বিশ্বৰ আগশাৰীৰ চিপ নিৰ্মাণকাৰী প্ৰতিষ্ঠান NVIDIAৰ মুখ্য কাৰ্যবাহী বিষয়া (CEO) জেনছেন হুৱাঙক পদৰ পৰা অপসাৰণৰ প্ৰস্তুতি চলাইছে প্ৰতিষ্ঠানটোৰ পৰিচালনা সমিতিয়ে। দুটা অবৈধ সম্পৰ্কৰ অভিযোগক কেন্দ্ৰ কৰি এই পদক্ষেপ গ্ৰহণৰ কথা বিবেচনা কৰা হৈছে বুলি বুধবাৰে প্ৰকাশিত The Wall Street Journalৰ এক প্ৰতিবেদনত দাবী কৰা হৈছে। প্ৰতিবেদন অনুসৰি, হুৱাঙৰ দুটা বিবাহবহিৰ্ভূত সম্পৰ্কৰ ভিতৰত এটা সম্পৰ্ক এগৰাকী সন্দেহযুক্ত চীনা চোৰাংচোৱাৰ সৈতে আছিল। বিষয়টোৰ সৈতে জড়িত লোকৰ উদ্ধৃতি দি এই তথ্য প্ৰকাশ কৰিছে সংবাদ মাধ্যমটোৱে।
প্ৰতিবেদন অনুসৰি, বুধবাৰেই পৰিচালনা সমিতিৰ এখন বৈঠক অনুষ্ঠিত হোৱাৰ সম্ভাৱনা আছে। এই বৈঠকতে হুৱাঙৰ ভৱিষ্যৎ আৰু তেওঁৰ পদত থকাৰ বিষয়টো সন্দৰ্ভত সিদ্ধান্ত গ্ৰহণ কৰিব পাৰে সমিতিয়ে।
হুৱাঙৰ সম্ভাৱ্য প্ৰস্থান NVIDIAৰ বাবে এক বৃহৎ নেতৃত্বৰ সংকটৰ সৃষ্টি কৰিব পাৰে। প্ৰায় ৪ ট্ৰিলিয়ন ডলাৰৰ বজাৰ মূল্যৰ এই প্ৰতিষ্ঠানটো তেওঁ ১৯৯৩ চনত সহ-প্ৰতিষ্ঠা কৰিছিল আৰু তিনি দশকৰো অধিক সময় ধৰি ইয়াক বিশ্বৰ কৃত্ৰিম বুদ্ধিমত্তা (AI) প্ৰযুক্তিৰ বাবে অত্যাৱশ্যকীয় চিপৰ সৰ্ববৃহৎ যোগানকাৰী প্ৰতিষ্ঠান হিচাপে গঢ়ি তুলিছে। বৰ্তমান বিশ্বজুৰি AIৰ উত্থান আৰু আমেৰিকা-চীনৰ প্ৰযুক্তিগত প্ৰতিদ্বন্দ্বিতাৰ কেন্দ্ৰবিন্দু হৈ পৰিছে NVIDIA।
ইফালে, প্ৰতিবেদন প্ৰকাশৰ পিছতে আমেৰিকাৰ শ্বেয়াৰ বজাৰৰ লেনদেনৰ পিছৰ সময়ছোৱাত NVIDIAৰ শ্বেয়াৰৰ মূল্য প্ৰায় ৮ শতাংশ হ্ৰাস পায়। ব’ৰ্ডে তদন্ত ঘোষণা কৰাৰ পিছৰে পৰা বুধবাৰৰ লেনদেনৰ পিছৰ পতনকে ধৰি চলিত সপ্তাহত প্ৰতিষ্ঠানটোৰ বজাৰ মূলধন প্ৰায় ৬০০ বিলিয়ন ডলাৰ হ্ৰাস পোৱা বুলি প্ৰতিবেদনত উল্লেখ কৰা হৈছে।
