বিজয়া দশমীৰ পৱিত্ৰ উপলক্ষে আজি ভাৰত আৰু নিউজিলেণ্ডৰ মাজত মুক্ত বাণিজ্য চুক্তি (Free Trade Agreement বা FTA) কাৰ্যকৰী হৈছে। এই চুক্তিৰ ফলত নিউজিলেণ্ডৰ বজাৰত ভাৰতৰ ১০০ শতাংশ ৰপ্তানিক শুল্কমুক্ত প্ৰৱেশৰ সুবিধা লাভ কৰিব।
নতুন দিল্লীত ভাৰত–নিউজিলেণ্ড মুক্ত বাণিজ্য চুক্তি সম্পৰ্কীয় এক অনুষ্ঠানত ভাষণ দি কেন্দ্ৰীয় বাণিজ্য আৰু উদ্যোগ মন্ত্ৰী পীয়ূষ গোৱেলে কয় যে এই চুক্তি প্ৰধানমন্ত্ৰী নৰেন্দ্ৰ মোদীৰ ‘বিকশিত ভাৰত ২০৪৭’ৰ দৃষ্টিভংগীৰ সৈতে সংগতি ৰাখি প্ৰস্তুত কৰা হৈছে। তেওঁ কয় যে এই চুক্তিয়ে ভাৰতৰ ৰপ্তানিকাৰকসকলৰ বাবে, বিশেষকৈ ক্ষুদ্ৰ, লঘু আৰু মজলীয়া উদ্যোগ (MSME), কাৰিকৰ, কৃষক আৰু ঔষধ উদ্যোগৰ সৈতে জড়িতসকলৰ বাবে নতুন আৰু উল্লেখযোগ্য সুযোগৰ দুৱাৰ মুকলি কৰিব।
মন্ত্ৰীগৰাকীয়ে উল্লেখ কৰে যে দুয়োখন দেশে ২০৩০ চনৰ ভিতৰত নিউজিলেণ্ডৰ সৈতে সামগ্ৰী আৰু সেৱাৰ দ্বিপাক্ষিক বাণিজ্য দুগুণ কৰি প্ৰায় ৩৫ হাজাৰ কোটি টকালৈ বৃদ্ধি কৰাৰ লক্ষ্যৰে কাম কৰিবলৈ সন্মত হৈছে।
শ্ৰী গোৱেলে কয় যে এই চুক্তিৰ জৰিয়তে ভাৰতৰ কৃষকসকলে ফল-মূল, শাক-পাচলি, মছলা আৰু অন্যান্য কৃষিজাত সামগ্ৰীৰ বাবে বহল বজাৰ লাভ কৰিব। ইয়াৰ ফলত উৎপাদনশীলতা বৃদ্ধি, কৃষকৰ উপাৰ্জন উন্নত কৰা আৰু জীৱিকাৰ মান শক্তিশালী কৰাত সহায় হ’ব। মন্ত্ৰীগৰাকীয়ে লগতে উল্লেখ কৰে যে দুগ্ধজাত সামগ্ৰীৰ দৰে সংবেদনশীল খণ্ডসমূহক সুৰক্ষিত ৰখা হৈছে, যাতে চৰকাৰৰ নীতি-নিৰ্ধাৰণত কৃষকসকলৰ কল্যাণক সৰ্বাধিক গুৰুত্ব দিয়া হয়।
মন্ত্ৰীগৰাকীয়ে কয় যে ভাৰতত ২০ বিলিয়ন মাৰ্কিন ডলাৰ বিনিয়োগৰ সুবিধা প্ৰদান কৰিবলৈ নিউজিলেণ্ডে দিয়া প্ৰতিশ্ৰুতিয়ে উৎপাদন, আন্তঃগাঁথনি, সেৱা আৰু উদ্ভাৱনৰ ক্ষেত্ৰত যথেষ্ট সম্ভাৱনাৰ সৃষ্টি কৰিব। শ্ৰী গোৱেলে কয় যে এই চুক্তিয়ে নতুন কৰ্মসংস্থাপনৰ সুযোগো সৃষ্টি কৰিব। তেওঁ আশা প্ৰকাশ কৰে যে দুয়োখন দেশৰ মাজত পাৰস্পৰিক উন্নয়ন আৰু সমৃদ্ধিৰ উমৈহতীয়া লক্ষ্যৰ আধাৰত গঢ় লৈ উঠা এই লাভজনক অংশীদাৰিত্বই ভৱিষ্যতে আৰু বহু সফলতাৰ মাইলৰ খুঁটি অতিক্ৰম কৰিব।
