মৰ্মান্তিক! ঈদ উদযাপন কৰিবলৈ গৈ নাপালেগৈ ঘৰ, আদবাটতে দুৰ্ঘটনাত মৃত্যু ৩ শ্ৰমিকৰ

ঈদ উদযাপনৰ বাবে নিজ ঘৰলৈ যোৱাৰ সময়ত পথ দুৰ্ঘটনাত প্ৰাণ হেৰুৱালে তিনি জন লোকে। মৰ্মান্তিক এই পথ দুৰ্ঘটনা সংঘটিত হৈছে মিজোৰামৰ পশ্চিম পাইলেন বাইপাছত৷ মিজোৰামৰ পৰা ঘৰলৈ যোৱাৰ সময়তে ভয়ংকৰ পথ দুৰ্ঘটনাত মৃত্যু কাছাৰৰ ভাগা জামালপুৰৰ ৩জন লোকৰ৷ নিয়ন্ত্ৰণ হেৰুৱাই এখন মিনি ট্ৰাক প্ৰায় এক কিলোমিটাৰ তলত খাৱৈত পৰি মৃত্যু হয় ট্ৰাকখনৰ চালক আৰু সহচালকৰ সৈতে তিনিজনৰ৷ মৃতকেইজন কাছাৰৰ ভাগা জামালপুৰৰ ৰমিজ উদ্দিন লস্কৰ, ৰিপন আহমেদ লস্কৰ আৰু খলিল উদ্দিন৷ কৰ্মসূত্ৰে এই তিনিওজন মিজোৰামত আছিল৷ এখন মিনি ট্ৰাকেৰে যোৱাৰ সময়তে মিজোৰামৰ ৱেষ্ট পাইলেন বাইপাছত মিনি ট্ৰাকখন নিয়ন্ত্ৰণ হেৰুৱাই পথৰ তলত খাৱৈত বাগৰি পৰে৷ স্থানীয় লোকসকলৰ সহযোগত আৰক্ষীয়ে মৃতদেহ উদ্ধাৰ কৰি মৰণোত্তৰ পৰীক্ষাৰ বাবে স্থানীয় হাস্পতাললৈ প্ৰেৰণ কৰে৷ এই ঘটনাৰ পাছত কাছাৰৰ ভাগাত এক শোকাকুল পৰিস্থিতিৰ সৃষ্টি হৈছে৷