নুমলীগড়ৰ দৈগ্ৰোঙত সংঘটিত হ’ল এক হৃদয়বিদাৰক ঘটনা। এখন বাহনৰ খুন্দাত এজনী মাইকী বান্দৰ মৃত্যু হোৱাৰ পিছতে ঘটনাস্থলীত দেখা গ’ল আপোনজনক হেৰুওৱাৰ বেদনাদায়ক দৃশ্য।
দৈগ্ৰোং অঞ্চলত কণমানি পোৱালিসহ বিচৰণ কৰি থকা অৱস্থাতে এখন বাহনৰ খুন্দাত মৃত্যু হয় বান্দৰজনীৰ। ইয়াৰ পিছতে বহু সময় ধৰি মৃত বান্দৰজনীৰ কাষত পোৱালিটোৰ লগতে আন এটা বান্দৰে পহৰা দি থাকে।
মাতৃক হেৰুৱাই পোৱালিটোৱে সৃষ্টি কৰে হাহাকাৰ। আনহাতে, মৃত বান্দৰজনীৰ কাষত থকা বান্দৰটোৱে উপস্থিত থকা লোকক আক্ৰমণ কৰি ত্ৰাসৰ সৃষ্টি কৰে।
খবৰ পাই ঘটনাস্থলীত উপস্থিত বন বিভাগৰ লোক। অৱশেষত বন বিভাগে মৃত বান্দৰজনীক উদ্ধাৰ কৰি লৈ যায়।
