ভাৰত-নিউজিলেণ্ড মুক্ত বাণিজ্য চুক্তি : ভাৰতীয় ৰপ্তানিত ১০০% শূন্য শুল্ক, কিদৰে লাভান্বিত হ’ব ভাৰত?
ভাৰত-নিউজিলেণ্ড মুক্ত বাণিজ্য চুক্তি( FTA) অক্টোবৰত কাৰ্যকৰী হোৱাৰ সম্ভাৱনা প্ৰকট।
ভাৰত আৰু নিউজিলেণ্ডৰ মাজত স্বাক্ষৰিত মুক্ত বাণিজ্য চুক্তি (FTA) ২০২৬ চনৰ অক্টোবৰত কাৰ্যকৰী হোৱাৰ সম্ভাৱনা আছে। চুক্তিখন কাৰ্যকৰী হ’লে নিউজিলেণ্ডৰ বজাৰত ভাৰতৰ সকলো ৰপ্তানি সামগ্ৰীয়ে শূন্য শুল্কৰ সুবিধা লাভ কৰিব।
দুয়োখন দেশে ২০২৫ চনৰ ডিচেম্বৰত FTA আলোচনাৰ সমাপ্তি ঘোষণা কৰাৰ পিছত ২০২৬ চনৰ ২৭ এপ্ৰিলত চুক্তিখনত আনুষ্ঠানিকভাৱে স্বাক্ষৰ কৰে।
ভাৰতীয় ৰপ্তানিৰ বাবে বৃহৎ বজাৰ মুকলি
চুক্তিৰ অধীনত নিউজিলেণ্ডে ভাৰতৰ ১০০ শতাংশ ৰপ্তানিৰ বাবে শূন্য-শুল্ক বজাৰ প্ৰৱেশৰ সুবিধা প্ৰদান কৰিছে। ইয়াৰ বিপৰীতে ভাৰতে ৭০ শতাংশ টেৰিফ লাইনৰ ক্ষেত্ৰত শুল্ক হ্ৰাসৰ সন্মতি দিছে, যিয়ে দুয়োখন দেশৰ মুঠ দ্বিপাক্ষিক বাণিজ্যৰ প্ৰায় ৯৫ শতাংশ সামৰি ল’ব।
ভাৰতে অৱশ্যে দেশীয় কৃষিখণ্ডৰ স্বাৰ্থ সুৰক্ষিত কৰিবলৈ কেইবাটাও সংবেদনশীল কৃষিজাত সামগ্ৰী চুক্তিৰ পৰা বাহিৰত ৰাখিছে। ইয়াৰ ভিতৰত গাখীৰ, ক্ৰীম, চীজ, দৈ, ৱে আৰু কেছিনৰ লগতে কফি, পিয়াঁজ, চেনি, মছলা, ভোজ্য তেল আৰু ৰবৰ উল্লেখযোগ্য।
ইফালে ভাৰতৰ উৎপাদন খণ্ডত ব্যৱহৃত কাঠৰ লগ, কোকিং কয়লা, ধাতুৰ স্ক্ৰেপ আৰু আৱৰ্জনাৰ দৰে কেইবাটাও কেঁচামালৰ ক্ষেত্ৰত শুল্কমুক্ত প্ৰৱেশৰ সুবিধা দিয়া হৈছে।
৫,০০০ ভাৰতীয় পেছাদাৰীলৈ নতুন ভিছা
FTA-খনৰ আন এক গুৰুত্বপূৰ্ণ দিশ হৈছে ভাৰতীয় দক্ষ পেছাদাৰীসকলৰ বাবে Temporary Employment Entry Visa ব্যৱস্থা। এই ব্যৱস্থাৰ অধীনত যিকোনো সময়তে সৰ্বাধিক ৫,০০০জন ভাৰতীয় পেছাদাৰীয়ে ভিছা লাভ কৰিব পাৰিব আৰু সৰ্বাধিক তিনিবছৰলৈ নিউজিলেণ্ডত কাম কৰাৰ সুযোগ পাব।
এই ভিছা পথৰ আওতাত AYUSH অনুশীলনকাৰী, যোগ প্ৰশিক্ষক, ভাৰতীয় ৰান্ধনী আৰু সংগীত শিক্ষকক অন্তৰ্ভুক্ত কৰাৰ লগতে তথ্য-প্ৰযুক্তি, ইঞ্জিনিয়াৰিং, স্বাস্থ্যসেৱা, শিক্ষা আৰু নিৰ্মাণ খণ্ডৰ দক্ষ পেছাদাৰীসকলকো সামৰি লোৱা হৈছে।
ভাৰতত ১৫ বছৰত ২০ বিলিয়ন ডলাৰৰ বিনিয়োগৰ লক্ষ্য
চুক্তিখনৰ অধীনত নিউজিলেণ্ডে অহা ১৫ বছৰত ভাৰতলৈ প্ৰায় ২০ বিলিয়ন ডলাৰৰ বিনিয়োগ সহজ কৰি তোলাৰ প্ৰতিশ্ৰুতি দিছে। উৎপাদন, আন্তঃগাঁথনি, সেৱা আৰু উদ্ভাৱন খণ্ডত এই বিনিয়োগৰ সম্ভাৱনা আছে।
ইয়াৰ উপৰি ভাৰতীয় কোম্পানীসমূহে নিউজিলেণ্ডৰ বজাৰৰ লগতে প্ৰশান্ত মহাসাগৰীয় দ্বীপপুঞ্জৰ বিস্তৃত বজাৰৰ সৈতে সংযোগ বৃদ্ধিৰ সুযোগ লাভ কৰিব পাৰে।
দ্বিপাক্ষিক বাণিজ্যত বৃদ্ধি
২০২৪-২৫ বিত্তীয় বৰ্ষত ভাৰত আৰু নিউজিলেণ্ডৰ মাজৰ দ্বিপাক্ষিক পণ্য বাণিজ্যৰ পৰিমাণ ১.৩ বিলিয়ন ডলাৰত উপনীত হয়। পূৰ্বৰ বিত্তীয় বৰ্ষৰ তুলনাত এই পৰিমাণ প্ৰায় ৪৯ শতাংশ বৃদ্ধি পাইছে।
FTA কাৰ্যকৰী হোৱাৰ পিছত দুয়োখন দেশৰ মাজত বাণিজ্য, বিনিয়োগ আৰু পেছাদাৰী আদান-প্ৰদান অধিক বৃদ্ধি পোৱাৰ সম্ভাৱনা আছে।
চুক্তিখন কাৰ্যকৰী হ’লে RCEPৰ সদস্য দেশসমূহৰ ভিতৰত চীনৰ বাহিৰে বাকী দেশসমূহৰ সৈতে ভাৰতৰ বাণিজ্যিক চুক্তি থাকিব। অৱশ্যে ভাৰত নিজে Regional Comprehensive Economic Partnership (RCEP)-ৰ সদস্য নহয়।
