এটা সোণালী যুগৰ অৱসান; আৰ্জেণ্টিনাৰ জাৰ্চিত শেষবাৰৰ বাবে খেলপথাৰত নামিল ফুটবলৰ মহাতাৰকা লিঅ’নেল মেছি

২১ বছৰীয়া আন্তঃৰাষ্ট্ৰীয় ফুটবল কেৰিয়াৰৰ অন্ত পেলাই আৰ্জেণ্টিনাৰ জাৰ্চিত শেষবাৰৰ বাবে খেলপথাৰত নামিল ফুটবল মহাতাৰকা লিঅ’নেল মেছি। মঙলবাৰে বেনিনৰ বিৰুদ্ধে ৩-০ গ’লত জয়ী হয় আৰ্জেণ্টিনা। আৰ্জেণ্টিনাৰ জাৰ্ছীত আৰু খেলপথাৰত দেখা নাযাব মেছিক।

বিদায়ী মেচখনত মেছিয়ে পেনাল্টিৰে এটা গ’ল কৰাৰ লগতে দলটোৰ আন দুটা গ’লতো সহায় আগবঢ়ায়। এই মেচখন আছিল ৰাষ্ট্ৰীয় দলৰ হৈ মেছিৰ ২০৮সংখ্যক আন্তঃৰাষ্ট্ৰীয় মেচ।

মেছিৰ ২১ বছৰীয়া আন্তঃৰাষ্ট্ৰীয় কেৰিয়াৰত ১২৬টা গ’ল, দুটা কোপা আমেৰিকা খিতাপ আৰু এটা বিশ্বকাপ জয়ৰ কৃতিত্ব আছে। ২০২২ চনত কাতাৰ বিশ্বকাপত আৰ্জেণ্টিনাক চেম্পিয়ন কৰাই মেছিয়ে দেশবাসীৰ বহুদিনীয়া অপেক্ষাৰ অন্ত পেলাইছিল।

বুয়েনছ আয়ৰেছৰ ৮৫ হাজাৰৰো অধিক দৰ্শকে মেছিক শেষবাৰৰ বাবে খেলপথাৰত চাবলৈ ভিৰ কৰে। মেচখনৰ ১০ম মিনিটত তেওঁৰ ১০ নম্বৰ জাৰ্চিৰ প্ৰতি সন্মান জনাই খেল বন্ধ কৰি দৰ্শকে এক মিনিট ধৰি হাত চাপৰি বজায়।

মেচৰ অন্তত সতীৰ্থসকলে মেছিক বিদায় জনায়। ষ্টেডিয়ামত হাজাৰ হাজাৰ অনুৰাগীয়ে ‘মেছি, মেছি’ ধ্বনিৰে পৰিৱেশ মুখৰিত কৰি তোলে।

আৱেগিক হৈ মেছিয়ে অনুৰাগীসকলক কয় যে তেওঁ আৰ্জেণ্টিনাক ভাল পায়, দেশখনক মিছ কৰিব আৰু আৰ্জেণ্টিনাত জন্ম লোৱাৰ বাবে ভগৱানৰ ওচৰত কৃতজ্ঞ।

এসময়ত মেছিৰ দেশপ্ৰেম আৰু আৰ্জেণ্টিনাৰ প্ৰতি দায়বদ্ধতাক লৈ প্ৰশ্ন উত্থাপন হৈছিল। কিন্তু ২০২১ চনৰ কোপা আমেৰিকা আৰু ২০২২ চনৰ বিশ্বকাপ জয়ৰ পাছত সেই সকলো সমালোচনাৰ অন্ত পৰে। মেছি হৈ পৰে আৰ্জেণ্টিনাৰ জাতীয় নায়ক।

মেছিৰ আন্তঃৰাষ্ট্ৰীয় কেৰিয়াৰৰ পৰিসমাপ্তিৰ লগে লগে আৰ্জেণ্টিনা এতিয়া মেছিবিহীন এখন ৰাষ্ট্ৰীয় দল। মেছিৰ দৰে এগৰাকী কিংবদন্তিৰ স্থান পূৰণ কৰাটো হ’ব দলটোৰ বাবে এক বৃহৎ প্ৰত্যাহ্বান।

ইফালে, ইণ্টাৰ মিয়ামিৰ সৈতে মেছিৰ চুক্তি ২০২৮ চনলৈকে আছে। সেয়েহে ক্লাব ফুটবলত তেওঁক এতিয়াও খেলপথাৰত দেখা যাব। কিন্তু আৰ্জেণ্টিনাৰ জাৰ্চিত মেছিক দেখাৰ সেই যুগৰ অৱসান ঘটিল মঙলবাৰে।

NKTV Digital
Author: NKTV Digital

Popular

More like this
Related

ইজৰাইলত নতুন চৰকাৰ গঠনৰ তৎপৰতা, নেতানিয়াহুৰ লিকুড পাৰ্টিক আলোচনালৈ আমন্ত্ৰণ গাডি আইজেনকটৰ

ইজৰাইলত নতুন চৰকাৰ গঠনৰ প্ৰক্ৰিয়াক লৈ ৰাজনৈতিক তৎপৰতা বৃদ্ধি...

গুজৰাটৰ কচ্ছত ভয়ংকৰ পথ দুৰ্ঘটনা, একেটা পৰিয়ালৰ তিনি শিশুসহ ৭জনৰ মৃত্যু

গুজৰাটৰ কচ্ছ জিলাত সংঘটিত এক ভয়ংকৰ পথ দুৰ্ঘটনাত তিনিটা...

অপাৰেচন সিন্দূৰৰ সময়ত পাকিস্তানক চীনৰ সমৰ্থন,ভাৰতৰ উত্থান ৰোধৰ কৌশল চীনৰ : আমেৰিকান কমিটী

ভাৰতৰ ক্ৰমবৰ্ধমান শক্তি আৰু আঞ্চলিক প্ৰভাৱ সীমিত কৰাৰ লক্ষ্যৰে...