কেৱল ভাৰতৰে নহয় বিশ্ব ক্ৰিকেটৰ নৱাগতক আই পি এলৰ দৰে মঞ্চত সুযোগ দিয়াটো ৰাজস্থান ৰয়েলছৰ এটা দৰ্শন৷ আমি এই ক্ৰিকেটীয় দৰ্শনক কেতিয়াও দলৰ ৰণনীতিৰ পৰা বাদ নিদিওঁ৷ কাৰণ ভাৰতৰ লগতে বিশ্ব ক্ৰিকেটৰ ভৱিষ্যতক উজ্বল তথা মজবুত কৰি ৰাখিবলৈ নৱাগতক নিজৰ প্ৰতিভা বিকাশ কৰাৰ সুযোগ আই পি এলৰ দৰেই মঞ্চই দিবই লাগিব৷’ এই মন্তব্য ৰাজস্থান ৰয়েলছৰ মুখ্য প্ৰশিক্ষক তথা ক্ৰিকেট অধ্যক্ষৰো দায়িত্বত থকা কুমাৰ ছাংগাকাৰাৰ৷ উল্লেখ্য যে চলিত ১৯ সংখ্যক ইণ্ডিয়ান প্ৰিমিয়াৰ লীগ [আই পি এল-২০২৬] ৰ কাইলৈ গুৱাহাটীৰ এ চি এ ষ্টেডিয়ামত হ’বলগা মেচত ৰাজস্থান ৰয়েলছে চেন্নাই ছুপাৰ কিংছৰ বিৰুদ্ধে খেলি অভিযান আৰম্ভ কৰিব৷
আজি সংবাদমেলত আৰ আৰ দলৰ শ্ৰীলংকান কিংবদন্তী ক্ৰিকেটাৰজনে নতুন ছিজন তথা কাইলৈৰ প্ৰথম মেচত এটা ভাৰসাম্য দলৰে উন্নত ক্ৰিকেট খেলিব বুলি আত্মবিশ্বাসৰে ব্যক্ত কৰে৷ অৱশ্যে মুল একাদশ বা বেটিং-বলিং কম্প’জিছনক লৈ কোনো মন্তব্য প্ৰকাশ কৰা নাই প্ৰশিক্ষকজনে৷ ইফালে, অসম সন্তান ৰিয়ান পৰাগক দলৰ স্থায়ী অধিনায়কৰ দায়িত্ব দিয়াক লৈ মন্তব্য প্ৰকাশ কৰি ছাংগাকাৰাই কয় যে ৰিয়ানৰ লগত জাদেজা, সন্দিপ শৰ্মা, জুৰেল, জয়ছোৱালো অধিনায়কৰ তালিকাত আছিল৷ কিন্তু সকলোৰে লগত আলোচনা কৰি তথা যোৱা ছিজনত আৰ আৰ দলক নেতৃত্ব দিয়াৰ অভিজ্ঞতাৰ ফালৰ পৰা ৰিয়ানক নিৰ্বাচিত কৰা হৈছে৷ ‘মই নিজেও অধিনায়ক আছিলো৷ কেৰিয়াত বহু ভুল কৰিছো৷ কিন্তু অধিনায়কৰ দায়িত্ব হ’ল দলটোক একগোট কৰি ৰখা৷ ৰিয়ান এইদিশত অভিজ্ঞ তথা দক্ষ৷’ ছাংগাকাৰাই কয়৷ আই পি এলৰ নতুন নিলামৰ সুবিধা লাভ কৰাত ৰাজস্থান ৰয়েলছে এটা ভাৰসাম্য দল গঠন কৰিবলৈ সক্ষম হৈছে বুলিও তেওঁ ব্যক্ত কৰে৷
উল্লেখ্য যে অসমক নিজৰ দ্বিতীয় ঘৰ হিচাপে লোৱা আই পি এলৰ উদ্বোধনী বৰ্ষৰ চেম্পিয়ন ৰাজস্থান ৰয়েলছে এইবাৰ সাতখন ঘৰুৱা মেচৰ হাইভল্টেজ তিনিখন খেল গুৱাহাটীত খেলিব৷ সেই অনুসৰি কাইলৈ [৩০ মাৰ্চ] গুৱাহাটীত হ’বলগা প্ৰথমখন মেচত ৰাজস্থান ৰয়েলছ পাঁচবাৰৰ চেম্পিয়ন চেন্নাই ছুপাৰ কিংছৰ মুখামুখি হ’ব৷ আনহাতে, অহা সাত এপ্ৰিলত এ চি এ ষ্টেডিয়ামৰ দ্বিতীয়খন মেচত ৰাজস্থান ৰয়েলছৰ প্ৰতিদ্বন্দ্বী হ’ব পাচবাৰ চেম্পিয়ন মুম্বাই ইণ্ডিয়ানছ৷ ইফালে, বিগত আই পি এলৰ চেম্পিয়ন আৰ চি বিয়ে অহা ১০ এপ্ৰিলত গুৱাহাটীত হ’বলগা তৃতীয় মেচখনত ৰাজস্থান ৰয়েলছৰ মুখামুখি হ’ব৷
