‘IIT বাবা’ক ঘৰলৈ ঘূৰি অহাৰ আহ্বান পিতৃৰ

প্ৰয়াগৰাজত এতিয়া হাজাৰ হাজাৰ ভক্তৰ সমাগম। মহাকুম্ভমেলা আৰম্ভ হোৱাৰ পাছৰেপৰা বহু সন্ন্যাসীৰ নাম চর্চালৈ আহিছে। ভিন্ন ৰূপ ধাৰণ কৰা বাবাক লৈ দেশজুৰি চৰ্চা অব্যাহত আছে। ছ’চিয়েল মিডিয়াত অধিক চর্চা লাভ লৰা বাবাজন হৈছে আই আই বোম্বেত শিক্ষাগ্রহণ কৰা এৰ’স্পেচ ইঞ্জিনীয়াৰ অভয় সিং গিৰেৱাল ওৰফে ‘আই আই টিয়ান বাবা।’ ইনষ্টাগ্রামত ডেৰ লক্ষাধিক ফল’ৱাৰ্ছ থকা অভয় সিঙে নিজৰ এটা ইনষ্টা ৰীলত পিতৃক হিৰণ্যকশিপুৰৰ লগত তুলনা কৰিছিল। লক্ষণীয় যে, অভয় সিঙৰ পিতৃ কৰণ গিৰেৱাল হাৰিয়ানাৰ এগৰাকী অধিবক্তা। অভয় সিঙে আই আই টি বোম্বেৰ পৰা শিক্ষাগ্রহণ কৰি কানাডাত মাহে ৩ লাখ টকাৰ দৰমহাৰ চাকৰি কৰিছিল। কিন্তু পাৰিবাৰিক অশান্তিৰ বাবে ঘৰ ত্যাগ কৰা অভয় সিঙে কানাডাতো হতাশাৰ সন্মুখীন হ’বলগীয়া হৈছিল। যাৰ বাবে অভয় সিঙে বিদেশৰপৰা ঘূৰি আহি ধৰ্মৰ প্রতি আকৃষ্ট হয়। সম্প্রতি মহাকুম্ভ মেলালৈ আহি চর্চিত হৈ পৰা ‘আই আই টিয়ান বাবা’ক পুনৰ ঘৰলৈ ঘূৰি অহাৰ আহ্বান জনাইছে পিতৃ কৰণ গিৰেৱালে। অৱশ্যে পিতৃৰ আহ্বান সন্দর্ভত কোনো প্রতিক্রিয়া প্রকাশ কৰা নাই অভয় সিং গিৰেৱাল ওৰফে আই আই টিয়ান বাবাই।