গুৱাহাটীৰ পূব শৰণীয়াৰ ৩ নং উপপথত সংঘটিত হৈছে এক অদ্ভূত ঘটনা। এখন পাৰ্লাৰৰ সন্মুখত বাইক ৰখোৱাৰ অভিযোগত এগৰাকী মহিলাই তিনিখন বাইকৰ টায়াৰ কাটি দিয়াৰ ঘটনা পোহৰলৈ আহিছে।
জানিব পৰা মতে, পূব শৰণীয়াৰ ৩ নং উপপথত থকা FAIR BOON নামৰ পাৰ্লাৰখনৰ সন্মুখত কেইবাখনো বাইক ৰখাই থোৱা হৈছিল। ইয়াক লৈ অসন্তুষ্ট হৈ মহিলাগৰাকীয়ে তিনিখন বাইকৰ টায়াৰ কাটি দিয়ে বুলি অভিযোগ উঠিছে।
সমগ্ৰ ঘটনাটো পাৰ্লাৰৰ সন্মুখত থকা CCTV কেমেৰাত বন্দী হৈছে। CCTV ফুটেজত এগৰাকী মহিলাই বাইকসমূহৰ টায়াৰ কাটি থকা দৃশ্য দেখা গৈছে বুলি জানিব পৰা গৈছে।
ঘটনাৰ পাছতে বাইকৰ গৰাকীয়ে আৰক্ষীৰ কাষ চাপিছে। ইতিমধ্যে ঘটনা সন্দৰ্ভত আৰক্ষীয়ে তদন্ত আৰম্ভ কৰিছে।
অৱশ্যে, এই ঘটনাই এটা গুৰুত্বপূৰ্ণ প্ৰশ্নও উত্থাপন কৰিছে—ব্যক্তিগত ব্যৱসায়িক প্ৰতিষ্ঠানৰ সন্মুখত অনুমতি অবিহনে বাইক ৰখোৱাটো কিমানখিনি যুক্তিসংগত? ব্যস্ত মহানগৰীত পাৰ্কিঙৰ সমস্যাৰ বাবে বহু সময়ত দোকান-পাৰ্লাৰ বা আন প্ৰতিষ্ঠানৰ প্ৰৱেশপথৰ সন্মুখত বাহন ৰখোৱাৰ ফলত সংশ্লিষ্ট লোকসকল অসুবিধাৰ সন্মুখীন হয়।
কিন্তু কোনো বাহন ভুল ঠাইত ৰখোৱা বুলি আপত্তি থাকিলেও নিজ হাতেৰে টায়াৰ কাটি দিয়া বা সম্পত্তিৰ ক্ষতি কৰাটো কোনো কাৰণতে গ্ৰহণযোগ্য সমাধান নহয়। আপত্তি থাকিলে বাহনৰ গৰাকীক সতৰ্ক কৰা, পাৰ্কিং আঁতৰাবলৈ কোৱা অথবা প্ৰয়োজনত আৰক্ষী বা সংশ্লিষ্ট কৰ্তৃপক্ষক অৱগত কৰাটোৱেই উচিত পন্থা।
আনহাতে, বাহন চালকসকলৰো দায়িত্ব আছে। আনৰ ব্যৱসায়িক প্ৰতিষ্ঠানৰ প্ৰৱেশপথ বন্ধ কৰি বা অসুবিধা সৃষ্টি কৰি বাহন পাৰ্কিং কৰাৰ পৰা বিৰত থকাটো নাগৰিক শিষ্টাচাৰৰ অংশ।
আইন আৰু নৈতিকতা—দুয়োটা দিশৰ পৰাই সমস্যাটোৰ সমাধান হ’ব লাগে। ব্যস্ত মহানগৰীত পাৰ্কিঙৰ সমস্যাৰ বিৰুদ্ধে আপত্তি থাকিব পাৰে, কিন্তু তাৰ প্ৰতিবাদৰ নামত আনৰ সম্পত্তি নষ্ট কৰাটোও সমানেই নিন্দনীয়। ঘটনা সন্দৰ্ভত আৰক্ষীৰ তদন্তৰ পাছতহে প্ৰকৃত কাৰণ আৰু দায়-দায়িত্ব স্পষ্ট হ’ব।
