গুৱাহাটী, ১৯ জুন, NKTV: কি হ’ব সৰ্বানন্দ সোণোৱালৰ ৰাজনৈতিক ভৱিষ্যৎ? হাইকমাণ্ডৰ তলব পাই বৃহস্পতিবাৰৰ পৰা দিল্লীত বাহৰ পাতি আছে সৰ্বানন্দ সোণোৱাল। অসমৰ মুখ্যমন্ত্ৰিত্বৰ পদ হিমন্ত বিশ্ব শৰ্মাক এৰি দিয়াৰ বিনিময়ত সৰ্বানন্দ সোণোৱালে কেন্দ্ৰীয় মন্ত্ৰীসভাত অন্তৰ্ভুক্তিৰ সুযোগ পাব বুলি খবৰ আহিছিল। শেহতীয়াকৈ মন্ত্ৰীসভাৰ সম্প্ৰসাৰণৰ সময় চমু চাপি অহাৰ লগে লগে অসমৰ ৰাজনীতিতো চৰ্চা আৰম্ভ হৈছে। সৰ্বানন্দ সোণোৱালে দিল্লীত কেইবাজনো শীৰ্ষ নেতাক সাক্ষাৎ কৰিছে যদিও কেনে আলোচনা কৰিছে সেই বিষয়ে মুখ খোলা নাই। সোণোৱালৰ ৰাজনৈতিক ভৱিষ্যতৰ ওপৰতে কোন হ’ব ৰাজ্যিক বিজেপিৰ সভাপতি সেইকথাও নিৰ্ভৰ কৰিছে। ৰাজ্যত চৰ্চা হৈছে দুটা সমীকৰণ।
সমীকৰণ ১
সোণোৱাল কেন্দ্ৰীয় কেবিনেট মন্ত্ৰী!
ৰামেশ্বৰ তেলী মন্ত্ৰীসভাৰ পৰা বাহিৰ!
সোণোৱালে পাব খাদ্য সংশাধন বিভাগৰ কেন্দ্ৰীয় মন্ত্ৰিত্ব!
ৰামেশ্বৰ তেলীক ৰাজ্যিক বিজেপিৰ সভাপতিৰ দায়িত্ব!
সমীকৰণ ২
সোণোৱালক ৰাজ্যপাল নিযুক্তি!
ৰামেশ্বৰ তেলী মন্ত্ৰীসভাত বাহাল!
সিদ্ধাৰ্থ ভট্টাচাৰ্য, কামাখ্যা প্ৰসাদ তাছা, ৰঞ্জিত দত্তৰ যিকোনো এজনক ৰাজ্যিক বিজেপিৰ সভাপতিৰ দায়িত্ব!
ৰামেশ্বৰ তেলীক মন্ত্ৰীসভাৰ পৰা বাহিৰ কৰিলে চাহ জনজাতি ভোটাৰক সন্তুষ্ট কৰিবৰ বাবে তেওঁকে অথবা কামাখ্যা প্ৰসাদ তাছাক সভাপতিৰ পদ দিয়াৰ চিন্তা-চৰ্চা চলিছে বুলি খবৰ আহিছে। অৱশ্যে ৰামেশ্বৰ তেলী মন্ত্ৰীসভাত থাকিলে সভাপতি পদৰ বাবে প্ৰথম পচন্দলৈ আহিব সিদ্ধাৰ্থ ভট্টাচাৰ্যৰ নাম। সিদ্ধাৰ্থ ভট্টাচাৰ্যই অগ্ৰাহ্য কৰিলেহে তাছা অথবা আন এজনৰ নাম বিবেচনালৈ আহিব। কেন্দ্ৰীয় কেবিনেট মন্ত্ৰীসভাৰ সম্প্ৰসাৰণৰ লগে লগে এই বিষয়টো পৰিস্কাৰ হৈ পৰিব।
