উত্তৰ সোৱণশিৰিৰ পিছত এইবাৰ শি ইয়োমি জিলা। চীনা সেনাৰ বিৰুদ্ধে পুনৰ অৰুণাচল প্ৰদেশত প্ৰৱেশ কৰা আৰু প্ৰকৃত নিয়ন্ত্ৰণ ৰেখা (LAC) উলংঘা কৰি এখন গাঁও নিৰ্মাণ কৰাৰ অভিযোগ উত্থাপিত হৈছে। ৰাষ্ট্ৰীয় সংবাদ মাধ্যমত সম্প্ৰচাৰিত এক প্ৰতিবেদন অনুসৰি, চীনা সেনাই অৰুণাচলৰ শি ইয়োমি জিলাত প্ৰায় ছয় কিলোমিটাৰ আগুৱাই আহি LACত প্ৰৱেশ কৰিছে আৰু এখন গাঁও নিৰ্মাণ কৰিছে। ছেটেলাইটত বন্দী হোৱা এখন বিশেষ ফটোৱে পোহৰলৈ আনিছে এই খবৰ।
প্ৰতিবেদন অনুসৰি, ফটোখন ২০২১ চনৰ ছেপ্টেম্বৰত তোলা হৈছিল। আৰু আন এখন ফটো ২০১৯ৰ মাৰ্চত লোৱা হৈছিল। ২০১৯ত লোৱা ফটোখনত সেই বিশেষ অঞ্চলটোত জনবসতিৰ কোনো চিন নাই। কিন্তু দুমাহ আগতে তোলা ছবিবোৰত ঘৰৰ শাৰী দেখুওৱা হৈছে।
অৱশ্যে, অৰুণাচল চৰকাৰ বা ভাৰতীয় সেনাই এতিয়ালৈকে চীনা সেনাৰ ভূমি বেদখলৰ অভিযোগ স্বীকাৰ কৰা নাই। সেনাই বিষয়টো গুৰুত্ব সহকাৰে লৈ এই সন্দৰ্ভত নজৰ দিয়া হ’ব বুলি প্ৰকাশ কৰিছে।
আমেৰিকা যুক্তৰাষ্ট্ৰৰ প্ৰতিৰক্ষা বিভাগৰ বাৰ্ষিক প্ৰতিবেদনত শেহতীয়াকৈ ভাৰতীয় ভূখণ্ড বেদখলৰ অভিযোগ স্বীকাৰ কৰা হৈছে। বৈদেশিক পৰিক্ৰমা মন্ত্ৰালয়ৰ মুখপাত্ৰ অৰিন্দম বাগচীয়ে অৰুণাচল সীমান্তৰ কাষৰীয়া অঞ্চলত চীনা গাঁও নিৰ্মাণৰ অভিযোগ নিশ্চিত কৰিছিল কিন্তু সেনাই চীনৰ দখল খাৰিজ কৰিছিল।
