মণিপুৰত পুনৰ হিংসাত্মক ঘটনা। পৃথক দুটা গুলীচালনাৰ ঘটনাত কমেও ৪ জন লোকৰ মৃত্যু হোৱাৰ পাছতে ইম্ফলত উত্তপ্ত প্ৰতিবাদ সাব্যস্ত কৰে ক্ষুব্ধ জনতাই। নিহত দুজনৰ মৃতদেহ মুখ্যমন্ত্ৰী ৱাই খেমচান্দ সিঙৰ কটকটীয়া নিৰাপত্তাবেষ্টিত বাসগৃহৰ সন্মুখলৈ লৈ গৈ দোষীৰ বিৰুদ্ধে তাৎক্ষণিক ব্যৱস্থা গ্ৰহণৰ দাবী জনায় প্ৰতিবাদকাৰীয়ে।*
মণিপুৰত নতুনকৈ সংঘটিত হিংসাত্মক ঘটনাই ৰাজ্যখনৰ আইন-শৃংখলাজনিত পৰিস্থিতিক পুনৰ উদ্বেগজনক কৰি তুলিছে। পৃথক দুটা ঘটনাত কমেও চাৰিজন লোক নিহত হোৱাৰ লগতে কেইবাজনো আহত হৈছে। উল্লেখ্য যে, ২০২৩ চনৰ মে’ মাহৰ পৰা মেইটেই আৰু কুকি জনগোষ্ঠীৰ মাজত চলি অহা উত্তেজনাৰ পৰিপ্ৰেক্ষিতত শেহতীয়া ঘটনাই পুনৰ সংঘাত বৃদ্ধিৰ আশংকা সৃষ্টি কৰিছে।
প্ৰথমটো ঘটনা সংঘটিত হয় ইম্ফল পূব জিলাৰ খামেনলকৰ সমীপত। পাহাৰত খৰি সংগ্ৰহ কৰিবলৈ যোৱা তিনিজন গাঁৱলীয়া লোকক সন্দেহযুক্ত উগ্ৰপন্থীয়ে গুলীয়াই হত্যা কৰাৰ অভিযোগ উত্থাপন হৈছে। এই আক্ৰমণত আন তিনিজন লোকো আহত হয় বুলি সংবাদ মাধ্যমৰ প্ৰতিবেদনত প্ৰকাশ পাইছে।
স্থানীয় বিধায়ক থোকচম লোকেশ্বৰ সিঙৰ ভাষ্য অনুসৰি, ইম্ফল পূব আৰু কুকি জনগোষ্ঠী অধ্যুষিত কাংপোকপি জিলাৰ সীমান্তৱৰ্তী অঞ্চলত খৰি সংগ্ৰহ কৰি থকাৰ সময়তে লোককেইজন আক্ৰমণৰ সন্মুখীন হয়।
নিহত লোককেইজনক ক্ৰমে ৩৫ বছৰীয়া অৰুবাম ৰণিল, ৪৪ বছৰীয়া লাইৰেনলাকপাম ইনাওবি আৰু ৩২ বছৰীয়া ক্ষেত্ৰিমায়ুম সুশীল বুলি চিনাক্ত কৰা হৈছে। আনহাতে, আহত মেইছনাম সোমেন্দ্ৰ (৫৫), বনছন খিংড্ৰাম (৪৫) আৰু ঙাংগম সুৰজক (২২) ইম্ফলৰ ৰাজ মেডিচিটি হাস্পতালত ভৰ্তি কৰোৱা হৈছে।
বিধায়কগৰাকীয়ে লগতে জনোৱা অনুসৰি, খৰি সংগ্ৰহ কৰিবলৈ যোৱা লোকসকলক অসম ৰাইফলছৰ জোৱানে নিৰাপত্তা প্ৰদানৰ আশ্বাস দিছিল।
ইফালে, আনটো ঘটনাত মেইটেই আৰু পাংগাল মুছলমান অধ্যুষিত অঞ্চল এটাত অনুষ্ঠিত সংগীতানুষ্ঠানৰ সময়ত হোৱা হিংসাত্মক পৰিস্থিতিত গুলীবিদ্ধ হৈ ২৪ বছৰীয়া এজন যুৱকৰ মৃত্যু হয়। সংবাদ মাধ্যমৰ প্ৰতিবেদন অনুসৰি, ঘটনাস্থলীত শিলগুটি নিক্ষেপ আৰু গুলীচালনাৰ ঘটনা সংঘটিত হোৱাৰ লগতে কেইবাজনো লোক আহত হয়।
পৃথক দুটা ঘটনাত হোৱা মৃত্যুক কেন্দ্ৰ কৰি ইম্ফলত তীব্ৰ প্ৰতিবাদৰ সৃষ্টি হয়। ক্ষুব্ধ প্ৰতিবাদকাৰীয়ে নিহত দুজনৰ মৃতদেহ মুখ্যমন্ত্ৰীৰ নিৰাপত্তাবেষ্টিত বাসগৃহৰ সন্মুখলৈ লৈ গৈ দোষীৰ বিৰুদ্ধে কঠোৰ ব্যৱস্থা গ্ৰহণৰ দাবী জনায়। পৰৱৰ্তী সময়ত কৰ্তৃপক্ষই মৃতদেহকেইটা তাৰ পৰা আঁতৰাই নিয়ে। আনহাতে, মুখ্যমন্ত্ৰীৰ বাসগৃহৰ চৌহদত প্ৰৱেশ কৰা প্ৰতিবাদকাৰীক ছত্ৰভংগ দিয়াবলৈ আৰক্ষীয়ে কন্দুৱা গেছ প্ৰয়োগ কৰাৰ লগতে লাঠীচালনা কৰে।
পৰিস্থিতিৰ মাজতে মুখ্যমন্ত্ৰী ৱাই খেমচান্দ সিঙে ৰাজ মেডিচিটি হাস্পতালত চিকিৎসাধীন আহতসকলৰ স্বাস্থ্যৰ বুজ লয়। ইফালে, নিৰাপত্তাৰক্ষীয়ে গুলীচালনাৰ ঘটনাস্থলী সুৰক্ষিত কৰাৰ লগতে অঞ্চলটোত নিৰাপত্তা ব্যৱস্থা শক্তিশালী কৰে।
শেহতীয়া ঘটনাই বিশেষকৈ ইম্ফল পূব আৰু কাংপোকপি জিলাৰ সংবেদনশীল সীমান্তৱৰ্তী অঞ্চলত পুনৰ উত্তেজনা বৃদ্ধি কৰিছে। ঘটনাৰ নিৰপেক্ষ তদন্ত, দোষীক চিনাক্তকৰণ আৰু ৰাজ্যখনত অধিক হিংসাত্মক পৰিস্থিতি ৰোধ কৰাটো এতিয়া প্ৰশাসনৰ বাবে এক গুৰুত্বপূৰ্ণ প্ৰত্যাহ্বান হৈ পৰিছে।
