মেঘালয়ত ট্ৰেকিঙৰ সময়ত তেওঁৰ কেমেৰাত ধৰা পৰিছিল সোনম আৰু ৰাজা। কেৱল তেওঁলোক দুজনেই নহয়, ৰাজাৰ তিনি ‘হত্যাকাৰী’ৰ ছবিও ধৰা পৰিছিল। এইবাৰ মেঘালয় আৰক্ষীয়ে সেই ভ্লগাৰজনক তলব কৰিছে। এই ঘটনাৰ সন্দৰ্ভত অধিক তথ্য আহৰণৰ বাবে জেৰা কৰিবলৈ বিচাৰে। কিন্তু আৰক্ষীৰ খবৰ অনুসৰি, ভ্লগাৰজনৰ সৈতে যোগাযোগ কৰা হৈছে যদিও কোনো উত্তৰ পোৱা নাই।
ৰাজা ৰঘুবংশী হত্যাকাণ্ডৰ বাবে যেতিয়া হৈ-চৈ চলিছিল, তেতিয়া প্ৰথমে এটা ভিডিঅ’ প্ৰকাশ পায়। ভিডিঅ’টোত ৰাজা আৰু তেওঁৰ পত্নী সোনমক দেখা গৈছিল। তেওঁলোকে ট্ৰেকিং কৰি উঠি আছিল। দেব সিং নামৰ এজন ভ্লগাৰে ভিডিঅ’টো বনাইছিল। পাহাৰী জংঘলৰ মাজেৰে ট্ৰেকিঙৰ সেই ভিডিঅ’ত ৰাজা আৰু সোনমক দেখা গৈছিল। সোনম আগত আছিল। তেওঁ বগা টি-চাৰ্ট পিন্ধিছিল, হাতত এডাল লাঠি আৰু কান্ধত এটা সৰু ক’লা বেগ আছিল। তদুপৰি, তেওঁৰ হাতত এটা পলিথিনৰ পেকেট আছিল, য’ত ৰেইন কোট আছিল বুলি তদন্তকাৰী সংস্থাই জানিব পাৰিছে। সোনমৰ ঠিক পিছতেই আছিল ৰাজা।
আৰক্ষীয়ে জানিব পাৰিছে যে, ভিডিঅ’টো ২৩ মে’ৰ। ঘটনাক্ৰমে, সেইদিনাই ৰাজাক হত্যা কৰা হৈছিল। আৰু এটা ভিডিঅ’ প্ৰকাশ পাইছিল, য’ত তিনিজন যুৱকক ট্ৰেকিং কৰা দেখা গৈছিল। সেই ভিডিঅ’ত ৰাজাৰ তিনি ‘হত্যাকাৰী’ক দেখা গৈছিল। তেওঁলোকেও ট্ৰেকিং কৰি উঠি গৈছিল। তেওঁলোকৰ মাজৰ এজনে কেমেৰা দেখিয়েই মুখ লুকুৱাবলৈ চেষ্টা কৰিছিল। ভ্লগাৰ দেবৰ এই ভিডিঅ’ এতিয়া তদন্তৰ অংশ হৈ পৰিছে। সেই কাৰণে আৰক্ষীয়ে ভ্লগাৰৰ মন্তব্য ল’বলৈ প্ৰস্তুতি চলাইছে।
মেঘালয় ভ্ৰমণৰ পৰা উভতি অহাৰ পিছত ভ্লগাৰ দেবে সেই ভিডিঅ’ চাই আছিল। তেতিয়ালৈ ৰাজা আৰু সোনমৰ ঘটনাই চাৰিওফালে হৈ-চৈৰ সৃষ্টি কৰিছিল। ভ্লগাৰজনে ইনষ্টাগ্ৰামত কৈছিল, “মেঘালয় ভ্ৰমণৰ ভিডিঅ’ চাই আছিলোঁ। তেতিয়াই মোৰ চকুত পৰিল ইন্দোৰৰ সেই দম্পতিটো। যেতিয়া ভিডিঅ’টো বনাইছিলোঁ, তেতিয়া পুৱা প্ৰায় ১০ বাজিছিল। আমি ট্ৰেকিং কৰি তললৈ নামি আছিলোঁ, আৰু ৰাজা-সোনম ওপৰলৈ উঠি গৈছিল।”
ভ্লগাৰৰ সৈতে যোগাযোগ কৰিব নোৱাৰি আৰক্ষীয়ে ইনষ্টাগ্ৰাম কৰ্তৃপক্ষলৈ পত্ৰ পঠিয়াইছে। এই ভিডিঅ’ৰ বিষয়ে তেওঁলোকৰ সহযোগিতা বিচৰা হৈছে।
