কৰিমগঞ্জ জিলাৰ বদৰপুৰৰ বন্দাশিল এলেকাত পর্তুগীজ লোকৰ এক বসতিস্থল আছে। ২০০গৰাকী সদস্যৰে গঠিত প্রায় ৪০টা পৰিয়ালৰ এই লোকসকলে স্থানীয় কৃষ্টি-সংস্কৃতিৰ সৈতে একাত্ম হোৱা সত্ত্বেও পূৰ্বপুৰুষৰ বিশ্বাস আৰু পৰম্পৰা এতিয়াও অক্ষুণ্ণ ৰাখিছে। তেওঁলোকে এতিয়াও পর্তুগীজ পৰম্পৰাগত বিভিন্ন ব্যঞ্জন যেনে বিবিয়া, ভিন্দালু আদি প্ৰস্তুত কৰাৰ লগতে পর্তুগীজ শৈলীত জুইত সেকি তৈয়াৰ কৰা কেক প্রস্তুত কৰে।
ৰোমান কেথলিক এই পর্তুগীজ সম্প্রদায়টোৱে আনুমানিক সপ্তদশ শতিকাৰ পৰা এই অঞ্চলত বসতি স্থাপন কৰা বুলি বিশ্বাস কৰা হয়। খ্ৰীষ্টমাছৰ আগদিনা ৰাতি ছেইণ্ট যোছেফ গির্জাৰ মধ্যৰাতিৰ সভা (Midnight Mass)ত তেওঁলোকে প্ৰাৰ্থনা কৰে। উত্তৰ-পূব ভাৰতৰ আটাইতকৈ প্ৰাচীন গির্জাসমূহৰ ভিতৰত অন্যতম ছেইন্ট যোছেফ গির্জা ১৮৮০ চনত স্থাপন কৰা হৈছিল।
