ভাৰতীয় ৰে’লৱেই তটকালৰ টিকট বুকিং নিয়মৰ এক বৃহৎ আপডেট কৰি OTP ভিত্তিক ব্যৱস্থা বাধ্যতামূলক কৰি তুলিছে। এই নতুন নিয়ম আজি অৰ্থাৎ ১ ডিচেম্বৰৰ পৰা কাৰ্যকৰী হ’ব আৰু নিৰ্বাচিত ৰে’লৰ পৰা আৰম্ভ হ’ব। ইয়াৰ উদ্দেশ্য হৈছে প্ৰৱঞ্চনামূলক বুকিং ৰোধ কৰা আৰু প্ৰকৃততে জৰুৰীভাৱে যাত্ৰা কৰিবলগীয়া কিন্তু নিশ্চিত টিকট লাভ কৰিব নোৱাৰা যাত্ৰীসকলক সুযোগ প্ৰদান কৰা। ১ ডিচেম্বৰৰ পৰা IRCTC তটকালৰ টিকটৰ OTP ব্যৱস্থা, SBI ATM মাচুলৰ পৰিৱৰ্তন, এম কেছ সেৱা বন্ধ কৰা, কঠোৰ GST ৰিটাৰ্ণ, আৰু মোবাইল কলাৰৰ নাম প্ৰদৰ্শনকে ধৰি ডাঙৰ পৰিৱৰ্তন কাৰ্যকৰী হ’ব। এই আপডেটসমূহে যাত্ৰী, বেংকৰ গ্ৰাহক, আৰু ব্যৱসায়ীসকলক প্ৰভাৱিত কৰিব।
তটকাল টিকটৰ বাবে OTP ব্যৱস্থা
মুম্বাই চেণ্ট্ৰেল-আহমেদাবাদ শতাব্দী এক্সপ্ৰেছৰ পৰা আৰম্ভ কৰি ১ ডিচেম্বৰৰ পৰা ৰে’লৱেই তটকালৰ টিকটৰ বাবে OTP বাধ্যতামূলক কৰিছে। পঞ্জীয়নভুক্ত মোবাইল নম্বৰত প্ৰেৰণ কৰা OTP প্ৰৱেশ কৰাৰ পিছতহে বুকিং সম্পূৰ্ণ হ’ব। ৰে’লৱেৰ মতে, ইয়াৰ ফলত ভুৱা মোবাইল নম্বৰৰ ব্যৱহাৰ ৰোধ হ’ব আৰু প্ৰকৃত আৰু যোগ্য যাত্ৰীসকলে টিকট লাভ কৰাৰ সম্ভাৱনা বৃদ্ধি পাব। আগন্তুক মাহত সকলো ৰে’লৱে জ’নত এই কাম কাৰ্যকৰী কৰা হ’ব।
নতুন ব্যৱস্থাটো ক’ত ৰূপায়ণ কৰা হ’ব?
এই নতুন ব্যৱস্থাটো অনলাইন বুকিঙৰ মাজতে সীমাবদ্ধ নহয় যদিও কম্পিউটাৰাইজড ৰে’লৱে কাউণ্টাৰ, IRCTCৰ ৱেবছাইট, মোবাইল এপ, আৰু অনুমোদিত ৰে’লৱে এজেণ্টৰ মাজতো প্ৰযোজ্য হ’ব। ৰে’লৱেৰ মতে এই ব্যৱস্থাই বুকিং প্ৰক্ৰিয়াক অধিক সুৰক্ষিত আৰু স্বচ্ছ কৰি তুলিব। যাত্ৰীৰ পৰিচয় নিশ্চিত কৰাটোৱেই হৈছে এই পৰিৱৰ্তনৰ মূল উদ্দেশ্য।
মোবাইল নম্বৰ আপডেট কৰিব লাগিব
ৰে’লৱেই যাত্ৰীসকলক টিকট বুকিং কৰাৰ পূৰ্বে মোবাইল নম্বৰ আপডেট কৰিবলৈ পৰামৰ্শ দিছে। OTP লাভ কৰিবলৈ তেওঁলোকৰ IRCTC একাউণ্টত একে নম্বৰ সক্ৰিয় হ’ব লাগিব। বুকিঙৰ সময়ত আন কাৰোবাৰ নম্বৰ দিয়াটো এৰাই চলিব লাগে, কিয়নো OTP পঠোৱাৰ পিছত নম্বৰটো সলনি কৰাটো সম্ভৱ নহ’ব। ভুৱা গ্ৰাহকৰ তথ্য ৰোধৰ বাবে এই পদক্ষেপ গ্ৰহণ কৰা হৈছে।
