অখিল গগৈ নেতৃত্বাধীন ৰাইজৰ দলৰ সৈতে সকলো ৰাজনৈতিক মিত্ৰতা আনুষ্ঠানিকভাৱে ছিন্ন কৰিলে অসম প্ৰদেশ কংগ্ৰেছে। মিত্ৰতাৰ নীতি-নিয়ম আৰু শিষ্টাচাৰ উলংঘনৰ অভিযোগ তুলি তাৎক্ষণিকভাৱে কাৰ্যকৰী হোৱাকৈ এই সিদ্ধান্ত গ্ৰহণ কৰিছে কংগ্ৰেছে।
APCCৰ সভাপতি তথা লোকসভাৰ বিৰোধী দলপতিৰ উপ-নেতা গৌৰৱ গগৈৰ নিৰ্দেশত এই সিদ্ধান্ত গ্ৰহণ কৰা হৈছে। APCCৰ সাধাৰণ সম্পাদক (সংগঠন) ৰামান্না বৰুৱাই এই সন্দৰ্ভত এখন সাংগঠনিক পৰিপত্ৰ জাৰি কৰিছে।
পৰিপত্ৰত কোৱা হৈছে যে বিগত লোকসভা আৰু বিধানসভা নিৰ্বাচনৰ পূৰ্বে বিজেপি তথা সাম্প্ৰদায়িক শক্তিৰ বিৰুদ্ধে ঐক্যবদ্ধ ৰাজনৈতিক মঞ্চ গঠনৰ লক্ষ্যৰে কংগ্ৰেছে ৰাইজৰ দলকে ধৰি কেইবাটাও আঞ্চলিক আৰু বাওঁপন্থী দলৰ সৈতে নিৰ্বাচনী মিত্ৰতা কৰিছিল।
কিন্তু কংগ্ৰেছৰ অভিযোগ অনুসৰি, মিত্ৰতাৰ অধিকাংশ সময়তে ৰাইজৰ দলৰ নেতৃত্বই কংগ্ৰেছৰ বিৰুদ্ধে ‘অপপ্ৰচাৰ’ আৰু ‘চৰিত্ৰহনন’ চলাই আহিছিল। লগতে বিৰোধী মিত্ৰজোঁটৰ আন দলসমূহৰ নেতাৰ বিৰুদ্ধেও ভিত্তিহীন আৰু অপমানজনক মন্তব্য কৰাৰ অভিযোগ উত্থাপন কৰিছে কংগ্ৰেছে।
ইফালে, দেওবাৰে অখিল গগৈৰ মন্তব্যক লৈ APCCয়ে তীব্ৰ প্ৰতিক্ৰিয়া প্ৰকাশ কৰি তেওঁক মিত্ৰতাৰ নীতি উলংঘন নকৰিবলৈ সকীয়াইছিল। কংগ্ৰেছৰ নেতাসকলে গগৈক ‘চৰকাৰৰ এজেণ্ট’ হিচাপে কাম নকৰিবলৈও সতৰ্ক কৰিছিল।
অৱশ্যে মিত্ৰতা ভংগ কৰিলেও বিজেপি চৰকাৰৰ বিৰুদ্ধে জনসাধাৰণৰ বিষয় উত্থাপন আৰু চৰকাৰক জবাবদিহি কৰাৰ ক্ষেত্ৰত কংগ্ৰেছৰ স্থিতি অব্যাহত থাকিব বুলি পৰিপত্ৰত স্পষ্ট কৰা হৈছে।
উল্লেখযোগ্য যে, মে’ ২০২৬ৰ অসম বিধানসভা নিৰ্বাচনত বিজেপিয়ে ১২৬খন আসনৰ ভিতৰত ৮২খন, কংগ্ৰেছে ১৯খন, বিপিএফ আৰু অসম গণ পৰিষদে ১০খনকৈ, ৰাইজৰ দল আৰু AIUDF-এ ২খনকৈ আৰু তৃণমূল কংগ্ৰেছে এখন আসন লাভ কৰিছিল।
