চান আলী মিঞা নে মনোৱাৰ হুছেইন, কোনে মাৰিব শেষ হাঁহি?

বিধানসভা, লোকসভাৰ নিৰ্বাচন নহয় এইবাৰ পঞ্চায়তৰহে উপ নিৰ্বাচন। পঞ্চায়তৰ উপ নিৰ্বাচনক কেন্দ্ৰ কৰি উত্তাল গোৱালপাৰা পশ্চিম সমষ্টি । সমষ্টিটোৰ অন্তৰ্গত ২৭নং আমবাৰী গাঁও পঞ্চায়তত অনুষ্ঠিত হ’ব উপ নিৰ্বাচন। পঞ্চায়তটোৰ সভাপতি আব্দুৰ ৰহিমৰ মৃত্যু হোৱাত অনুষ্ঠিত হ’ব উপ নিৰ্বাচন । অহা ১৫ ডিচেম্বৰত ভোট গ্ৰহণ অনুষ্ঠিত হ’ব লগীয়া পঞ্চায়তটোত থিয় দিছে ৩গৰাকী প্ৰাৰ্থীয়ে। নিজকে প্ৰাৰ্থীৰূপে প্ৰক্ষেপ কৰিছে কংগ্ৰেছ দলৰ চান আলী মিঞা, AIUDF দলৰ মনোৱাৰ হুছেইন আৰু SUCI দলৰ জহিৰুল ইছলামে। অৱশ্যে ইয়াৰ মাজতে কংগ্ৰেছ দলৰ চান আলী মিঞা আৰু AIUDF দলৰ মনোৱাৰ হুছেইনৰ প্ৰচাৰ অভিযানে সকলোৰে দৃষ্টি আকৰ্ষণ কৰিছে। বিশেষকৈ AIUDF দলৰ মনোৱাৰ হুছেইনৰ প্ৰচাৰ অভিযানে সকলোৰে চকু কপালত তুলিছে। প্ৰচাৰ অভিযানৰ অন্তিম দিনা AIUDF দলৰ প্ৰাৰ্থীগৰাকীয়ে বিশাল ৰেলী বাহিৰ কৰে ৰাজপথত। সচেতন ৰাইজৰ মনত প্ৰশ্ন উদয় হৈছে পঞ্চায়ত নিৰ্বাচনতো ধনবল অথবা বাহুবলৰ প্ৰয়োগ ঘটিব নেকি, অৱতীৰ্ণ হোৱা প্ৰাৰ্থীয়ে কিদৰে খৰচ হোৱা ধন ঘূৰাই আনিব?