অচিৰেই বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলত পৰ্যটকৰ বাবে নিষিদ্ধ হ’ব মোবাইল ফোন ৷ লগতে পৰ্যটকৰ বাবে বাধ্যতামূলক হ’ব অনলাইন বুকিং ৷ বিদেশী পৰ্যটকক আকৰ্ষিত কৰিবৰ বাবে বিশেষ পদক্ষেপ গ্ৰহণ কৰাৰ লগতে ৰাজহ সংগ্ৰহত গুৰুত্ব আৰোপ কৰা হ’ব ৷ উদ্যানৰ ভিতৰত দৈনিক কিমান গাড়ী প্ৰবেশ কৰিব তাৰ ওপৰতো গুৰুত্ব আৰোপ কৰা হ’ব ৷ লগতে সপ্তাহত এদিন উদ্যান বন্ধ ৰাখিব লাগিব ৷ উচ্চতম ন্যায়ালয়ৰ নিৰ্দেশ অনুসৰি কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলত অচিৰেই বলৱৎ হ’ব এই নিয়ম ৷ শুক্ৰবাৰে কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলৰ ক্ষেত্ৰ সঞ্চালক ৰমেশ চন্দ্ৰ কুমাৰে নিজা কাৰ্যালয় কক্ষত সাংবাদিকৰ সৈতে মত বিনিময় কৰি এই কথা সদৰি কৰে ৷ উচ্চতম ন্যায়ালয়ৰ নিৰ্দেশত ৰাষ্ট্ৰীয় সেউজ প্ৰাধিকৰণে ভাৰতবৰ্ষৰ আন আন ৰাষ্ট্ৰীয় উদ্যানত প্ৰযোজ্য হোৱাকৈ কাজিৰঙা ৰাষ্ট্ৰীয় উদ্যানতো এই নিয়ম সমূহ প্ৰযোজ্য হ’ব বুলি কাজিৰঙাৰ ক্ষেত্ৰ সঞ্চালকগৰাকীয়ে জানিবলৈ দিয়ে ৷ পৰ্যটকে মোবাইল ফোন লগত নি বিভিন্ন জীৱজন্তু আৰু লোকেশ্বন আদি আপলোড কৰি বিভ্ৰান্তিৰ সৃষ্টি কৰে ৷ তাৰ বাবেই ভাৰতবৰ্ষৰ আন আন ৰাষ্ট্ৰীয় উদ্যানত মোবাইল নিষিদ্ধৰ দৰে কাজিৰঙাকো এই নিয়ম অতি শীঘ্ৰেই প্ৰযোজ্য হ’ব ৷ তাৰোপৰি সপ্তাহত এটা দিন ৰাষ্ট্ৰীয় উদ্যান বন্ধ ৰখাৰ গুৰুত্ব ওপৰত বক্তব্য ৰাখি ইয়াৰ জৰিয়তে গাড়ী আৰু পৰ্যটকৰ পৰা বন্য জীৱজন্তুৱে কিছু সকাহ লাভ কৰিব ৷ লগতে উদ্যানৰ ভিতৰৰ যাতায়তৰ অনুপযোগী হোৱা বাট পথসমূহ মেৰামতি কৰিব পাৰিব ৷ তাৰোপৰি ইক’ টুৰিজিমৰ ওপৰতো বিশেষ গুৰুত্ব আৰোপ কৰা হ’ব ৷ তাৰোপৰি বছৰত ভাৰতবৰ্ষলৈ অহা ২ কোটি বিদেশী পৰ্যটকৰ মাত্ৰ ৩৬ হাজাৰ বিদেশী পৰ্যটকহে অসমলৈ তথা কাজিৰঙালৈ আহে ৷ ইক’ টুৰিজিমৰ জৰিয়তে বিদেশী পৰ্যটকক আৰু অধিক আকৰ্ষিত কৰি আৰু বিদেশী পৰ্যটক যাতে অসমলৈ আহে তাৰ ওপৰতো বিশেষ গুৰুত্ব আৰোপ কৰা হ’ব ৷ যোৱা ১৮ জুলাইত বন আৰু পৰ্যটন মন্ত্ৰী জয়ন্তমল্ল বৰুৱা কাজিৰঙালৈ আহোতে এই বিষয়ৰ ওপৰত আলোচনা কৰি এই বিষয়সমূহৰ ওপৰত গুৰুত্ব আৰোপ কৰিছিল ৷ তাৰ বাবেই কাজিৰঙা উদ্যান কতৃপক্ষই এই বিষয়সমূহৰ ওপৰত গুৰুত্ব আৰোপ কৰিছে ৷ আনহাতে, প্ৰথমটো বানে কাজিৰঙাৰ বিশেষ অনিষ্ট সাধন নকৰিলেও কাজিৰঙাত বানপানীৰ প্ৰয়োজন আছে বুলি ক্ষেত্ৰ সঞ্চালকগৰাকীয়ে ব্যক্ত কৰে ৷ তাৰ বাবে পুনৰ বানপানী হ’লে উদ্যান কতৃপক্ষ সম্পূৰ্ণ সাজু হৈ থকা বুলি ব্যক্ত কৰে ৷
