দিল্লীলৈ যোৱাৰ পূৰ্বে ৰাজ্যসভা নিৰ্বাচনক লৈ কেইবাটাও গুৰুত্বপূৰ্ণ মন্তব্য কৰে মুখ্যমন্ত্ৰী হিমন্ত বিশ্ব শৰ্মাই। হোটেল ৰেডিছন ব্লুত মিত্ৰজোঁটৰ বিধায়কৰে আলোচনাৰ অন্তত সংবাদ মাধ্য়মৰ আগত পুনৰবাৰ আত্মবিশ্বাসেৰে ঘোষণা কৰে-দুয়োখন আসনতে আমি জয়লাভ কৰিম। ইতিমধ্যেই সকলো চূড়ান্ত হৈ আছে। কেৱল দুয়োখন আসনতে জয়ী হোৱাই নহয়, আমি ভাল ভোট পাম বুলি মন্তব্য কৰে। আনহাতে, শ্বেৰমান আলী আহমেদৰ ভোট ল’লে মই নিজেই বদনামী হ’ব লাগিব। শ্বেৰমান আলীক ভোট দিবলৈ মই মানা কৰিছোঁ বুলি মন্তব্য কৰে। শ্বেৰমান আলীৰ ভোট আমাক নালাগে। একেদৰে AIUDFৰ ভোট আমাক নালাগে বুলি সদম্ভে ঘোষণা কৰে। আনহাতে, কংগ্ৰেছৰ নিলম্বিত বিধায়ক শশীকান্ত দাস সন্দৰ্ভতো বিস্ফোৰক মন্তব্য মুখ্যমন্ত্ৰীৰ। শশীকান্ত দাস চৰকাৰৰ মানুহ। চৰকাৰী কামত তেখেত আহিবই। মোৰ লগত সকলো বিধায়কৰে সম্পৰ্ক আছে। তেওঁলোকে ফোন নকৰিলেও মই কৰোঁ। আজি ২৭ বছৰে মইহে তেওঁলোকৰ লগত আছোঁ বুলি মন্তব্য প্ৰকাশ কৰে হিমন্ত বিশ্ব শৰ্মাই।
