ৰাছিয়াৰ দখলত থকা ইউক্ৰেইনৰ অ’লেশ্কি চহৰত ভয়াৱহ মানৱীয় সংকটৰ সৃষ্টি হৈছে। চিকিৎসালয়ত ঔষধৰ নাটনি, খাদ্যৰ অভাৱ আৰু মৃতদেহ সমাধিস্থ কৰাত বাধা দিয়াৰ অভিযোগ উত্থাপন কৰি চহৰখনৰ বাসিন্দাসকলক নিৰাপদ স্থানলৈ স্থানান্তৰ কৰিবলৈ আন্তঃৰাষ্ট্ৰীয় সংস্থাসমূহৰ প্ৰতি আহ্বান জনাইছে ইউক্ৰেইনে।
ইউক্ৰেইনৰ বৈদেশিক মন্ত্ৰী আন্দ্ৰেই ছিবিহাই শনিবাৰে সামাজিক মাধ্যম ‘এক্স’ত এই সন্দৰ্ভত উদ্বেগ প্ৰকাশ কৰি ৰাছিয়াৰ দখলদাৰী বাহিনীয়ে অ’লেশ্কি চহৰখনক ‘মৃত্যুৰ ফান্দ’লৈ পৰিণত কৰা বুলি অভিযোগ কৰে।
ছিবিহাই কয় যে চহৰখনৰ চিকিৎসালয়ত ঔষধৰ ভঁৰাল শেষ হৈছে। তেওঁৰ অভিযোগ অনুসৰি, ৰাছিয়াৰ বাহিনীয়ে বাসিন্দাসকলক মৃতদেহ সমাধিস্থ কৰিবলৈ বাধা দিয়াৰ ফলত ৰাস্তাত আৰু ঘৰৰ ভিতৰত কেইবা ডজনো মৃতদেহ পৰি আছে।
তেওঁ লগতে কয় যে খাদ্যৰ অভাৱত পৰিয়ালসমূহে বাৰীৰ অৱশিষ্ট শাক-পাচলি, সংৰক্ষিত খাদ্য আনকি শামুক খায়ো কোনোমতে জীৱন নিৰ্বাহ কৰিবলগীয়া হৈছে। ইউক্ৰেইনে দীৰ্ঘদিন ধৰি নিৰাপদ স্থানান্তৰ আৰু মানৱীয় সাহায্য প্ৰদানৰ সুবিধা নিশ্চিত কৰিবলৈ আহ্বান জনাই আহিছে বুলিও তেওঁ উল্লেখ কৰে।
উল্লেখ্য যে, শুকুৰবাৰে ৰাছিয়াৰ ৰাষ্ট্ৰপতি ভ্লাদিমিৰ পুটিনে পোপ লিঅ’ৰ সৈতে হোৱা বাৰ্তালাপত দক্ষিণ ইউক্ৰেইনৰ খেৰছন অঞ্চলৰ অ’লেশ্কি চহৰলৈ অত্যাৱশ্যকীয় সামগ্ৰী যোগান ধৰাৰ ক্ষেত্ৰত সহযোগিতা আগবঢ়োৱাৰ প্ৰতিশ্ৰুতি দিছিল।
ইফালে, ছেপ্টেম্বৰ মাহত ক্ৰেমলিনেও অ’লেশ্কিত খাদ্য আৰু চিকিৎসা সামগ্ৰীৰ গুৰুতৰ সংকটৰ কথা স্বীকাৰ কৰিছিল। অৱশ্যে, ৰাছিয়াৰ সামৰিক বাহিনীয়ে পৰিস্থিতি উন্নত কৰাৰ বাবে কাম কৰি থকা বুলি দাবী কৰিছিল। আনহাতে, ইউক্ৰেইনৰ সামৰিক বাহিনীয়ে ড্ৰ’নৰ জৰিয়তে দুবাৰকৈ চহৰখনলৈ খাদ্য আৰু ঔষধ যোগান ধৰিছে।
ছিবিহাই ৰাষ্ট্ৰসংঘ, আন্তঃৰাষ্ট্ৰীয় ৰেড ক্ৰছ সমিতি আৰু অন্যান্য মানৱীয় সাহায্য সংস্থাসমূহক অ’লেশ্কিৰ বাসিন্দাসকলৰ বাবে নিৰাপদ স্থানান্তৰৰ কৰিডৰ সৃষ্টি আৰু তাৎক্ষণিক সাহায্য প্ৰদানৰ ব্যৱস্থা নিশ্চিত কৰিবলৈ আহ্বান জনাইছে।
খেৰছন অঞ্চলৰ ড্নিপ্ৰ’ নদীৰ পূব পাৰত অৱস্থিত অ’লেশ্কি চহৰখন ২০২২ চনত ৰাছিয়াৰ আক্ৰমণৰ পিছতে ৰাছিয়াৰ বাহিনীৰ দখললৈ গৈছিল। পৰৱৰ্তী সময়ত ইউক্ৰেইনৰ বাহিনীয়ে প্ৰত্যাক্ৰমণ চলাই খেৰছন চহৰকে ধৰি অঞ্চলটোৰ কেইবাটাও স্থান পুনৰ দখল কৰে।
ইউক্ৰেইনৰ ৰাষ্ট্ৰপতি ভ’ল’ডিমিৰ জেলেনস্কিয়ে চলিত সপ্তাহত অ’লেশ্কিৰ পৰিস্থিতিক ‘গণহত্যা’ বুলি অভিহিত কৰে। ৰাষ্ট্ৰসংঘৰ ইউক্ৰেইনস্থিত মানৱ অধিকাৰ নিৰীক্ষণ অভিযানৰ মুৰব্বী ডেনিয়েল বেলৰ তথ্য অনুসৰি, যুদ্ধৰ পূৰ্বে অ’লেশ্কিৰ জনসংখ্যা আছিল প্ৰায় ২৪,০০০। বৰ্তমান চহৰখনত প্ৰায় ১,৭০০ লোক বাস কৰি আছে, যাৰ ভিতৰত ৪৭টা শিশু আছে।
ইফালে, শনিবাৰে ৰাছিয়াৰ বাহিনীয়ে ড্নিপ্ৰ’ নদীৰ বিপৰীত পাৰত অৱস্থিত খেৰছন চহৰত আকাশী বোমাৰে আক্ৰমণ চলোৱা বুলি স্থানীয় অভিযুক্ত পক্ষৰ কাৰ্যালয়ে প্ৰকাশ কৰিছে। এই আক্ৰমণত এজন এম্বুলেন্স চালকৰ মৃত্যু হোৱাৰ লগতে ৪০জন লোক আহত হয়।