SBIৰ ATMত এতিয়া বিনামূলীয়া লেনদেন সীমিত কৰা হৈছে-
১ ডিচেম্বৰৰ পৰা কাৰ্যকৰী হোৱাকৈ SBI ATM আৰু অটোমেটেড ডিপ’জিট-কাম-উইথড্ৰ’ৱেল মেচিন (এ ডি ডব্লিউ এম) লেনদেনৰ মাচুলত পৰিৱৰ্তন কাৰ্যকৰী কৰা হ’ব। দৰমহা একাউণ্টধাৰীয়ে মাত্ৰ ১০টা বিনামূলীয়া লেনদেন লাভ কৰিব, তাৰ পিছত তেওঁলোকে প্ৰতিটো লেনদেনত ২৩ টকা দিব লাগিব। অবিত্তীয় লেনদেনৰ মাচুলো ১০ টকাৰ পৰা ১১ টকালৈ বৃদ্ধি কৰা হৈছে। সঞ্চয় একাউণ্টধাৰীৰ বাবে ৫টা বিনামূলীয়া লেনদেনৰ সীমা নিৰ্ধাৰণ কৰা হৈছে। বেংকটোৱে কয় যে- সেৱাৰ মান উন্নত কৰা আৰু ডিজিটেল পেমেণ্টৰ প্ৰচাৰৰ লক্ষ্যৰে এই আপডেট কৰা হৈছে।
mCash সুবিধা বন্ধ কৰা হ’ল–
SBI য়ে YONO Lite আৰু Online SBI ত উপলব্ধ mCash সুবিধা বন্ধ কৰাৰ সিদ্ধান্ত লৈছে। ১ ডিচেম্বৰৰ পৰা এই বৈশিষ্ট্যৰ জৰিয়তে গ্ৰাহকে আৰু ধন প্ৰেৰণ বা লাভ কৰিব নোৱাৰিব। বেংকে গ্ৰাহকক UPI, IMPS, NEFT, RTGSৰ দৰে বিকল্প ব্যৱহাৰ কৰিবলৈ পৰামৰ্শ দিছে। SBIয়ে কয় যে, এই পৰিৱৰ্তন নিৰাপত্তা আৰু ব্যৱস্থাৰ উন্নতিৰ বাবে প্ৰয়োজনীয় আছিল।
GST ৰিটাৰ্ণ
GSTNয়ে ঘোষণা কৰিছে যে, তিনি বছৰ বা তাতকৈ অধিক সময় ৰিটাৰ্ণ দাখিল নকৰা ব্যৱসায়ীসকলে ডিচেম্বৰৰ পৰা ৰিটাৰ্ণ দাখিল কৰিব নোৱাৰিব। কৰ ব্যৱস্থাত অনুশাসন আনিবলৈ এই পদক্ষেপ গ্ৰহণ কৰা হৈছে। ব্যৱসায়ীসকলে পুনৰ দাখিল কৰাৰ পূৰ্বে প্ৰথমে পুৰণি ৰিটাৰ্ণ আপডেট কৰিব লাগিব। ইয়াৰ ফলত কৰ পালন শক্তিশালী হ’ব বুলি আশা কৰা হৈছে।
ফোন কৰাজনৰ প্ৰকৃত নাম এতিয়াৰ পৰা দেখা যাব-
টেলিকমিউনিকেচন বিভাগে অহা ১৫ ডিচেম্বৰৰ পৰা চিএনএপি (Caller Name Presentation) ব্যৱস্থা ৰূপায়ণ কৰিছে। এই বৈশিষ্ট্যৰ সহায়ত যেতিয়া কোনো কল মোবাইললৈ আহে, তেতিয়া ফোন কৰাজনৰ প্ৰকৃত নাম, কে ৱাই চি ফৰ্মত লিখাৰ দৰে, পৰ্দাত প্ৰদৰ্শিত হ’ব। ইয়াৰ ফলত প্ৰৱঞ্চনামূলক আৰু স্পেম কল ৰোধ হ’ব আৰু ট্ৰুকলাৰৰ দৰে এপৰ প্ৰয়োজনীয়তা বহু পৰিমাণে হ্ৰাস পাব। ই গ্ৰাহকৰ সুৰক্ষা শক্তিশালী কৰাৰ দিশত এক ডাঙৰ পদক্ষেপ হিচাপে বিবেচিত হৈছে।
