চাৰিধাম যাত্ৰাৰ প্ৰথম মাহতেই ৭৩গৰাকী তীৰ্থযাত্ৰীৰ মৃত্যু হৈছে বুলি জানিবলৈ দিছে উত্তৰাখণ্ড চৰকাৰে। বিগত ৩০ এপ্ৰিলৰ পৰা চাৰিধাম যাত্ৰা আৰম্ভ হৈছিল। সেইদিনা গঙ্গোত্ৰী আৰু যমুনোত্ৰী তীৰ্থযাত্ৰীৰ বাবে মুকলি কৰা হৈছিল। ২ মে’ত কেদাৰনাথৰ দুৱাৰ মুকলি কৰা হৈছিল আৰু ৪ মে’ত বদ্ৰীনাথ ধাম খুলি দিয়া হৈছিল। এপ্ৰিলৰ পৰা মে’ মাহৰ ভিতৰত ৭৩ জন তীৰ্থযাত্ৰীৰ মৃত্যু হৈছে। তথাপি বিগত বছৰৰ তুলনাত এই সংখ্যা কম।
প্ৰশাসনৰ সূত্ৰৰ পৰা জানিব পৰা গৈছে, কেদাৰনাথলৈ যোৱাৰ পথত ৩০ গৰাকী তীৰ্থযাত্ৰীৰ মৃত্যু হৈছে। বদ্ৰীনাথৰ পথত ১৫ গৰাকীৰ, যমুনোত্ৰীত ১২ গৰাকীৰ আৰু গঙ্গোত্ৰী যাত্ৰাৰ পথত ৮ গৰাকীৰ মৃত্যু হৈছে। ৰাজ্য চৰকাৰৰ তথ্য অনুসৰি, বিগত বছৰৰ চাৰিধাম যাত্ৰাত ছমাহত ২৪৬ গৰাকী তীৰ্থযাত্ৰীৰ মৃত্যু হৈছিল। তেওঁলোকৰ বেছিভাগৰ মৃত্যু স্বাস্থ্য সম্পৰ্কীয় জটিলতাৰ বাবে হৈছিল আৰু কিছু তীৰ্থযাত্ৰী দুৰ্ঘটনাত মৃত্যুমুখত পৰিছিল। প্ৰশাসনৰ সূত্ৰ মতে, মৃত তীৰ্থযাত্ৰীসকলৰ বেছিভাগ মহাৰাষ্ট্ৰ, দিল্লী, পশ্চিমবঙ্গ, উত্তৰ প্ৰদেশ, ৰাজস্থান আৰু হাৰিয়ানাৰ। মৃত্যুমুখত পৰাসকলৰ বয়স ৪৫ৰ পৰা ৬৫ বছৰৰ ভিতৰত।
প্ৰশাসনৰ সূত্ৰৰ পৰা জানিব পৰা গৈছে, এই বছৰৰ চাৰিধাম যাত্ৰাত এতিয়ালৈকে যিমান তীৰ্থযাত্ৰীৰ মৃত্যু হৈছে, তেওঁলোকৰ বেছিভাগৰ মৃত্যু স্বাস্থ্য সম্পৰ্কীয় কাৰণত হৈছে। আন কিছু লোক দুৰ্ঘটনাতো মৃত্যুমুখত পৰিছে। ৰাজ্যৰ স্বাস্থ্য সচিব আৰ ৰাজেশ কুমাৰে কৈছে, “বহু সংখ্যক তীৰ্থযাত্ৰীক চিকিৎসা শিৱিৰলৈ মৃত অৱস্থাতে অনা হৈছিল। তথাপি বিগত বছৰৰ তুলনাত এই বছৰ মৃত্যুৰ সংখ্যা কম।” স্বাস্থ্য সচিবে আৰু জনাইছে যে যাত্ৰা আৰম্ভৰ প্ৰথম মাহত ৪ লাখ ৩০ হাজাৰ তীৰ্থযাত্ৰীৰ স্বাস্থ্য পৰীক্ষা কৰা হৈছিল। সমগ্ৰ যাত্ৰাপথত চিকিৎসাৰ পৰ্যাপ্ত ব্যৱস্থা কৰা হৈছে। ৬৯ গৰাকী চিকিৎসক, ১২১ গৰাকী নাৰ্ছ, ২৬ গৰাকী ফাৰ্মাচিষ্ট, ৩০৯খন অক্সিজেন-সজ্জিত শয্যা, ৬খন আইচিইউ শয্যা, এম্বুলেন্স আৰু ব্লাডবেংকৰ ব্যৱস্থাও ৰখা হৈছে।