D.A. Davidsonৰ প্ৰযুক্তি গৱেষণা বিভাগৰ মুৰব্বী গিল লুৰিয়াই কয় যে হুৱাঙক তাৎক্ষণিকভাৱে অপসাৰণ কৰিলে NVIDIAৰ বাবে পৰিচালনাৰ ক্ষেত্ৰত যথেষ্ট প্ৰত্যাহ্বানৰ সৃষ্টি হ’ব পাৰে, কিয়নো প্ৰতিষ্ঠানটোৰ বৰ্তমান কোনো নিৰ্দিষ্ট উত্তৰাধিকাৰী পৰিকল্পনা নাই। তেওঁৰ মতে, হুৱাঙে আইন ভংগ কৰা বা প্ৰতিষ্ঠানৰ নীতি উলংঘা কৰাৰ প্ৰমাণ পালে পৰিচালনা সমিতিয়ে ব্যৱস্থা গ্ৰহণ কৰাৰ সম্ভাৱনা আছে।
ইয়াৰ পূৰ্বে বুধবাৰে The New York Timesএ প্ৰকাশ কৰা এক প্ৰতিবেদনত দাবী কৰা হৈছিল যে NVIDIAৰ এগৰাকী জ্যেষ্ঠ বিষয়াৰ সৈতে হুৱাঙৰ বিবাহবহিৰ্ভূত সম্পৰ্ক আছিল। প্ৰতিবেদন অনুসৰি, সেই বিষয়াগৰাকী হৈছে প্ৰতিষ্ঠানটোৰ স্বাস্থ্যসেৱা বিভাগৰ উপ-সভাপতি কিম্বাৰ্লি পাৱেল। প্ৰতিষ্ঠানটোত কৰ্মৰত পাঁচগৰাকী ব্যক্তিৰ উদ্ধৃতি দি বাতৰিটো প্ৰকাশ কৰা হৈছিল।
বাতৰি অনুসৰি, বুধবাৰে কিম্বাৰ্লি পাৱেলৰ সৈতে থকা সম্পৰ্ক সন্দৰ্ভত ফোনযোগে সোধাত হুৱাঙে তেওঁৰ সৈতে এই বিষয়ত পোনপটীয়াকৈ কথা পতাৰ প্ৰয়োজন নাই বুলি উল্লেখ কৰে। ইয়াৰ পিছতে তেওঁ ফোনৰ সংযোগ বিচ্ছিন্ন কৰে বুলি The New York Timesৰ প্ৰতিবেদনত উল্লেখ কৰা হৈছে।
NVIDIA আৰু কিম্বাৰ্লি পাৱেলে এই সন্দৰ্ভত তাৎক্ষণিকভাৱে কোনো প্ৰতিক্ৰিয়া প্ৰকাশ কৰা নাই। আনহাতে, Reuters-এও এই অভিযোগসমূহৰ সত্যতা স্বতন্ত্ৰভাৱে নিশ্চিত কৰিব পৰা নাই বুলি জনাইছে।
উল্লেখ্য যে, এই বিতৰ্কৰ সূত্ৰপাত হৈছিল এলিছ হুৱাঙ নামৰ এগৰাকী মহিলাৰ সৈতে জেনছেন হুৱাঙৰ সম্পৰ্কৰ বিষয়ে প্ৰকাশ পোৱা তথ্যক কেন্দ্ৰ কৰি। আমেৰিকাৰ চোৰাংচোৱা সংস্থাৰ মতে, চীনৰ প্ৰতিষ্ঠানসমূহলৈ NVIDIAৰ চিপ প্ৰেৰণৰ ব্যৱস্থা কৰাত এলিছ হুৱাঙে ভূমিকা গ্ৰহণ কৰিছিল বুলি সন্দেহ কৰা হৈছে।
