চলিত বৰ্ষৰ ২৮ ফেব্ৰুৱাৰীত আমেৰিকা আৰু ইজৰাইলৰ বিমান আক্ৰমণত নিহত হোৱা ইৰানৰ প্ৰাক্তন সৰ্বোচ্চ নেতা আয়াতুল্লাহ ছৈয়দ আলী খামেনেইৰ চৰকাৰী অন্ত্যেষ্টিক্ৰিয়াত অংশগ্ৰহণ কৰিবলৈ ইৰানে আনুষ্ঠানিকভাৱে কেইবাগৰাকীও ভাৰতীয় ৰাজনৈতিক নেতাক আমন্ত্ৰণ জনাইছে। এই অন্ত্যেষ্টিক্ৰিয়াৰ কাৰ্যসূচী তেহৰানত অনুষ্ঠিত হ’ব।
ভাৰতক প্ৰতিনিধিত্ব কৰিব বিহাৰৰ ৰাজ্যপাল আৰু পবিত্ৰ মাৰ্ঘেৰিটাই
ইৰানৰ ৰাষ্ট্ৰপতি মাছুদ পেজেছকিয়ানে প্ৰধানমন্ত্ৰী নৰেন্দ্ৰ মোদীক খামেনেইৰ অন্তিম সৎকাৰ অনুষ্ঠানলৈ আমন্ত্ৰণ জনাইছিল। অৱশ্যে, ভাৰত চৰকাৰে প্ৰধানমন্ত্ৰী মোদীৰ পৰিৱৰ্তে বিহাৰৰ ৰাজ্যপাল ছৈয়দ আতা হাছনাইন আৰু বৈদেশিক পৰিক্ৰমা মন্ত্ৰালয়ৰ ৰাজ্যিক মন্ত্ৰী পবিত্ৰ মাৰ্ঘেৰিতাক খামেনেইৰ অন্ত্যেষ্টিক্ৰিয়ালৈ প্ৰেৰণ কৰাৰ সিদ্ধান্ত লৈছে।
উল্লেখ্য যে, বিগত তিনিটা দশক ধৰি ইৰানত শাসন চলোৱা খামেনেই চলিত বৰ্ষৰ ২৮ ফেব্ৰুৱাৰীত তেহৰানত আমেৰিকা আৰু ইজৰাইলে চলোৱা প্ৰচণ্ড বিমান আক্ৰমণৰ প্ৰথম দিনটোতে নিহত হৈছিল।
খামেনেইৰ অন্ত্যেষ্টিক্ৰিয়াৰ কাৰ্যসূচী ৫ জুলাইৰ পৰা ৯ জুলাইলৈ অনুষ্ঠিত হ’ব। ইয়াৰে ৫, ৬ আৰু ৭ জুলাইত তেহৰান আৰু কোমত (Qom) অন্ত্যেষ্টিক্ৰিয়া সম্পন্ন কৰা হ’ব আৰু অহা ৯ জুলাইত মাশ্বহাদ (Mashhad) চহৰত অন্তিমটো বিদায় অনুষ্ঠান অনুষ্ঠিত হ’ব। বিষয়াসকলে আশা কৰিছে যে এই কাৰ্যসূচীত লাখ লাখ লোকে অংশ ল’ব। প্ৰতিবেদন অনুসৰি, এই তিনিখন চহৰত প্ৰায় ২ কোটি শোকাকুল জনতা একত্ৰিত হ’ব পাৰে, যাৰ ফলত ই ইৰানৰ ইতিহাসৰ আটাইতকে ডাঙৰ অন্ত্যেষ্টিক্ৰিয়াসমূহৰ ভিতৰত অন্যতম হৈ পৰিব।
অন্ত্যেষ্টিক্ৰিয়ালৈ আমন্ত্ৰিত ভাৰতীয় নেতাসকল
প্ৰধানমন্ত্ৰী মোদীৰ উপৰিও ইৰানে ভাৰতৰ কেইবাগৰাকীও আগশাৰীৰ ৰাজনৈতিক নেতাক এই চৰকাৰী অন্ত্যেষ্টিক্ৰিয়াত উপস্থিত থাকিবলৈ আমন্ত্ৰণ জনাইছে। আমন্ত্ৰিত বিশিষ্ট ব্যক্তিসকলৰ তালিকাখন তলত উল্লেখ কৰা হ’ল:
