জয়ৰে ক’ৰ্টলৈ প্ৰত্যাৱৰ্তন পি ভি সিন্ধুৰ
দীৰ্ঘ বিৰতিৰ পাছত পুনৰ বেডমিণ্টন ক’ৰ্টলৈ প্ৰত্যাৱৰ্তন কৰা ভাৰতৰ পি ভি সিন্ধুই নতুন দিল্লীত আৰম্ভ হোৱা য়’নেক্স-ছানৰাইজ ইণ্ডিয়া অ’পেন বি ডব্লিউ এফ ৱল্ডৰ্ ট্যুৰ ছুপাৰ ৭৫০ প্ৰতিযোগিতাত জয়ৰে প্ৰত্যাশিত আৰম্ভনি কৰিছে৷ দুবাৰকৈ অলিম্পিক পদক জয় কৰাৰ লগতে প্ৰাক্তন শীৰ্ষ বাচনিৰ মহিলা শ্বাটলাৰগৰাকীয়ে একক শাখাৰ প্ৰথম ৰাউণ্ডৰ খেলত ছং শ্বু য়ুনক ২১-১৪, ২২-২০ ৰ ব্যৱধানত পৰাস্ত কৰে৷
যোৱা ডিচেম্বৰত বিবাহপাশত আবদ্ধ হোৱাৰ পাছত হাতত ৰেকেট তুলি ধৰা সিন্ধুই বিপক্ষক পোনপটিয়া ছেটত পৰাস্ত কৰিবলৈ ৫১ মিনিট সময় লয়৷ উল্লেখ্য যে পেৰিছ অলিম্পিকৰ পাছত প্ৰথমবাৰ বি ডব্লিউ এফৰ প্ৰতিযোগিতাত খেলা তথা ভাৰতৰ অন্তিম মহিলাৰূপে ২০১৭ ত ইণ্ডিয়া অপেনৰ খিতাপ জয় কৰা বৰ্তমান ১৬ নম্বৰ ৰেংকিঙত থকা সিন্ধুই দ্বিতীয় ৰাউণ্ডত জাপানৰ মানামি ছুইজুৰ বিৰুদ্ধে খেলিব৷
‘দীঘলীয়া বিৰতিৰ পিছত ছন্দ বিচাৰি পোৱাটো কঠিন যদিও মই ষ্ট্ৰেইট গেমত মেচখন জয় কৰি সুখী৷ মোৰ শ্বাটল দ্বিতীয়খন খেলত মিডক’ৰ্টলৈ গৈছিল যদিও মই সদায় আত্মবিশ্বাসী আছিলো৷’ সিন্ধুই কয়৷
ইফালে, সিন্ধুৰ লগতে পুৰুষ ডাবলছ যুটি চিৰাগ ছেট্টী আৰু সাতৱিকচৈৰাজ ৰেংকিৰেড্ডীও জয়ৰে অভিযান আৰম্ভ কৰিছে৷ সদ্য সমাপ্ত মেলয়েছিয়া অপেনৰ ছেমিফাইনেলত পৰাস্ত হোৱা ভাৰতীয় যুটিটোৱে ২৩-২১, ১৯-২১, ২১-১৬ ৰ মালয়েছিয়াৰ উই চুং আৰু টি কাই উনক পৰাস্ত কৰে৷ স্মৰ্তব্য যে নতুন দিল্লীৰ ইন্দিৰা গান্ধী ষ্টেডিয়ামৰ কে ডি যাদব ইনড’ৰ হলত হোৱা প্ৰতিযোগিতাখনত ২৮ খন দেশৰ ২৫৬ পুৰুষ-মহিলা শ্বাটলাৰে অংশ লৈছে৷
প্ৰথমদিনাৰ খেলত ভাৰতৰ কিদাম্বি শ্ৰীকান্তে ৱাকঅভাৰ লাভ কৰাৰ বিপৰীতে কিৰণ জৰ্জ আৰু ধ্ৰুৱ কাপিলা-তানিছা ক্ৰাষ্টো যুটিয়েও দ্বিতীয় ৰাউণ্ডলৈ অগ্ৰসৰ হৈছে৷ ভাৰতীয় বেডমিণ্টন সন্থাই আয়োজন কৰা তৃতীয় সংস্কৰণৰ প্ৰতিযোগিতাখনত আয়োজক ভাৰতৰ ২১ জনীয়া এটা বৃহৎ দলে খেলিছে৷