দেওবাৰে কৰ্মচাৰীসকললৈ প্ৰেৰণ কৰা এক আভ্যন্তৰীণ বাৰ্তাত জেনছেন হুৱাঙে নিজৰ পত্নীৰ প্ৰতি অবিশ্বাসী হোৱাৰ কথা স্বীকাৰ কৰি ইয়াৰ সম্পূৰ্ণ দায়িত্ব গ্ৰহণ কৰে। অৱশ্যে, তেওঁ এই সম্পৰ্ক সন্দৰ্ভত কোনো বিস্তৃত তথ্য প্ৰকাশ কৰা নাছিল।
সেই একেদিনাই NVIDIAৰ পৰিচালনা সমিতিয়ে হুৱাঙ কোনো বিদেশী চোৰাংচোৱা অভিযানৰ লক্ষ্য হৈ পৰিছিল নেকি, সেই সন্দৰ্ভত তদন্ত আৰম্ভ কৰে। স্বতন্ত্ৰ সঞ্চালকসকলৰ তত্ত্বাৱধানত বাহিৰৰ আইনী পৰামৰ্শদাতাৰ সহযোগত এই তদন্ত চলোৱা হৈছে। অৱশ্যে, তদন্ত ঘোষণা কৰাৰ সময়ত পৰিচালনা সমিতিয়ে হুৱাঙৰ ওপৰত আস্থা প্ৰকাশ কৰিছিল।
ইফালে, আমেৰিকাৰ ৰাষ্ট্ৰপতি ড’নাল্ড ট্ৰাম্পে এই অভিযোগসমূহ সন্দৰ্ভত হুৱাঙৰ সৈতে কোনো আলোচনা কৰা নাই বুলি উল্লেখ কৰাৰ লগতে NVIDIAৰ মুৰব্বীগৰাকীৰ প্ৰতি সমৰ্থন প্ৰকাশ কৰিছে। ট্ৰাম্পে হুৱাঙক এগৰাকী “সন্মানীয় ব্যক্তি” বুলি অভিহিত কৰি দেশৰ বাবে তেওঁ “অসাধাৰণ কাম” কৰা বুলি মন্তব্য কৰে।
আনহাতে, চীনৰ এগৰাকী ব্যৱসায়ীৰ সৈতে হুৱাঙৰ ঘনিষ্ঠ সম্পৰ্কৰ অভিযোগ সন্দৰ্ভত অনুষ্ঠিত হ’বলগীয়া এক শুনানিত উপস্থিত হৈ তথ্য প্ৰদান কৰিবলৈ তেওঁক আহ্বান জনাইছিল আমেৰিকাৰ কংগ্ৰেছে। এই আহ্বানৰ প্ৰতি সঁহাৰি নিদিলে হুৱাঙক কংগ্ৰেছৰ চমন জাৰি কৰাৰ সম্ভাৱনাও আছে। অভিযোগ অনুসৰি, উক্ত চীনা ব্যৱসায়ী মহিলাগৰাকীয়ে বেইজিংলৈ তথ্য প্ৰেৰণ কৰিছিল।
উল্লেখ্য যে, জেনছেন হুৱাঙে ১৯৯৩ চনত কাৰ্টিছ প্ৰিয়েম আৰু ক্ৰিছ মালাক’স্কিৰ সৈতে NVIDIA প্ৰতিষ্ঠা কৰিছিল। প্ৰথম অৱস্থাত প্ৰতিষ্ঠানটোৱে কম্পিউটাৰ গেমৰ বাবে গ্ৰাফিক্স চিপ নিৰ্মাণ কৰিছিল। পৰৱৰ্তী সময়ত CUDA নামৰ ছফ্টৱেৰ প্ৰযুক্তিৰ জৰিয়তে এই প্ৰচেছৰসমূহ সাধাৰণ কম্পিউটিং আৰু পিছলৈ কৃত্ৰিম বুদ্ধিমত্তাৰ ক্ষেত্ৰতো ব্যৱহাৰৰ উপযোগী কৰি তোলা হয়।