নিতিন নবীন (বিজেপি নেতা)
মল্লিকাৰ্জুন খাৰ্গে (কংগ্ৰেছ সভাপতি)
ইমৰাণ মাছুদ (কংগ্ৰেছ সাংসদ)
পৱন খেৰা (কংগ্ৰেছ মুখপাত্ৰ)
ছলমান খুৰ্ছিদ (কংগ্ৰেছ নেতা)
আফজাল আনছাৰী (সমাজবাদী পাৰ্টীৰ সাংসদ)
মেহবুবা মুফতি (পিপলছ ডেম’ক্ৰেটিক পাৰ্টীৰ মুৰব্বী)
ৰুহুল্লাহ মেহদী (শ্ৰীনগৰৰ সাংসদ)
হাজী হানিফা (লাডাখৰ সাংসদ)
ইয়াৰ উপৰিও, আন্তঃৰাষ্ট্ৰীয় সামাজিক সংস্থা ‘অহিংসা বিশ্ব ভাৰতী’ৰ প্ৰতিষ্ঠাপক তথা বিশিষ্ট জৈন ধৰ্মগুৰু আচাৰ্য লোকেশ মুনিকো ইৰানৰ প্ৰাক্তন সৰ্বোচ্চ নেতাগৰাকীৰ চৰকাৰী অন্ত্যেষ্টিক্ৰিয়াত অংশ ল’বলৈ আমন্ত্ৰণ জনোৱা হৈছে। গোলকীয় শান্তি দূত আৰু সমাজ সংস্কাৰক হিচাপে পৰিচিত আচাৰ্য লোকেশ মুনিয়ে দীৰ্ঘদিন ধৰি অহিংসা আৰু সৰ্বধৰ্ম সমন্বয়ৰ হকে কাম কৰি আহিছে।
কোন কোন উপস্থিত থাকিব?
সংবাদ সংস্থা PTI-ৰ সূত্ৰ অনুসৰি, কংগ্ৰেছ দলে তেওঁলোকৰ বৈদেশিক বিভাগৰ মুৰব্বী ছলমান খুৰ্ছিদক খামেনেইৰ অন্ত্যেষ্টিক্ৰিয়ালৈ প্ৰেৰণ কৰাৰ সম্ভাৱনা আছে। আনহাতে, পিডিপি (PDP) প্ৰধান মেহবুবা মুফতিয়েও খামেনেইৰ প্ৰতি শেষ শ্ৰদ্ধা জনাবলৈ ইৰানলৈ যাব বুলি জানিবলৈ দিছে।
প্ৰথমাৱস্থাত এই অন্ত্যেষ্টিক্ৰিয়া মাৰ্চ মাহৰ আৰম্ভণিতে অনুষ্ঠিত হোৱাৰ কথা আছিল যদিও দেশখনত চলি থকা যুদ্ধসদৃশ পৰিস্থিতিৰ বাবে ইয়াক পিছুৱাই দিয়া হৈছিল। ২৮ ফেব্ৰুৱাৰীত তেহৰানত আমেৰিকা আৰু ইজৰাইলৰ ব্যাপক বিমান আক্ৰমণত ৩ দশকৰো অধিক সময় ইৰানক নেতৃত্ব দিয়া আয়াতুল্লাহ আলী খামেনেই নিহত হৈছিল।
তেওঁৰ মৃত্যুৰ পিছত, যোৱা ৮ মাৰ্চত তেওঁৰ ৫৬ বছৰীয়া পুত্ৰ মোজতবা হাছানী খামেনেইয়ে ইৰানৰ সৰ্বোচ্চ নেতাৰ দায়িত্ব গ্ৰহণ কৰে। অৱশ্যে, বৰ্তমান তেওঁৰ স্বাস্থ্যক লৈ ভিন্ন মহলত জল্পনা-কল্পনা অব্যাহত আছে। আমেৰিকাৰ একাংশ জ্যেষ্ঠ বিষয়াই দাবী কৰা অনুসৰি মোজতবা খামেনেই বৰ্তমান ক’মাত আছে, যদিও ইৰানে এতিয়ালৈকে এই দাবী চৰকাৰীভাৱে নিশ্চিত কৰা নাই।
