ্ভ বেংকে (RBI) বিত্তীয় স্থিৰতাত প্ৰভাৱ পেলাব পৰা চাইবাৰ বিপদৰ বিষয়ে ঋণ প্ৰদানকাৰী প্ৰতিষ্ঠানসমূহক বাৰে বাৰে সতৰ্ক কৰি আহিছে।
ব্লুমবাৰ্গৰ এক প্ৰতিবেদন অনুসৰি, কেন্দ্ৰীয় বেংকে সমীক্ষা চলোৱা ৪৩টা বেংক আৰু নন-বেংকিং বিত্তীয় ঋণদাতা প্ৰতিষ্ঠানৰ প্ৰায় এক-তৃতীয়াংশই পূৰ্বৰ বছৰৰ তুলনাত চাইবাৰ বিপদৰ মাত্ৰা মধ্যমীয়া অথবা যথেষ্ট বৃদ্ধি পোৱা বুলি প্ৰকাশ কৰিছে।
