ইউক্ৰেইনৰ ৰাজধানী কিভ (Kyiv) আৰু কাষৰীয়া অঞ্চলসমূহত মঙলবাৰে ৰাছিয়াই ধাৰাবাহিকভাৱে ষষ্ঠ দিনৰ বাবে চলোৱা তীব্ৰ বিমান আৰু ড্ৰোন আক্ৰমণত কমেও চাৰিজন লোক নিহত হোৱাৰ লগতে ১২ জনতকৈ অধিক লোক আহত হৈছে। স্থানীয় প্ৰশাসনৰ তথ্য অনুসৰি, কিভ মহানগৰীত চলোৱা আক্ৰমণত তিনিজন লোকৰ মৃত্যু হোৱাৰ লগতে পাঁচজন লোক আহত হয় আৰু ৰাজধানীখনৰ এটা অনাবাসিক এলেকাত অগ্নিকাণ্ডৰ সূত্ৰপাত ঘটে।
আনহাতে কিভ অঞ্চলৰ বৰিছপিলত (Boryspil) ৰাছিয়াৰ মিছাইল আৰু ড্ৰোনে এটা আৱাসিক অট্টালিকা তথা ব্যৱসায়িক প্ৰতিষ্ঠান ধ্বংস কৰাৰ ফলত এজন ব্যক্তিৰ মৃত্যু ঘটে আৰু এটি শিশুকে ধৰি আন ৯ জন লোক আঘাতপ্ৰাপ্ত হয়। ধাৰাবাহিকভাৱে অব্যাহত থকা এই আক্ৰমণৰ বাবে সমগ্ৰ ইউক্ৰেইনত এয়াৰ ৰেইডৰ সতৰ্কবাৰ্তা জাৰি কৰা হৈছে, যাৰ ফলত লাখ লাখ সাধাৰণ নাগৰিকৰ স্বাভাৱিক জীৱনযাত্ৰা ব্যাহত হৈ পৰিছে।
ইয়াৰ প্ৰত্যুত্তৰত ইউক্ৰেইনেও ৰাছিয়াৰ ৰাজধানী মস্কো আৰু ছামাৰা অঞ্চললৈ লক্ষ্য কৰি একাধিক ড্ৰোন নিক্ষেপ কৰে যদিও মস্কোলৈ অহা কেইবাটাও ড্ৰোন আকাশতে ধ্বংস কৰা বুলি ৰাছিয়াৰ তৰফৰ পৰা দাবী কৰা হৈছে। এনে যুদ্ধকালীন পৰিস্থিতিৰ মাজতেই শান্তি আলোচনাৰ পথ প্ৰশস্ত কৰাৰ উদ্দেশ্যে আমেৰিকাৰ প্ৰতিনিধিসকলৰ সৈতে এক গঠনমূলক আলোচনা অনুষ্ঠিত হোৱা বুলি ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিয়ে সদৰী কৰিছে।
