ৰাজ্যত পুনৰ এনকাউণ্টাৰ। আৰক্ষীৰ গুলীত গুলীবিদ্ধ দুৰ্ধৰ্ষ জাহিৰ আলী ওৰফে ভূত্তু। ডকাইত বিশ্বনাথ চাৰিআলি ষ্টেডিয়ামৰ ওচৰত পুৱতি নিশা এনকাউণ্টাৰ আৰক্ষীৰ৷ আৰক্ষীৰ গুলীত গুৰুতৰভাবে আহত দুৰ্ধৰ্ষ ডকাইত তথা বহু অসামাজিক চক্ৰৰে জড়িত জাহিৰ আলী ওৰফে ভূত্তু৷ পুৱতি নিশা প্ৰায় ৩.৩০ বজাত সংঘটিত হয় এই ঘটনা৷ শুকুৰবাৰে নিশা বিশ্বনাথ আৰক্ষীয়ে জালনোট আৰু নকল সোণৰ বিৰুদ্ধে কেইবাঠাইতো অভিযান চলাই পৃথক পৃথক স্থানৰ পৰা টকা বনোৱা দুটা মেছিন, জালনোট, সোণৰ মূৰ্তিৰ লগতে কেইবাজনো লোকক গ্ৰেপ্তাৰ কৰিছিল৷ ইয়াৰে অন্যতম আছিল জাহিৰ আলী ওৰফে ভুত্তু৷ আৰক্ষীক কেইবাটাও নকল টকা থকা স্থান দেখুৱাবলৈ লৈ যোৱাৰ সময়ত তেওঁ পলাবলৈ চেষ্টা কৰিছিল। পলায়নৰ সময়তে আৰক্ষীয়ে গুলীচালনা কৰে আৰু জাহিৰ আলীৰ ভৰিত গুলী লাগে৷ সংকটজনক অৱস্থাত ভুত্তুক তেজপুৰ মেডিকেল কলেজ হাস্পতালত ভৰ্তি কৰোৱা হৈছে৷
