গুৱাহাটীৰ ৰাধা গোবিন্দ বৰুৱা ক্ৰীড়া প্ৰকল্পৰ কনকলতা ইনড’ৰ ষ্টেডিয়ামত আজিৰে পৰা আৰম্ভ হৈছে য়’নেক্স-ছানৰাইজ উত্তৰ-পূৱ মণ্ডল আন্তঃৰাজ্যিক বেডমিণ্টন প্ৰতিযোগিতা৷ বেডমিণ্টন এছ’চিয়েচন অব ইণ্ডিয়া [বাই]ৰ সহযোগিতাত অসম বেডমিণ্টন সন্থাই আয়োজন কৰা ৰাষ্ট্ৰীয় প্ৰতিযোগিতাখনৰ দলীয় শাখাৰ ছেমিফাইনেলত প্ৰৱেশ কৰিছে অসমৰ পুৰুষ আৰু মহিলা তথা জুনিয়ৰ ল’ৰা আৰু ছোৱালীৰ দলে৷
পুৰুষ আৰু মহিলাৰ কোৱাৰ্টাৰ ফাইনেলত অসমৰ উভয় দলে ৩-০ ৰ ব্যৱধানত পৰাস্ত কৰে মেঘালয়ক৷ আনহাতে, জুনিয়ৰ ল’ৰাৰ কোৱাৰ্টাৰ ফাইনেলত অসমে ২-০ ৰ ব্যৱধানত নগালেণ্ডক পৰাস্ত কৰাৰ বিপৰীতে ছোৱালী দলে একে ব্যৱধানত পৰাস্ত কৰে মেঘালয়ক৷
ইফালে, প্ৰতিযোগিতাৰ অন্য কোৱাৰ্টাৰ ফাইনেলত ছোৱালী শাখাত অৰুণাচলে ছিকিমক, মিজোৰামে ত্ৰিপুৰাক আৰু মণিপুৰে নাগালেণ্ডক পৰাস্ত কৰি ছেমিফাইনেলত প্ৰৱেশ কৰিছে৷ ল’ৰাৰ কোৱাৰ্টাৰ ফাইনেলত মণিপুৰে ত্ৰিপুৰাক, মিজোৰামে মেঘালয়ক আৰু অৰুণাচলে ছিকিমক পৰাস্ত কৰে৷
ইফালে, পুৰুষৰ শাখাৰ কোৱাৰ্টাৰ ফাইনেলত মণিপুৰে ছিকিমক, মিজোৰামে নাগালেণ্ডক আৰু অৰুণাচলে ত্ৰিপুৰাক পৰাস্ত কৰাৰ বিপৰীতে মহিলাৰ খেলত মণিপুৰে মিজোৰামক, নাগালেণ্ডে ছিকিমক আৰু অৰুণাচলে ত্ৰিপুৰাক পৰাস্ত কৰি ছেমিফাইনেলত প্ৰৱেশ কৰিছে৷
