১৪ বছৰৰ পিছত ত্ৰিপুৰাৰ সন্ধানহীন শিক্ষকক লৈ চাঞ্চল্যকৰ ঘটনা, হত্যাৰ সন্দেহত অসমত গ্ৰেপ্তাৰ এজনক
ত্ৰিপুৰাৰ এগৰাকী শিক্ষকৰ ১৪ বছৰ পূৰ্বে হোৱা ৰহস্যজনক অন্তৰ্ধান আৰু সন্দেহজনক হত্যাকাণ্ডৰ গোচৰত অসমৰ কৰিমগঞ্জ জিলাৰ পৰা এজন অভিযুক্তক গ্ৰেপ্তাৰ কৰিছে ত্ৰিপুৰা আৰক্ষীৰ অপৰাধ অনুসন্ধান বিভাগে (CID)।
বাজু (Baju) নামৰ অভিযুক্তজনক বৃহস্পতিবাৰে গ্ৰেপ্তাৰ কৰা হয়। পৰৱৰ্তী সময়ত তেওঁক আগৰতলালৈ লৈ যোৱা হয় আৰু পশ্চিম ত্ৰিপুৰাৰ মুখ্য ন্যায়িক দণ্ডাধীশৰ আদালতত হাজিৰ কৰোৱা হয়। আদালতে অধিক জেৰাৰ বাবে অভিযুক্তজনক চাৰি দিনৰ আৰক্ষীৰ জিম্মালৈ প্ৰেৰণ কৰে।
এই গোচৰটো আগৰতলাৰ ভাটি অভয়নগৰৰ বাসিন্দা আশীষ সোমৰ সন্ধানহীন হোৱাৰ সৈতে জড়িত। ২০১১ চনৰ ২৮ মে’ত প্ৰায় ৪০ বছৰীয়া আশীষ সোম ব্যৱসায়িক কামত কাঞ্চনপুৰলৈ বুলি ঘৰৰ পৰা ওলাই গৈছিল। তেওঁ কাঠৰ ব্যৱসায়ৰ সৈতেও জড়িত আছিল। কিন্তু তাৰ পিছত তেওঁ আৰু ঘৰলৈ উভতি নাহিল।
আৰক্ষীৰ সূত্ৰ অনুসৰি, পৰৱৰ্তী সময়ত আশীষ সোমৰ পৰিয়ালে কেইবাটাও ফোনকল লাভ কৰিছিল। ফোন কৰা লোকসকলে তেওঁক অপহৰণ কৰা বুলি দাবী কৰি মুক্তিপণ বিচাৰিছিল। পৰিয়ালটোৱে বিভিন্ন সময়ত প্ৰায় ২৫ লাখ টকা মুক্তিপণ হিচাপে আদায় দিছিল। কিন্তু ধন দিয়াৰ পিছতো আশীষ সোমৰ কোনো সন্ধান পোৱা নগ’ল।
দীৰ্ঘদিন ধৰি কোনো শুংসূত্ৰ নোপোৱাৰ পিছত পৰিয়ালটোৱে গোচৰটোৰ গভীৰ তদন্ত বিচাৰি আদালতৰ কাষ চাপিছিল।
আৰক্ষীৰ এগৰাকী বিষয়াই জনোৱা মতে, তদন্তৰ সময়ত আশীষ সোমৰ ব্যৱসায়িক সহযোগী বুলি জানিব পৰা হোছেইন আহমেদৰ নামো অপহৰণৰ সন্দেহযুক্ত হিচাপে পোহৰলৈ আহিছিল।
আৰক্ষীৰ বিষয়াগৰাকীয়ে বাজুক জেৰা কৰি থকা বুলি জনায়।
উল্লেখ্য যে, চলিত বৰ্ষৰ ১৬ ছেপ্টেম্বৰত কৰিমগঞ্জ জিলাৰ সোণবিল অঞ্চলৰ এখন কবৰস্থানত থকা তিনিটা অচিনাক্ত কবৰৰ পৰা কংকালৰ অৱশেষ উদ্ধাৰ হোৱাৰ পিছতে গোচৰটোৰ তদন্তই নতুন গতি লাভ কৰে।
উদ্ধাৰ হোৱা কংকালৰ অৱশেষ আশীষ সোমৰ হয় নে নহয়, সেয়া নিশ্চিত কৰিবলৈ আৰক্ষীয়ে তেওঁৰ পৰিয়ালৰ সদস্যসকলৰ DNA নমুনা সংগ্ৰহ কৰিছে। অৱশ্যে কংকালৰ অৱশেষৰ সৈতে পৰিয়ালৰ DNA নমুনা মিলাই কৰা পৰীক্ষাৰ ফলাফল এতিয়াও আহিবলৈ বাকী আছে।
ঘটনাটোৰ সন্দৰ্ভত আৰক্ষীৰ অধিক তদন্ত অব্যাহত আছে। পৰৱৰ্তী সময়ত আৰু অধিক তথ্য পোহৰলৈ অহাৰ সম্ভাৱনা আছে।