ভাৰত আৰু নিউজিলেণ্ডৰ মাজত এই মুক্ত বাণিজ্য চুক্তিখন চলিত বৰ্ষৰ এপ্ৰিল মাহত নতুন দিল্লীৰ ভাৰত মণ্ডপমত স্বাক্ষৰিত হৈছিল। এই চুক্তিয়ে সেৱা, বিনিয়োগ আৰু পেছাদাৰী ব্যক্তি, শিক্ষাৰ্থী তথা যুৱক-যুৱতীৰ যাতায়াত আৰু গতিশীলতাৰ ক্ষেত্ৰত নতুন সুযোগ সৃষ্টি কৰিব। ইয়াৰ উপৰি ভাৰতীয় পেছাদাৰী ব্যক্তি আৰু শিক্ষাৰ্থীসকলৰ বাবে অধিক সুবিধাজনক সুযোগ আৰু পথ মুকলি হ’ব।
ভাৰত আৰু নিউজিলেণ্ডৰ মাজত দীৰ্ঘদিনীয়া আৰু ঘনিষ্ঠ সম্পৰ্ক আছে। দুয়োখন দেশৰ মাজৰ এই সম্পৰ্কৰ মূল আধাৰ হৈছে শক্তিশালী জনসাধাৰণৰ মাজৰ সম্পৰ্ক আৰু বাণিজ্য-বিনিয়োগ, কৃষি, শিক্ষা, ক্ৰীড়া, প্ৰযুক্তি আদি বিভিন্ন ক্ষেত্ৰত ক্ৰমবৰ্ধমান সহযোগিতা।
২০২৫–২৬ বিত্তীয় বৰ্ষত ভাৰত আৰু নিউজিলেণ্ডৰ মাজত সামগ্ৰীৰ দ্বিপাক্ষিক বাণিজ্যৰ পৰিমাণ প্ৰায় ১.১ বিলিয়ন মাৰ্কিন ডলাৰ আছিল। এই মুক্ত বাণিজ্য চুক্তিখনে দুয়োখন দেশৰ মাজৰ সম্পৰ্ক অধিক শক্তিশালী কৰাৰ লগতে দুয়োখন দেশৰ ব্যৱসায়িক প্ৰতিষ্ঠান আৰু জনসাধাৰণৰ বাবে নতুন সুযোগ সৃষ্টি কৰাৰ ক্ষেত্ৰত এক উল্লেখযোগ্য পদক্ষেপ হিচাপে বিবেচিত হৈছে।
এই উপলক্ষে শ্ৰী পীয়ূষ গোৱেলে ভাৰতৰ পৰা নিউজিলেণ্ডলৈ প্ৰথমবাৰৰ বাবে ৰপ্তানি কৰা এখন জেচিবি (JCB) যন্ত্ৰৰ ৰপ্তানি যাত্ৰাৰ শুভাৰম্ভ কৰে। ইয়াৰ উপৰি কৃষি, ৰত্ন আৰু অলংকাৰ, অভিযান্ত্ৰিক সামগ্ৰী, ক্ৰীড়া সামগ্ৰী, জোতা আৰু চামৰা উদ্যোগৰ বিভিন্ন সামগ্ৰীৰ ৰপ্তানিৰো শুভাৰম্ভ কৰাৰ পৰিকল্পনা কৰা হৈছে।
এই পদক্ষেপসমূহে ভাৰতীয় উৎপাদনকাৰীসকলৰ আত্মবিশ্বাস আৰু এই চুক্তিয়ে দেশৰ বিভিন্ন প্ৰান্তৰ ৰপ্তানিকাৰকসকলৰ বাবে সৃষ্টি কৰা নতুন সুযোগসমূহৰ প্ৰতিফলন ঘটায়।
