ৰাছিয়া-ইউক্ৰেইন যুদ্ধক লৈ ৰাষ্ট্ৰপতি ভ্লাডিমীৰ পুটিনৰ ভৱিষ্যৎক লৈ চাঞ্চল্যকৰ দাবী কৰিছে The Economist-এ। প্ৰতিবেদন অনুসৰি, ৰাছিয়াই ডনবাছ সম্পূৰ্ণৰূপে দখল কৰাৰ ন্যূনতম লক্ষ্যও পূৰণ নকৰাকৈ যুদ্ধ শেষ কৰিলে পুটিনে নিজৰ নিৰাপত্তাক লৈ আশংকা কৰিব পাৰে।
পুটিনৰ ঘনিষ্ঠ সূত্ৰৰ উদ্ধৃতি দি প্ৰতিবেদনটোত দাবী কৰা হৈছে যে যুদ্ধৰ কোনো এটা পৰ্যায়ত পুটিনে তেওঁৰ চৌপাশৰ লোকক কৈছিল—“তেওঁলোকে মোক ফাঁচী দিব।” অৱশ্যে এই মন্তব্য কোনটো প্ৰসংগত কৰা হৈছিল, সেই বিষয়ে কোনো স্পষ্ট তথ্য দিয়া হোৱা নাই।
The Economist-ৰ মতে, দীৰ্ঘদিনীয়া যুদ্ধক লৈ ৰাছিয়াৰ সাধাৰণ জনতা আৰু দেশখনৰ অভিজাত মহলত অসন্তুষ্টি বৃদ্ধি পাইছে। যুদ্ধৰ নামত প্ৰায় পাঁচ বছৰ সময় আৰু বিপুল সম্পদ ব্যয় হোৱাটোৱেই এতিয়া ক্ৰেমলিনৰ বাবে ডাঙৰ চিন্তাৰ কাৰণ।
বিশ্লেষণ অনুসৰি, অচলাৱস্থা ভাঙিবলৈ ৰাছিয়াই যুদ্ধ অধিক তীব্ৰতৰ কৰাৰ পথো বাছি ল’ব পাৰে। ইউক্ৰেইনৰ মিত্ৰ দেশসমূহৰ বিৰুদ্ধে হাইব্ৰিড যুদ্ধ আৰু নাশকতা বৃদ্ধি কৰাৰ লগতে ইউক্ৰেইনৰ শক্তি অবকাঠামোত বৃহৎ আক্ৰমণৰ সম্ভাৱনাৰ কথাও উল্লেখ কৰিছে প্ৰতিবেদনটোৱে।
