মুম্বাইৰ কুৰ্লাত এটা ১৩ মহলীয়া আৱাসিক অট্টালিকাত মঙলবাৰে পুৱা সংঘটিত অগ্নিকাণ্ডত তিনি শিশুসহ মুঠ ৯ জন লোক আহত হয়।
প্ৰাপ্ত তথ্য অনুসৰি, পুৱা প্ৰায় ৬ বাজি ৫৩ মিনিটত কুৰ্লা কোহিনুৰ এইচডিআইএল বিল্ডিং নম্বৰ ৫ত জুইৰ সূত্ৰপাত হয়। অট্টালিকাটোৰ বিদ্যুতৰ তাঁৰলৈ জুই বিয়পি পৰে। অগ্নিনিৰ্বাপক বাহিনীৰ কৰ্মীসকলে পুৱা ৭ বাজি ২১ মিনিটত জুই নিৰ্বাপণ কৰিবলৈ সক্ষম হয়।
অগ্নিকাণ্ডৰ ফলত অট্টালিকাটোৰ ভিতৰত ধোঁৱা বিয়পি পৰাত ৮ জন লোকে উশাহ-নিশাহ লোৱাত অসুবিধাৰ সন্মুখীন হয়। আনহাতে, এজন লোকৰ সোঁ ভৰিত আঘাত লাগে। আহতসকলৰ ভিতৰত পাঁচ বছৰীয়া এটি শিশু, দুগৰাকী কিশোৰী আৰু এগৰাকী বৃদ্ধ লোকো আছে।
আহত আটাইকেইজনকে ৰাজাৱাড়ী হাস্পতাললৈ প্ৰেৰণ কৰা হয়। চিকিৎসালয়ৰ সূত্ৰ অনুসৰি, তেওঁলোকৰ আটাইকেইজনৰে স্বাস্থ্যৰ অৱস্থা সুস্থিৰ।
ঘটনাৰ পিছতে উদ্ধাৰ আৰু জৰুৰীকালীন সাহায্যৰ বাবে মুম্বাই অগ্নিনিৰ্বাপক বাহিনী, আৰক্ষী, বিদ্যুৎ কোম্পানীৰ কৰ্মচাৰী, ১০৮ এম্বুলেন্স সেৱা আৰু ৱাৰ্ডৰ কৰ্মচাৰীসকলক নিয়োজিত কৰা হয়।
অগ্নিকাণ্ডৰ প্ৰকৃত কাৰণ আৰু ক্ষয়-ক্ষতিৰ পৰিমাণ এতিয়াও জানিব পৰা হোৱা নাই।
