চীনৰ বেইজিংস্থিত ‘আইচ ৰিবন’ ষ্টেডিয়ামত অনুষ্ঠিত দ্বিতীয় বিশ্ব হিউমেনইড ৰবট গেমছৰ শুভাৰম্ভণী অনুষ্ঠানত এক ঐতিহাসিক ঘটনা সংঘটিত হৈছে। বিশ্ববিখ্যাত দৌৰবিদ উছেইন বল্টৰ ১০০ মিটাৰ দৌৰৰ মানৱ বিশ্ব অভিলেখ ভংগ কৰিছে ‘তিয়ানগং আল্ট্ৰা’ নামৰ এটা হিউমেনইড ৰবটে। বেইজিং হিউমেনইড ৰবট ইনোভেশ্যন চেণ্টাৰ চমুকৈ তিয়ানঝু দলে বিকাশ কৰা এই ৰবটটোৱে ১০০ মিটাৰ দূৰত্ব মাত্ৰ ৯.৩৯ ছেকেণ্ডত অতিক্ৰম কৰে, য’ত বল্টৰ পূৰ্বৰ অভিলেখ আছিল ৯.৫৮ ছেকেণ্ড।
দৌৰৰ সময়ত ৰবটটোৰ সৰ্বাধিক গতি আছিল প্ৰতি ছেকেণ্ডত ১৪.৫ মিটাৰ। অৱশ্যে অনন্য গতি আৰু ত্বৰণ প্ৰদৰ্শন কৰাৰ পাছতো দৌৰৰ শেষ সীমা পাৰ হোৱাৰ ঠিক পিছতেই নিয়ন্ত্ৰণ হেৰুৱাই ৰবটটো সুৰক্ষা পেডিঙত খুন্দা খাই বাগৰি পৰে। আনহাতে, এই প্ৰতিযোগিতাৰ এটা পৰীক্ষামূলক দৌৰত ‘অনাৰ’ কোম্পানীৰ দ্বাৰা নিৰ্মিত ‘লাইটনিং’ নামৰ আন এটা ৰবটে ৯.৩২ ছেকেণ্ড সময় লৈছিল। বিশ্বৰ শতাধিক দলৰ ২০০০ৰো অধিক ৰবটৰ অংশগ্ৰহণেৰে অনুষ্ঠিত এই প্ৰতিযোগিতাত এথলেটিকছৰ পৰা আৰম্ভ কৰি ঘৰুৱা কাম-কাজলৈকে মুঠ ৫১ টা শাখাত প্ৰতিদ্বন্দ্বিতা আগবঢ়োৱা হৈছে।
