গোলকীয় উষ্ণতা বৃদ্ধিৰ ভয়ংকৰ পৰিণতিৰ সন্দৰ্ভত নতুনকৈ সতৰ্কবাণী জাৰি কৰিছে ৰাষ্ট্ৰসংঘই। ২০১৫ চনৰ পেৰিছ জলবায়ু চুক্তিত নিৰ্ধাৰণ কৰা ১.৫ ডিগ্ৰী চেলছিয়াছৰ উষ্ণতা বৃদ্ধিৰ সীমা বিশ্বই অতিক্ৰম কৰাৰ দিশে আগবাঢ়িছে। ইয়াৰ ফলত আগন্তুক দশকসমূহত বাঢ়িব পাৰে বানপানী, ধুমুহা, তাপপ্ৰৱাহ আৰু সাগৰপৃষ্ঠ বৃদ্ধিৰ দৰে বিপৰ্যয়।
ৰাষ্ট্ৰসংঘৰ পৰিৱেশ কাৰ্যসূচী (UNEP)-ৰ শেহতীয়া মূল্যায়ন অনুসৰি, উচ্চাকাংক্ষী জলবায়ু পদক্ষেপ গ্ৰহণ কৰিলেও এই শতিকাৰ মাজভাগত বিশ্বৰ উষ্ণতা বৃদ্ধিৰ শিখৰ প্ৰায় ১.৮ ডিগ্ৰী চেলছিয়াছ পৰ্যন্ত হ’ব পাৰে। আনহাতে, বৰ্তমানৰ নীতি আৰু পদক্ষেপ অব্যাহত থাকিলে ২১০০ চনৰ ভিতৰত উষ্ণতা বৃদ্ধিয়ে ২.৬ ডিগ্ৰী চেলছিয়াছ স্পৰ্শ কৰাৰ আশংকা আছে।
বিজ্ঞানীসকলৰ মতে, বৰ্তমান ২০ বছৰৰ গড় হিচাপত পৃথিৱীৰ উষ্ণতা প্ৰাক-শিল্প যুগৰ তুলনাত প্ৰায় ১.৪ ডিগ্ৰী চেলছিয়াছ বৃদ্ধি পাইছে। প্ৰতি পাঁচ বছৰে নিৰ্গমন হ্ৰাস কৰাত পলম হ’লে সৰ্বোচ্চ উষ্ণতা বৃদ্ধিৰ হাৰ অতি কমেও আৰু ০.১ ডিগ্ৰী চেলছিয়াছ বৃদ্ধি পাব পাৰে।
এই উষ্ণতা বৃদ্ধিৰ অন্যতম ভয়ংকৰ পৰিণতি হ’ব সাগৰপৃষ্ঠৰ ক্ৰমাগত বৃদ্ধি। বিশেষকৈ উপকূলীয় মহানগৰ আৰু ঘন জনবসতিপূৰ্ণ অঞ্চলসমূহত বান, ধুমুহা, ঢৌৰ বিপদ অধিক বৃদ্ধি পাব। দক্ষিণ এছিয়াৰ উপকূলীয় চহৰসমূহো এই সংকটৰ পৰা সুৰক্ষিত নহয়, আনকি বসবাসৰ বাবেও অনুপযোগী হৈ পৰিব পাৰে বুলি ৰাষ্ট্ৰসংঘৰ প্ৰতিবেদনত সতৰ্ক কৰা হৈছে।
উষ্ণতা ১.৫ ডিগ্ৰীৰ ওপৰত থকা সময়ছোৱাত স্বাস্থ্যজনিত সমস্যা বৃদ্ধি, খাদ্য উৎপাদন হ্ৰাস আৰু পানীৰ সংকট অধিক তীব্ৰ হোৱাৰ আশংকা কৰা হৈছে। ইয়াৰ উপৰি বৃহৎ বৰফস্তৰ গলি যোৱা আৰু মহাসাগৰীয় সঞ্চালন ব্যৱস্থাত গুৰুতৰ পৰিৱৰ্তনৰ দৰে অপৰিৱৰ্তনীয় ক্ষতিৰ আশংকাও বৃদ্ধি পাব পাৰে।
সাগৰপৃষ্ঠৰ উচ্চতা বৃদ্ধিৰ ফলত ভাৰতৰ কলকাতা আৰু মুম্বাইৰ লাখ লাখ লোকসহ দক্ষিণ এছিয়াৰ ১.৪ কোটিতকৈ অধিক লোক তাৎক্ষণিকভাৱে স্থায়ীভাৱে জলমগ্ন হোৱাৰ আশংকাত আছে।
ৰাষ্ট্ৰসংঘৰ প্ৰতিবেদন অনুসৰি, দক্ষিণ এছিয়াৰ নিম্নভূমি ডেল্টা অঞ্চলত কলকাতা, মুম্বাই আৰু ঢাকাৰ দৰে চহৰত ইয়াৰ আটাইতকৈ গুৰুতৰ পৰিণতি হ’ব ।
ইফালে, বিশ্বৰ উষ্ণতা ১.৫ ডিগ্ৰী চেলছিয়াছৰ সীমা অতিক্ৰম কৰাৰ দিশে আগবাঢ়িছে। উষ্ণতা বৃদ্ধি অব্যাহত থাকিলে সাগৰপৃষ্ঠ বৃদ্ধি, বান, জলোচ্ছ্বাস আৰু চৰম বতৰৰ ঘটনাই কোটি কোটি লোকৰ জীৱন আৰু সম্পত্তিৰ ওপৰত দীৰ্ঘম্যাদী প্ৰভাৱ পেলাব পাৰে।
বিশ্বৰ উষ্ণতা পুনৰ ১.৫ ডিগ্ৰীৰ তললৈ নমাবলৈ জীৱাশ্ম ইন্ধনৰ ব্যৱহাৰ হ্ৰাস কৰাৰ লগতে বৃহৎ পৰিসৰত কাৰ্বন অপসাৰণ প্ৰযুক্তিৰ প্ৰয়োজন হ’ব। প্ৰতিবেদনটোৱে অৱশ্যে স্পষ্ট কৰিছে যে কেৱল গছপুলি ৰোপণৰ দৰে পৰম্পৰাগত ব্যৱস্থাই এই সংকট মোকাবিলা কৰিবলৈ যথেষ্ট নহ’ব।
ৰাষ্ট্ৰসংঘই চৰকাৰসমূহক তাৎক্ষণিকভাৱে নিৰ্গমন হ্ৰাস, জলবায়ু অভিযোজন আৰু উপকূলীয় আন্তঃগাঁথনি শক্তিশালী কৰাৰ আহ্বান জনাইছে। ১.৫ ডিগ্ৰীৰ সীমা সম্পূৰ্ণৰূপে ৰক্ষা কৰাটো কঠিন হৈ পৰিলেও, এতিয়াই পদক্ষেপ গ্ৰহণ কৰিলে ভৱিষ্যতৰ ক্ষতি বহু পৰিমাণে সীমিত কৰিব পৰা যাব বুলি প্ৰতিবেদনটোৱে উল্লেখ কৰিছে।
