অসম সীমান্তৰ পৰা আৰক্ষী শিবিৰ উঠাই নিব নাগালেণ্ডে

গুৱাহাটী, ৩১ জুলাই, NKTV: অসম-নাগালেণ্ড সীমা সমস্যাকলৈ মৰিয়নীত অসম আৰু নাগালেণ্ড প্ৰশাসনৰ গুৰুত্বপূৰ্ণ বৈঠক। এই বৈঠকতে দুয়ো ৰাজ্যই সীমান্তৰ পৰা আৰক্ষী শিবিৰ উঠাই নিয়াৰ সিদ্ধান্ত গ্ৰহণ কৰে। অসম নাগালেণ্ডৰ সীমা সমস্যাক লৈ মৰিয়নী মহাবিদ্যালয়ৰ সভাকক্ষত নাগালেণ্ডৰ মোককছাং জিলাৰ উপায়ুক্ত আৰু যোৰহাট জিলা উপায়ুক্তৰ মাজত এক গুৰুত্বপূৰ্ণ বৈঠক অনুষ্ঠিত হয়,জানিব পৰা মতে এই বৈঠকত সীমান্তৰ পৰা দুয়োখন ৰাজ্যৰ আৰক্ষী প্ৰত্যাহাৰ কৰাৰ ঐতিহাসিক সিদ্ধান্ত লোৱা হয়, ইয়াৰ পিছতে দুয়ো ৰাজ্যৰ প্ৰশাসনৰ দলটো দিচৈ সংৰক্ষিত বনাঞ্চললৈ গৈ সেই অঞ্চল পৰিদৰ্শন কৰে। উল্লেখযোগ্য যে, দুয়োখন ৰাজ্যৰ বিষয়া পৰ্যায়ত বুজাবুজি হৈ দিচৈ সংৰক্ষিত বনাঞ্চলত নতুনকৈ নিৰ্মাণ কৰা BOP সমূহ প্ৰত্যাহাৰ কৰা এইয়াই প্ৰথম ঘটনা। শেষত দুয়ো ৰাজ্যৰ প্ৰশাসনে দিচৈ সংৰক্ষিত বনাঞ্চলত দুয়ো ৰাজ্যৰ শিবিৰ তুলি দিয়াৰ প্ৰতীকী হিচাপে নাগালেণ্ড আৰু অসমৰ BOPৰ বেৰ উঠাই দি কৰমৰ্দন কৰে।