ৰাম মন্দিৰ ট্ৰাষ্টৰ প্ৰথম মুখ্য কাৰ্যবাহী বিষয়া হিচাপে অৱসৰপ্ৰাপ্ত এয়াৰ মাৰ্শ্বাল জীতেন্দ্ৰ মিশ্ৰ
অযোধ্যাৰ ৰাম মন্দিৰ পৰিচালনাত এক নতুন অধ্যায়ৰ সূচনা হৈছে। অৱসৰপ্ৰাপ্ত এয়াৰ মাৰ্শ্বাল জীতেন্দ্ৰ মিশ্ৰক শ্ৰী ৰাম জন্মভূমি তীৰ্থ ক্ষেত্ৰ ট্ৰাষ্টৰ প্ৰথম মুখ্য কাৰ্যবাহী বিষয়া (CEO) হিচাপে নিযুক্তি দিয়াৰ সিদ্ধান্ত গ্ৰহণ কৰা হৈছে।
ৰাম মন্দিৰৰ দানৰ ধন আত্মসাতৰ অভিযোগক কেন্দ্ৰ কৰি অযোধ্যাত বিতৰ্কৰ সৃষ্টি হোৱাৰ পিছতে মন্দিৰৰ বিত্তীয় আৰু প্ৰশাসনিক ব্যৱস্থাপনা অধিক সুসংগঠিত কৰাৰ লক্ষ্যৰে CEO নিযুক্তিৰ সিদ্ধান্ত লোৱা হয়।
ভাৰতীয় বায়ুসেনাৰ তথ্য অনুসৰি, জীতেন্দ্ৰ মিশ্ৰই ৬ ডিচেম্বৰ ১৯৮৬ত যুঁজাৰু বিমানৰ পাইলট হিচাপে বায়ুসেনাত যোগদান কৰিছিল। তেওঁ পুনেৰ নেচনেল ডিফেন্স একাডেমী, বেংগালুৰুৰ এয়াৰ ফ’ৰ্চ টেষ্ট পাইলট স্কুল, আমেৰিকাৰ এয়াৰ কমাণ্ড এণ্ড ষ্টাফ কলেজ আৰু ব্ৰিটেইনৰ ৰয়েল কলেজ অৱ ডিফেন্স ষ্টাডিজৰ প্ৰাক্তন ছাত্ৰ।
যুঁজাৰু বিমানৰ অভিজ্ঞ পাইলট তথা পৰীক্ষামূলক পাইলট হিচাপে তেওঁৰ ৩,০০০ ঘণ্টাতকৈ অধিক উৰণৰ অভিজ্ঞতা আছে। তেওঁ ‘অতি বিশিষ্ট সেৱা পদক’ আৰু ‘বিশিষ্ট সেৱা পদক’ লাভ কৰিছে।
ইফালে, ট্ৰাষ্টত মদন মোহন পাণ্ডে, মহেশ ভাগচন্দকা আৰু নিৰ্মলা যাদৱ—এই তিনিজন নতুন সদস্যকো অন্তৰ্ভুক্ত কৰা হৈছে।
CEO পদৰ বাবে ট্ৰাষ্টে লাভ কৰা প্ৰায় ৫,২০০টা আবেদনৰ মাজৰ পৰা ১৮জন প্ৰাৰ্থীক সাক্ষাৎকাৰৰ বাবে বাছনি কৰা হৈছিল। আগষ্টৰ আৰম্ভণিতে সাক্ষাৎকাৰ অনুষ্ঠিত হয়।
সাক্ষাৎকাৰত প্ৰাৰ্থীসকলক প্ৰশাসনিক দক্ষতাৰ লগতে ব্যক্তিগত বিশ্বাস আৰু জীৱনশৈলী সম্পৰ্কেও প্ৰশ্ন কৰা হৈছিল। ইয়াৰ ভিতৰত আছিল—“আপুনি সুৰাপান কৰে নেকি?”, “আপুনি যজ্ঞোপৱীত (জনেৱ) পৰিধান কৰে নেকি?” আৰু “ভগৱান ৰামৰ প্ৰতি আপোনাৰ বিশ্বাস কিমান দৃঢ়?” আদি প্ৰশ্ন।
