মহাকাশৰ পৰা দেখিবলৈ কেনেকুৱা ভাৰত? এই প্ৰশ্ন নিশ্চয় আপোনাৰো মনত উদয় হয়, নাইবা আপোনাৰো জানিবলৈ মন যায় মহাকাশৰ পৰা দেখিবলৈ কেনেকুৱা হয় ভাৰত। শেহতীয়াকৈ মহাকাশচাৰী সুনীতা উইলিয়ামছে ক’লে মহাকাশৰ পৰা দেখিবলৈ কেনেকুৱা হয় ভাৰতখন?
আঠদিনৰ বাবে মহাকাশলৈ গৈছিল সুনীতা উইলিয়ামছ। কিন্তু অনাকাংক্ষিতভাৱে প্ৰায় ৯মাহে মহাকাশত আৱদ্ধ হৈ পৰিছিল সুনীতা উইলিয়ামছ আৰু তেওঁৰ সহযোগী। আৰু এইবাৰ পৃথিৱীলৈ উভতি অহাৰ পিছতেই এক সংবাদমেলযোগে নিজৰ অভিজ্ঞতা ব্যক্ত কৰিছে সুনীতা উইলিয়ামছ আৰু তেওঁৰ সহযোগী বুচ্ছ উইলম’ৰে। মহাকাশৰ পৰা ভাৰতখন দেখিবলৈ কেনেকুৱা? এই সন্দৰ্ভত সুনীতা উইলিয়ামছে কয় যে, ‘মহাকাশৰ পৰা ভাৰতখন দেখিবলৈ অপূৰ্ব।’ ভাৰতৰ পিতৃগৃহলৈও অহাৰ কথা ক’লে সুনীতা উইলিয়ামছে। লগতে তেওঁ কয় যে, ‘মহাকাশৰ পৰা পৃথিৱীলৈ উভতি আহি আমি অত্যন্ত সুখী। আমি কেতিয়াও মহাকাশত আবদ্ধ হৈ থকা বুলি ভবা নাছিলো। আমি পৃথিৱীত কি হৈ আছিল সবিশেষ জ্ঞাত নাছিলো।’ সমগ্ৰ অভিযানটোক লৈ দুয়ো মহাকাশচাৰীয়ে গভীৰ প্ৰত্যয় আৰু আত্মবিশ্বাস প্ৰকাশ কৰে। ভৱিষ্যতৰ বিসংগতি সন্দৰ্ভতো মহাকাশচাৰীদ্বয় সজাগ আৰু সচেতন। মহাকাশ অভিযানত সৃষ্টি হ’ব পৰা সমস্যা সমাধানৰ বাবে আত্মনিয়োগ কৰিব দুয়োজনে।
